Read DIOSPA QHELQACHISQ Quechua ISAÍAS 47 Bible Online

ISAÍAS 47 - DIOSPA QHELQACHISQ Quechua bible

ISAÍAS 47

¹Señor Diosmi nin: Babilonia llaqta, uraykuy, ñut'u hallp'api tiyaykuy. Kamachikuy tiyanaykimanta uraykuy, hinaspa pampapi tiyaykuy. Ñawpaqqa doncella sipas hinan karqanki, manan atipasqaraqchu karqanki, kunanmi ichaqa manaña warmallaraq erqellaraq nisunkikuchu.

²Molino rumiwan hak'uta kutay, uma qatanaykita horqokuy, polleraykita q'allpakuy, q'ala phakalla mayukunata chimpay.

³Runakunan q'ala cuerpota rikusunki, runa qayllapin p'enqachisqa kanki, vengakusaqmi, manataqmi pipas hark'akuwanqachu, nispa.

⁴Qespichiqninchisqa Tukuy-atiyniyoq Señor Diosmi, Israel runakunaq Ch'uya Diosninmi, paymi nin:

⁵Babilonia llaqta, ch'inlla tiyaykuy, laqhayaqman haykuy, manañan hayk'aqpas nisunkikuchu: Hatun suyukunaq Reynan, nispaqa.

⁶Llaqtaypaqmi phiñakurqani, runaykunatan p'enqayman churarqani, qanmanmi hap'ichirqayki, manan qanqa paykunata llakipayarqankichu, yuyaq runakunatapas sinchitapunin muchuchirqanki.

⁷Qanmi nirqanki: Wiñaypaqmi Reynallapuni kasaq, nispa, manan chaykunataqa sonqoykipi yuyaykurqankichu, manallataqmi imayna qhepa kanaykitapas yuyaykurqankichu.

⁸Chayrayku, aycha kusichiq warmi kayta uyariway, qanqa mana manchakuspan tiyashanki, qanmi sonqoykipi nishanki: Ñoqaqa Diosmi kani, ñoqamanta wakqa manan kanñachu. Manan hayk'aqpas viudachu kasaq, manan mana wawakunayoqpaschu kasaq, nispa.

⁹Sinchitaña layqakushaqtiykipas, anchataña paqokushaqtiykipas, huk p'unchayllapin qonqaylla chayamusunki iskay llakikuykuna: Mana qosayoqmi kapunki, mana wawayoqmi kapunki.

¹⁰Millay ruwasqaykimanmi hap'ipakurqanki, nirqankitaqmi: Manan pipas rikuwanchu, nispa. Yachayniykin yuyayniykin pantachirqasunki, sonqoykipin nirqanki: Ñoqaqa Diosmi kani, ñoqamanta wakqa manan kanchu, nispa.

¹¹Qonqayllan hatun llakiqa chayamusunki, layqaykikunaqa manan qolluchiyta atinqachu. Hatun ñak'ariymi chayamusunki, manan chaytaqa pagaspa kutichiyta atinkichu. Mana yachasqayki sinchi muchuymi qonqaylla hap'isunki.

¹²Layqakushallaypuni, anchata paqokushallaypuni, chaykunamanmi wawa kasqaykimantapacha k'askakurqanki. Ichapaschá imallapaqpas allin kasunki, ichapaschá chaykunawan runakunata mancharichiwaq.

¹³Askhallañan yuyaychaqniykikunaqa, sayk'unaykikamaraqmi karqan. Hanaq pacha qhawaqkunaqa kunanyá hamuchunku, paykunan ch'askakunata qhawaspa sapa killa watunku, imachus chayamunasuykimanta qanta qespichichunku.

¹⁴Ichaqa ñut'u paja hinan kanku, ninan paykunata ruphaykunqa, manan paykunaqa ninaq ruphaykunanmanta qespikuyta atinqakuchu, chay ninaqa manan q'oñikunapaqchu, manan chay qayllapi tiyaykunapaqchu.

¹⁵Chay hinan layqaykikunaqa kasunki, chaykunawanmi wawa kasqaykimantapacha sapa kuti watuchirqanki, sapankan musphaspa thampiykachanqa, manan mayqenninkupas qespichiyta atisunkichu, nispa.