Read DIOSPA QHELQACHISQ Quechua ISAÍAS 50 Bible Online

ISAÍAS 50 - DIOSPA QHELQACHISQ Quechua bible

ISAÍAS 50

¹Señor Diosmi nin: ¿Yuyankichischu mamaykichismanta t'aqakusqayta imaynan qhariqa warminmanta t'aqakun hinata? Chay hina kaqtinqa, ¿maytaq t'aqanakusqa qelqari? ¿Yuyankichischu pimanpas manu kaspay kamachipaq qankunata vendesqayta? Manapunin, aswanpas huchallikusqaykichisraykun vendesqa karqankichis, mana kasukusqaykichisraykun mamaykichisqa apachisqa kapurqan.

²¿Imanaqtintaq hamuspayqa mana pitapas tarirqanichu? ¿Imanaqtintaq waqyakuqtiypas mana pipas kutichimuwarqanchu? Chayri, ¿yuyarqankichischu mana kacharichiyta atinaypaq? ¿Manachu kallpayoq kani qespichinaypaq? Kayqa, phiñarispallaymi lamar-qochata ch'akichini, mayukunata ch'inneqman tukuchini, hinan challwakuna mana unu kaqtin asnaripunku, unumanta ch'akichikuspa wañupunku.

³Ñoqan hanaq pachata tutayaykachini, yana p'achawan hina qatani, nispa.

⁴Señor Diosmi allinta yachachiwarqan sayk'usqata simiywan kallpachaspa sonqochanaypaq. Sapa paqarmi maki rikch'achiwan allin yachaqaq hina uyarinaypaq.

⁵Apu Señor Diosmi uyarichiwarqan, manataqmi mana kasukuqchu karqani, manan qhepamanpas kutirirqanichu.

⁶Hinallatan wasaypi waqtachikurqani, hinallatan sunkhayta t'irachikurqani, hinallatan k'amichikurqani, uyaypipas thoqaykachikurqani.

⁷Señor Diosmi yanapaykuwan, chaymi mana k'umuykachisqachu kasaq. Qaqa hinan allintapuni sayani, yachanitaqmi mana p'enqachisqa kanayta.

⁸Qayllallaypin kashan chaninchawaqniy Diosqa. ¿Pin ñoqawan churanakunqa? ¡Kuskalla juezman risun! ¿Pipas huchachawananpaq yuyaykunchu? ¡Asuykamuwachun!

⁹Apu Señor Diosmi yanapaykuwaqniyqa, ¿pin huchachawanman? Llapallankun awqaykunaqa p'acha hina thantakunqaku, thutaq k'utusqan hinan paykunaqa kanqaku.

¹⁰Qankunaqa Señor Diosta manchakuspa kamachinpa siminta kasukuqkuna, uyariychis: Laqhayaqpi purinkichis chaypas, mana ima k'anchaypi kankichis chaypas, Señorman hap'ipakuychis, Diosniykichisman k'askaykukuychis.

¹¹Qankunan ichaqa, nina hap'ichiqkuna, rawrashaq k'anchayta hap'ichiqkuna, chay ninaq k'anchayninpi purinaykichis, rawrachisqaykichispa k'anchayninpi kawsanaykichis. Ñoqa Señor Diosmi kay hinata muchuchisqaykichis: Ñak'arispan wañunkichis.