Read DIOSPA QHELQACHISQ Quechua ISAÍAS 55 Bible Online

ISAÍAS 55 - DIOSPA QHELQACHISQ Quechua bible

ISAÍAS 55

¹¡Llapa ch'akichikuqkuna, unu ukyaq hamuychis! ¡Mana qolqeyoqkuna hamuychis! Mana qolqellawan trigota rantikuspa mikhuychis. ¡Hamuychis! Mana pagaspalla vinotapas lechetapas ukyaychis.

²¿Imanaqtintaq mana mikhunapi qolqeta tukunkichis? ¿Imanaqtintaq llank'apakusqaykichistapas mana saksachikuqpi tukunkichis? Maki uyariwaychis, chaymi allin mikhunata mikhunkichis, sumaqtapunin kawsankichis.

³Maki uyarimuwaychis, hinaspa asuykamuwaychis, uyarimuwaychis, chay hinapin kawsankichispuni. “Munakushallasqaykichispunin” nispa, Davidman prometesqayman hinan qankunawan wiñaypaq rimanakusaq.

⁴Ñoqan Davidta hatun suyukunata kamachinanpaq umallinanpaq churarqani, paypa kawsayninpin atiyniyta llaqtakunaman rikuchirqani.

⁵Qanpas mana reqsisqayki llaqtakunatan waqyamunki, hinan paykunaqa kamachiykita ruwanankupaq phawamusunkiku, ñoqa Diosniyki Señor Diosmi chayta ruwasaq, Israelpa Ch'uya Diosninmi hatunchasqayki, nispa.

⁶Señor Diosta maskhaychis tarinaraq kashaqtin, payta waqyakuychis qayllallapiraq kashaqtin.

⁷Mana chanin runaqa ñanninta saqepuchun, millay runapas yuyaykusqankunata wikch'upuchun, Señor Diosmantaq kutirikapuchun, paymi payta khuyapayanqa, Diosninchisman kutirikapuchun, payqa pampachaykuytapunin munashan.

⁸Señor Diosmi nin: Yuyayniykunaqa manan yuyayniykichiskuna hinachu, ruwayniykunapas manan ruwayniykichis hinachu.

⁹Imaynan hanaq pachaqa hallp'a pachamanta aswan hatunraq kashan, chay hinan ruwayniykunaqa qankunaqmantaqa aswan hatunraq, yuyayniykunapas qankunaqmantaqa aswan hatunraqmi.

¹⁰Imaynan hanaqmanta paramunpas rit'imunpas, manataq hanaqman kutipunchu, aswanpas hallp'ata qarpan, hinaspa chayta phutuchin wiñachin, tarpuqpaqpas muhuta ruruchin, mikhuqpaqpas mikhunata poqochin,

¹¹chay hinan rimasqay simiyqa manan hinallachu kutimuwanqa, aswanpas imachus munasqaytan ruwanqa, hinaspan kamachisqayta llapantapuni hunt'anqa.

¹²Babiloniamantaqa kusisqan lloqsipunkichis, mana imanasqallan chaymanta pusasqa kankichis. Orqokunapas moqokunapas ñawpaqeykichispin takiyta qallarinqaku, campopi llapa sach'akunapas t'aqllakunqakun.

¹³T'ankarpa wiñanantan ciprés wiñanqa, kisaq wiñanantan arrayán wiñanqa. Kaymi wiñaypaq señal kanqa, Señor Diospa ruwasqan mana qonqasqa kananpaq, nispa.