Read DIOSPA QHELQACHISQ Quechua ISAÍAS 34 Bible Online

ISAÍAS 34 - DIOSPA QHELQACHISQ Quechua bible

ISAÍAS 34

¹Yaw, llaqtakuna, uyariq qayllaykamuychis, yaw, suyukuna, allintapuni uyariychis, hallp'a pachapas chaypi tiyaqkunapiwan uyariychis, teqsimuyuntinpi wiñaq qorakunapas uyarichunku.

²Señor Diosmi k'arak phiñasqa kashan llapan suyukunapaq soldadonkunapaqwan, llapantañan huchacharqan ch'usaq tukunanpaq, hap'iykachirqanñan wañuchisqa kananpaq.

³Ayakunaqa hina wikch'usqan kanqa, hinaspan millayta asnarinqa, orqokunapin yawar mayu phawarinqa.

⁴Llapan ch'askakunaraqmi ñut'ukunqa, hanaq pachapas papel hinaraqmi k'uyusqa kanqa, llapan qoyllurkunapas higos sach'aq raphin hinaraqmi t'akarikamunqa, uvas yuraq raphin hinaraqmi urmamunqa.

⁵Señor Diospa espadanmi hanaq pachapi rikhurin, paymi Edom suyuta wañunanpaq unancharqan, chaymi espadanta chay llaqta pataman chayachimun.

⁶Señor Diosmi Bosrapi sacrificiota ruwan, Edom suyupitaq sinchi askhata wañurachin, askha ovejakunata, cabrakunata, anejokunatawan nak'an, chaymi espadanqa yawarkama wirakama kashan.

⁷Paykunawanmi salqa torokunapas wañullantaq, torokunapas torillokunapas kumpakullantaq. Hallp'ankun yawarkama kanqa, ñut'u hallp'ankutaq wirawan wiswirinqa.

⁸Arí, kayqa Señor Diospa ayni-kutichinan p'unchaymi, hinan Sión contra rimasqanmanta Edomta muchuchishan.

⁹Edom suyuq mayunkunan breaman tukunqa, ñut'u hallp'antaq azufreman tukunqa, hallp'anmi brea hina rawrarinqa.

¹⁰Manan wañunqachu tutapas p'unchaypas, q'osñisqanqa sayarishallanqapunin, watan-watan purunyasqan kapunqa, manapunin pillapas chaynintaqa purinqañachu.

¹¹Chaypiqa tiyanqaku hukukunan[7] pikpirikunan, chaypiqa q'esachakunqaku ch'usiqakunan alqamarikunan, chay suyutaqa Señor Diosmi purunyachinqa, mana piqpa purinan ch'usaqmanpunin tukuchinqa.

¹²Manapunin kamachiqninku reypas kapunqachu, llapan umallinkunan ch'usaq tukupunqa.

¹³Qhapaq wasikunapiqa khiskakunan wiñapunqa, pukarankunapipas kisakunan t'ankarkunan wiñapunqa, chacalkunaq[8] tiyanan cheqasmi kapunqa, surikunaq llanthukunanmi kapunqa.

¹⁴Usqhollo michikunan chacalkunawan tupanqa, salqa cabrakunan paykunapura waqyanakunqa, tutalla puriq animalkunapas chaypin tiyanqa, chay animalkunaq samaranan cheqasmi kanqa.

¹⁵Chaypin hukupas q'esachakunqa, runtuspan chiwchinkunata horqonqa, huñuykuspa ima sumaqta uywanqa. Chayllapitaqmi ankakunapas huñukunqaku, sapanka orqontin chinantin.

¹⁶Señor Diospa qelqanta maskhaspa leeychis. Kikin Señor Diosmi chay hina kananta unancharqan, paypa espiritunmi chay animalkunata huñumurqan, chayraykun sapanka chinantin orqontin Edompi kashan.

¹⁷Señor Diosmi sapankapaq tiyananta wakichipurqan, makinwanmi tiyananku hallp'ata rikuykachipurqan, chaypin pasaqpaq tiyakapunqaku, watan-watanpaqmi chaypi tiyakapunqaku.