Read DIOSPA QHELQACHISQ Quechua ISAÍAS 5 Bible Online

ISAÍAS 5 - DIOSPA QHELQACHISQ Quechua bible

ISAÍAS 5

¹Ancha munasqay amigoypaq takisaq, paypa uvas chakranmantan takisaq: Amigoypa uvas chakranmi allin ruruq qhatapi karqan.

²Paymi hallp'ata chakmarqan, ruminkunata pallarqan, hinaspa allinnin uvas yurata plantarqan. Chay chawpipitaq qhawananpaq torreta sayarichirqan, wakichillarqantaq uvas sarunatapas. Payqa yuyaykurqanmi misk'i uvasta chay chakranmanta hoqariyta, ichaqa p'osqo uvastan chay chakraqa rurusqa.

³Chaymi amigoyqa nin: Jerusalenpi tiyaqkuna, Judá runakuna, qankuna chaninchaychis mayqenmi mana allinchu kayku, ¿uvas chakraychu? Icha, ¿ñoqachu?

⁴¿Imatawantaq uvas chakraypaq ruwayman karqan? ¿Aswan imapas ruwanaytachu mana ruwarqani? Ñoqaqa misk'i uvas rurunantan suyakurqani, ¿imanaqtintaq p'osqo uvastari rururqan?

⁵Chay hinaqa imatachus uvas chakrata ruwayta yuyaykushani chaytan willasqaykichis: Kanchachasqaytan paskarqapusaq t'ustunankupaq, perqantan thunirqosaq sarunankupaq,

⁶purunyachisaqtaqmi. Manan pipas kuchupanqachu, manallataq qorananqapaschu, lliw qorakunan khiskakunan hunt'aykunqa. Phuyutapas kamachisaqmi chay chakraman ama parananpaq, nispa.

⁷Tukuy-atiyniyoq Señor Diospa uvas chakranqa Israel runakunan, paypa q'ochukunan chakraqa Judá suyu runakunan. Payqa chanin ruwaytan maskharqan, ichaqa runa wañuchiyllatan paykunapi tarirqan, cheqaq ruwaytan maskharqan, ichaqa ñak'arichisqakunaq qapariyllantan uyarirqan.

⁸¡Ay, qankunamanta, aswan-aswanta wasikunata rantiqkuna, aswan-aswanta hallp'akunata rantiqkuna! Asneqmanqa manañan pipaqpas campo kapunqañachu, qankunaqa sapallaykichisñan kay suyupi tiyankichis.

⁹Tukuy-atiyniyoq Señor Diosmi juraspa niwan: Hatuchachaq wasikunaqa wikch'usqapunin kanqa, ancha sumaq wasikunapas ch'usaqmi qhepanqa.

¹⁰Chunka masa toroq huk p'unchay uvas chakra llank'asqanmantan huk mak'as vinollata horqonqaku. Chunka arroba trigo muhupas huk arroballatan rurunqa, nispa.

¹¹¡Ay, qankunamanta! ¡Tutallamanta hatarispan machanaman phawarinkichis! Tutakaman qhepakunkichis t'ili machanaykichispaq.

¹²Hatun mikhuyniykichispin askhallaña vinoqa, tocankichistaq arpakunata, tawtinkukunata, tinyakunata, qenakunata ima, Señor Diospa ruwasqantataq ichaqa mana kasurparinkichischu, paypa ruwashasqantaqa manan entiendenkichischu.

¹³Chaymi qankunaqa mana entiendesqaykichisrayku preso apasqa kankichis, llapa umallikunan yarqaymanta wañunkichis, wakintaq ch'akiymanta pisipankichis.

¹⁴Wañuy-pachapas huk phiña animal hinan siminta kicharin mana hayk'aq saksaq hina, llaqtata, umallinkunatawan, q'ochukuykunapi kawsaq runakunatawan oqoykunanpaq.

¹⁵Runakunaqa sinchi huch'uyyachisqan kanqa, hatunchakuqkunapas k'umuykachisqan kanqa.

¹⁶Tukuy-atiyniyoq Señor Diosmi ichaqa chaninchayta ruwaspa hatun-kayninta rikuchinqa, ch'uya Diosqa chaninta ruwaspan ch'uya-kayninta rikuchinqa.

¹⁷Qhapaqkunaq wasin thunisqakunapin cabrakuna mikhunqa, ovejakunapas mikhunanku cheqaspi hinan mikhunqaku.

¹⁸¡Ay, qankunamanta! Waskhawan chutamushaq hinaraqmi huchata apamunkichis, carretata caboyawan aysamushaq hinaraqmi mana chanin kaykunata rikhurichimunkichis.

¹⁹Qankunan ninkichis: Usqhaylla Diosqa ruwananta ruwachun, chayta rikunanchispaq, usqhaylla Israelpa Ch'uya Diosninqa yuyaykusqanta hunt'achun, chayta yachananchispaq, nispa.

²⁰¡Ay, qankunamanta! Mana allintan “allinmi” ninkichis, allintataq “manan allinchu” ninkichis, k'anchaytan laqhayaqman tukuchinkichis, laqhayaqtataq k'anchayman tukuchinkichis, haya kaqtan misk'iman tukuchinkichis, misk'itataq hayaman tukuchinkichis.

²¹¡Ay, qankunamanta! Yachaysapa tukuqkuna, yuyaysapa tukuqkuna.

²²¡Ay, qankunamanta! Machaypi kusa llalliqkuna, trago tupachiypiqa manan pipas atipasunkichischu.

²³Qankunaqa huchayoq runatan lluk'iykusqanrayku “manan huchayoqchu” ninkichis, mana huchayoq runatataq uyarichikusqanta mana kasurparinkichischu.

²⁴Qankunaqa Tukuy-atiyniyoq Señor Diospa kamachikuyninkunatan pisicharqankichis, Israelpa Ch'uya Diosninpa simintan wikch'urqankichis, chaymi ch'aki pajata hina nina ruphasunkichis, ninaq ruphasqan ichhu hinan chinkaykunkichis, ismusqa saphi hinan kankichis, ch'aki t'ika hinan wayraq phukurparisqan kankichis.

²⁵Señor Diosqa llaqtan contran k'arakta phiñakun, paykunata muchuchinanpaqmi sayarin. Orqokunan chhaphchikun, ayakunapas q'opa hinan callekunapi wikch'u-wikch'u qhepan. Chaywanpas paypa k'arak phiñakuyninqa manan thaninchu, aswanpas Señor Diosqa “muchuchisaqmi” nishallanpunin.

²⁶Paymi karupi kashaq suyuta waqyarinanpaq banderata hoqarin, sinchi karupi kashaq llaqtatan payqa silbarin. ¡Paykunaqa wayra hina phawaspan chayarqamushanña!

²⁷Paykuna ukhupiqa manan kanchu pisi kallpapas sayk'usqapas, paykunaqa manan puñunkuchu, puñuywanpas aysachikunkuchu, chumpinkupas allin watasqakaman, usut'ankuq watunpas allinkaman.

²⁸Wach'inankupas allin ñawch'isapakaman, llapan p'eqtankupas allin wakichisqakaman. Caballonkuq chaki phapatunpas ch'ila rumi hinan, carretankuq ruedanpas muyuq wayra hinan.

²⁹Paykunaqa león hinan qaparinku, malta león hinan hiriririnku, mikhunanta hap'ispan qhansapakunku, mikhunanta apashaqtinqa manataqmi pipas qechunmanchu.

³⁰Chay p'unchaymi chay suyuqa Israel contra lamar-qocha hina qaparinqa, pipas qhawashaqtaq hallp'a pachata rikunqa laqhayaywan k'uyuykusqata, hanaq pacha k'anchaypas ati phuyuwan tutayaykushaqta.