Read DIOSPA QHELQACHISQ Quechua ISAÍAS 41 Bible Online

ISAÍAS 41 - DIOSPA QHELQACHISQ Quechua bible

ISAÍAS 41

¹Qocha patapi, islakunapi tiyaqkuna uyariwaychis. Hatun suyukuna, kallpachakuychis, hamuychis huñunakusunchis, juzgasqa kananchispaq.

²¿Pin inti lloqsimuymanta chay atipaqllapuni reyta rikhurichimurqan? ¿Pin payman hatun suyukunata hap'ichin? ¿Pin reykunatapas payman k'umuykachin? Chay reymi espadanwan paykunata ñut'un, wach'inanwanmi wayraq apasqan pajata hina ch'eqechin.

³Paymi paykunata qatin, mana k'irichikuspalla, usqhayllan phawan.

⁴¿Pin chay hinakunata ruwarqan? Ñoqa Señor Diosmi ruwarqani, qallariymantapacha imapas kanankunataqa ñoqan unancharqani. Ñoqa sapallaymi kani, ñawpaqkaqmi kani, tukukuypipas kashallasaqtaqmi.

⁵Islakunapi tiyaqkunan ruwasqayta rikuspanku mancharikunku, kay pachantin runakunan khatatatanku, paykunan qayllaykamushankuña, hamushankuña.

⁶Sapankan yanapanakuspa ninakunku: ¡Kallpachakuy! nispa.

⁷K'ullu llaqllaqmi qori takaqta kallpachan, martillowan idolota takaspa llusk'achaqpas herrerota kallpachan: Allinmi soldadurawan k'askachisqaykiqa, nispa, hinaspan clavokunawan idolota allinta takan mana kumpakunanpaq.

⁸Israel-lláy, qanmi kamachiy kanki, Jacoblláy, qantan akllakurqayki, amigoy Abrahampa mirayninmi kanki.

⁹Kay pachaq karunmantan pusamurqayki, karullaña suyumantan waqyamurqayki, hinaspan nirqayki: Kamachiymi kanki, nispa. Ñoqan akllakurqayki, manataqmi qhawarparirqaykichu.

¹⁰Ama manchakuychu, qanwanmi ñoqaqa kashani, ama pisipaychu, ñoqaqa Diosniykin kani, ñoqan kallpachasqaykipas yanapasqaykipas, ñoqan hap'iykusqaykipas atipachisqaykipas.

¹¹Llapa qanpaq k'arakta phiñakuqkunan p'enqachisqa k'umuykachisqa kanqaku, qanwan maqanakuqkunaqa manapas kankumanchu hinan chinkachisqa kanqaku.

¹²Awqaykikunataqa maskhankin manataqmi tarinkichu, chay maqaqniykikunaqa manapas kankumanchu hinan kanqaku.

¹³Ñoqaqa Diosniyki Señor Diosmi kani, paña makiykimantan hap'ishayki, ñoqan niyki: Ama manchakuychu, ñoqan yanapasqayki, nispa.

¹⁴Señor Diosmi nin: Jacoblláy, kuru hinan pisipaq qhawarisqa kanki, Israel-lláy, qanqa huch'uyllan kanki, chaypas ama manchakuychu, ñoqan yanapasqayki, ñoqaqa Israel runakunaq Ch'uya Diosninmi kani, qespichiqniykitaqmi kani.

¹⁵Kayqa, mosoq rastrillomanmi tukuchiyki, ñawch'illaña kirusapa rastrillomanmi tukuchiyki, orqokunatan chaywan ñut'unki, moqokunatan ñut'u pajaman hina tukuchinki.

¹⁶Chaykunatan wayrachinki, hinan wayra apanqa, tutuka hatun wayran chaykunata ch'eqechinqa, hinaqtinmi qanqa ñoqarayku q'ochukunki, Israelpa Ch'uya Diosnintan hatunchanki.

¹⁷Wakchakunan mana imayoqkunan unuta maskhanku, manataq chayta tarinkuchu, qallunkun mana unu kaqtin k'askaykun. Ñoqa Señor Diostaqmi paykunata uyarisaq, ñoqa Israelpa Diosninqa manan paykunata saqerparisaqchu.

¹⁸Q'ara orqokunamantan mayukunata phawachimusaq, wayq'okunapin unukunata phullpuchimusaq, ch'inneqtan p'uytu-p'uytuman tukuchisaq, ch'aki hallp'apin pukyukunata phawachisaq.

¹⁹Ch'inneqpin mallkisaq cedro sach'akunata, acacia sach'akunata, arrayán sach'akunata, olivo sach'akunatapas, ch'aki hallp'apin wiñachisaq pino sach'akunata, kiswar sach'akunata, ciprés sach'akunatapas.

²⁰Chaymi runakunaqa chaykunata rikunqaku, hinaspan ñoqa Señor Diospa ruwasqayta yachanqaku, ñoqa Israelpa Ch'uya Diosninpa kamasqayta entiendenqaku, nispa.

²¹Señor Diosmi nin: Yaw, idolokuna, qankuna tupapakuychis, nispa. Jacobpa Reyninmi nin: Qankunamanta rimarikuychis.

²²Asuykamuspa willawayku imachus qhepaman kananta. Ñawpa sucedesqanri, ¿ima ninantan nin? Willawayku, ñoqaykutaq maki uyarisaqku. Qhepaman imachus kananta willawayku chayta yachanaykupaq.

²³Qhepaman imachus kananta willawayku, qankunaqa dioskuna kasqaykichista yachanaykupaq. Imallatapas allintapas mana allintapas ruwaychis, chay ruwasqaykichista rikuspa manchapakunaykupaq.

²⁴¡Qankunaqa manan imapaschu kankichis! ¡Manan imatapas ruwayta atinkichischu! Millakuymi qankunata yupaychaq runaqa.

²⁵Reqsisqay runan inti lloqsimuy ladopi tiyan, sutinmantan payta waqyamushani wichaymanta phawaykamunanpaq, chaymi payqa hamushanña. Kamachikuqkunatan t'uruta hina sarunqa, imaynan manka ruwaqqa t'uruta sarun hinata.

²⁶¿Mayqenniykichistaq ñawpaqta chayta willakurqankichis, hina kasqanta rikuspayku: “Hinapunimá kasqa”, ninaykupaq? Manan mayqenniykichispas chaytaqa willakurqankichischu, manan pipas ima simi rimarisqallaykichistapas uyarirqanchu.

²⁷Ñoqapunin ñawpaqtaraq Sionman chayta willarqani, ñoqan Jerusalenman sumaq willakuyta willaqta kacharqani: ¡Kamachipaq apasqakunaqa kutimpushankuñan! ¡Qhawariychis! Chayamushankuñan, nispa, ninanpaq.

²⁸Qhawarirqanin, manataq pipas karqanchu, manan mayqen diospas yuyaychaq karqanchu, chay tapusqayman ima nispapas kutichiwananpaq.

²⁹Llapallankun yanqakama, manan imatapas ruwayta atinkuchu, yanqa mana serviqmi idolonkuqa, nispa.