Read DIOSPA QHELQACHISQ Quechua ISAÍAS 56 Bible Online

ISAÍAS 56 - DIOSPA QHELQACHISQ Quechua bible

ISAÍAS 56

¹Señor Diosmi nin: Chaninkaqta ruwaychis, chaninta kawsaychis, usqhaymanñan qespichisaq, hamushaniñan kacharichinaypaq.

²Kusisamiyoqmi chayta ruwaq runaqa. Paychus samana p'unchayta mana sarunchaspa waqaychan, manataq ima mana allintapas ruwanchu chayqa, ñoqan payta saminchasaq.

³Señor Diosman hap'ipakuq wak llaqtayoqpas ama nichunchu: Señor Diosmi llaqtanmanta t'aqarpariwanqa, nispaqa. Ama kapasqa runapas nichunchu: Ñoqaqa ch'akisqa mallki hinan kapuni, nispaqa.

⁴Kapasqa runakunachus samana p'unchayniykunata waqaychanku, imachus munasqaytapas hunt'anku, rimanakusqayman hinachus kawsanku chayqa,

⁵ñoqan yupaychana wasiypipas churasaq sutinkuwan qelqasqa saywa rumita, chaymi paykunaqa wawayoqkunamantapas aswan yuyarisqaraq kanqaku, paykunaqa mana hayk'aq chinkaq sutiyoqmi kanqaku.

⁶Wak llaqtayoqkunachus qatikamuwankuman ñoqa Señor Diosta serviwanankupaq, munakuwaspankuchus yupaychawankuman, samana p'unchaytapas mana sarunchaspa waqaychankuman, rimanakusqayman hinachus kawsankuman chayqa,

⁷ñoqan paykunataqa ch'uya orqoyman pusamusaq, hinaspan mañakuna wasiypi paykunata kusichisaq. Altarniy patapi ruphachisqa sacrificionkunatapas, wak sacrificionkunatapas chaskisaqmi, wasiyqa “llapa llaqtakunaq mañakunan wasi” nisqan kanqa.

⁸Ñoqan Apu Señor Diosqa kani, Israel suyumanta ch'eqerisqakunata huñuykamuqmi kani, huñuykamusqay runakunamantapas astawanraqmi huk suyukunamantapas huñuykamusaq, nispa.

⁹Salqa phiña animalkuna, hamuychis, monte llapa animalkuna, paykunata mikhurqoq hamuychis.

¹⁰Israelta qhawaq umallikunaqa ñawsakaman kanku, manan imatapas yachankuchu, llapallankun upa alqokuna hina kanku, manan kanikuyta atinkuchu, paykunaqa chutarayaspan mosqokushanku, puñuylla-puñuqkunan kanku.

¹¹Paykunaqa rakrapu alqokuna hinan mana saksankuchu, michiqkuna kaspapas manan imatapas yachankuchu, sapankan ima munasqankuta kawsanku, sapankan allinnillankuta maskhanku.

¹²Paykunan ninku: Haku, vinota ukyamusun, haku machachikuq ukyanawan machamusun, paqarinpas kay p'unchay hinallataqmi kanqa, aswan allinraqchá kanqapas, nispa.