Read DIOSPA QHELQACHISQ Quechua ISAÍAS 52 Bible Online

ISAÍAS 52 - DIOSPA QHELQACHISQ Quechua bible

ISAÍAS 52

¹Sión llaqta, ¡rikch'ariy! ¡Rikch'ariy! ¡Kallpachakuy! Jerusalén Diospa ch'uya llaqtan, sumaq p'achaykiwan p'achakuy. Manañan haykumusunkikuñachu mana iñiyniyoq runakunapas qhelli runakunapas.

²Jerusalén llaqta, ñut'u hallp'ata chhaphchikuspa sayariy, kamachikuy tiyanaykipi tiyaykuy. Sión llaqtamanta preso apasqakuna, watasqa kasqaykichista paskakuychis.

³Señor Diosmi nin: Mana qolqellapaqmi kamachipaq vendesqa karqankichis, mana qolqellawantaqmi horqokapusqaykichispas, nispa.

⁴Apu Señor Diosqa nillantaqmi: Ñawpa p'unchaykunapin llaqtayqa Egipto suyuman rirqan, hinaspan chaypi tiyamurqan. Qhepatataq Asiria suyu payta muchuchirqan, nispa.

⁵Señor Diosqa nillantaqmi: ¿Imatataq Babiloniapi rikushani? Llaqtayqa mana imamantan chayman preso apasqa kashan, Babilonia umalli runakunan munaychakuspa khuyayta waqachishanku. Tukuy tiempon Babilonia runakunaqa ñoqata k'amishawanku.

⁶Ichaqa qhepa p'unchaymi llaqtayqa reqsiwanqa, hinaspa chaykuna sucedenanta ñawpaqmanta nisqayta reparanqa. Arí, ñoqapunin chaytaqa nini.

⁷Ima munaymi orqo patankunata allin willakuykunata willaq hamushaqta rikuyqa, payqa allin willakuykunatan apamushan, payqa thak-kaypi kawsanankutan willakushan, payqa Diospa qespichiyninmantan willakushan, hinaspan Sión llaqtata nin: ¡Diosniykin kamachikushan! nispa.

⁸¡Uyariy! Llaqta qhawaqniykikunan kunkayoqta qaparinku, kuskallan kusisqa qaparinku, ñawinkuwanpunin rikunku, Señor Diospa Sionman kutimpushasqanta.

⁹Señor Diosmi llaqtanta sonqochan, Jerusalentan kacharichin, chayrayku, Jerusalén raqaykuna, kuskalla kusisqa qapariychis.

¹⁰Señor Diosmi tukuy hatun suyukuna rikushaqtin ch'uya atiyninta rikuchin. Kay teqsimuyuntintaqmi yachanqa Diosninchispa qespichiwasqanchista.

¹¹¡Lloqsiychis, lloqsiychis Babiloniamanta! ¡Ama qhellitapas llamiychischu! Señor Diospa kaqninkunata apaqkuna, Babiloniamanta lloqsiychis, hinaspa ch'uyanchakuychis.

¹²Ichaqa aman phawashaspallachu lloqsinkichis, amataq ayqekushaq hinapaschu ripunkichis, Señor Diosmi ñawpaqeykichista rinqa, Israelpa Diosninmi qhepaykichismantapas waqaychasunkichis.

¹³Señor Diosmi nin: Kamachiyqa allin yachaywanmi ruwanqa, hatunchasqan qhapaqchasqan kanqa, ancha mentasqataq kanqapas.

¹⁴Imaynan paymanta askha utirayarqanku uyanqa sinchi k'irisqapuni kasqanta rikuspa, manaña runa hinañachu kapusqanta rikuspa,

¹⁵chay hinallataqmi hatunchasqata rikuspa askha hatun suyukunapas utirayanqaku. Payta rikuspankun reykunapas upallakunqaku, mana piqpapas willakusqantan rikunqaku, mana hayk'aq uyarisqankutan yachanqaku, nispa.