Read DIOSPA QHELQACHISQ Quechua ISAÍAS 53 Bible Online

ISAÍAS 53 - DIOSPA QHELQACHISQ Quechua bible

ISAÍAS 53

¹Llaqta runakunan nin: ¿Pitaq uyarisqankutaqa iñinman karqan? ¿Pitaq Señor Diospa chay ruwashasqantaqa reparanman karqan?

²Ch'ikchimushaq hinan payqa Diospa ñawpaqenpi wiñarqan, ch'aki hallp'api saphiyoq hinan wiñarqan. Manan allin rikch'ayniyoqpaschu munaypaschu karqan. Manan qhawapayaspa munanapaq hinapaschu karqan,

³runakunaq pisichasqanmi qhawarparisqanmi karqan. Nanaypa ñit'isqan runan karqan, muchuyman yachasqan karqan, manan pipas paytaqa rikuyta munarqanchu, ñoqanchispas pisichaspan hinallata qhawarparirqanchis.

⁴Chaypas paypunin onqoyninchiskunata muchurqan, nanayninchiskunatapas muchurqanpunin. Ñoqanchistaq Diospa ñak'arichisqanpaq yuyarqanchis: Diosmi paytaqa k'irishan k'umuykachishan, nispa.

⁵Paytaq ichaqa mana kasukusqanchiskunamanta k'irisqa karqan, huchanchiskunamanta sinchi muchuchisqa karqan. Diosqa allinninchispaqmi paytaqa ñak'arichirqan, chaymi k'irisqa kasqanwan qhaliyachisqa kanchis.

⁶Llapallanchismi ovejakuna hina ch'eqeripurqanchis, sapankan ñanninkumankama t'aqarikapurqanku, Señor Diostaqmi llapanchispa huchanchismanta payta muchuchirqan.

⁷Payqa muchuchisqan karqan, ichaqa k'umuykukullarqanmi, manan rimarillarqanpaschu. Nak'anapaq apasqa borrego hinan karqan, millman rutuqninpa qayllanpi oveja hinan upallakurqan, manan payqa rimarillarqanpaschu.

⁸Mana chaninninpin hap'isqapas juzgasqapas karqan, manataqmi pipas paymanta llakikurqanchu. Wañuchipurqankun, llaqtaypa huchankunamantan wañuchisqa karqan.

⁹Huchasapakunawanmi p'ampasqa karqan, qhapaqkunawanmi p'ampasqa karqan, chaypas manan hayk'aqpas mana chaninta ruwarqanchu, manan llullakurqanpaschu, nispa.

¹⁰Ichaqa Señor Diosmi payta muchuchiyta munarqan, hinan payqa hucha pampachaypaq sacrificasqa wañurqan. Chaymi mirayninta rikunqa, unaytataq kawsanqa, ñoqa Señor Diospa yuyaykusqaykunatapas paymi hunt'anqa.

¹¹Sinchi muchusqan qhepatan k'anchayta rikunqa, chay hinapin yachanqa mana yanqapaqchu muchusqanta. Chanin kamachiymi askha runaq huchanmanta muchurqan, chaymi payqa paykunata chaninchanqa.

¹²Ñoqaqa allichachaqkuna ukhupin payta hatunchasaq, kallpasapakunawantaq qechusqakunata rakinakunqa. Wañunamanmi paymantakama rirqan, huchasapakuna hinan wañurqan, pay kikinmi askha runaq huchanta q'epirqan, huchasapakunapaqmi ñoqamanta mañakurqan.