Read DIOSPA QHELQACHISQ Quechua ISAÍAS 58 Bible Online

ISAÍAS 58 - DIOSPA QHELQACHISQ Quechua bible

ISAÍAS 58

¹Señor Diosmi niwarqan: Kunkayoqta qapariy, ama upallakuychu, trompetaq waqasqanta hina qapariy, mana kasukusqanta llaqtayman willay, huchankunamanta Jacobpa mirayninta anyay.

²Paykunan sapa p'unchay yupaychayta munawanku, munayniyman hinan kawsayta munanku chaninkaqta ruwaq runakuna hina, Diosninkuq kamachikusqan simita kasuqkuna hinapuni. Chaninta kawsanankupaqmi tapukuwanku, yupaychaytan munawanku.

³Paykunan niwanku: ¿Imapaqmi ayunayku, manataq rikunkichu chayqa? ¿Imapaqmi k'umuykukuyku, manataq reparankichu chayqa? nispa. Ñoqataq paykunaman kutichini: Ayunasqaykichis p'unchaypin ima munasqaykichista ruwankichis, qankunaqa llapa llank'aqniykichistapas astawanraqmi llank'achinkichis.

⁴Ayunayniykichistaqa ch'aqwaspan maqanakuspan tukunkichis, mana chanintan saqmanakunkichis. Qankunachus chay hinata ayunankichis chayqa, manan mañakusqaykichista uyarimusqaykichischu.

⁵Ayunaspaykichisqa qankuna kikillaykichistan muchuchikunkichis, t'otora hinan k'umurayankichis, qhasqa p'achawan churaykusqan uspha patapi siriykunkichis. ¿Chaychu ayunoqa qankunapaq? ¿Chaywanqa ñoqa kusikushanichu? ¡Manan!

⁶Aswanpas kay hinatan ayunanaykichistaqa munani: Qankunaqa mana chaninpi watasqaykichiskunatan kacharipunaykichis, manañan runata mat'inaykichischu, ñak'arichisqakunatan kacharipunaykichis, manañan pitapas muchuchinaykichischu,

⁷yarqasqamanmi mikhunata haywarinaykichis, mana wasiyoq wakchakunatapas wasiykichispin qorpachanaykichis, mana p'achayoqta rikushaspaykichispas p'achachinaykichismi, wawqeykichiskunatapas yanapaykunaykichismi.

⁸Chay hinata ruwaqtiykichismi, pacha illariy inti hina k'anchaykamusunkichis, k'iriykichispas usqhayllan qhaliyanqa. Chay chanin ruwasqaykichismi ñawpaqeykichista rinqa, atiyniywantaq qhepaykichismanta waqaychasqaykichis.

⁹Chaypacha waqyakamuwaqtiykichismi, ñoqa kutichimusqaykichis, yanapaykunaypaq qaparimuqtiykichismi: Uyarishaykichismi, nispa nimusqaykichis. Manachus pitapas astawan mat'inkichis chayqa, manachus pitapas ima nispapas manchachinkichis chayqa, manachus pimantapas ima millaytapas rimankichis chayqa,

¹⁰mikhunaykichistapas yarqasqamanchus haywarinkichis chayqa, llakisqa runatachus allintapuni yanapaykunkichis chayqa, muyuriqniykichis laqhapin k'anchayqa k'anchaykusunkichis, laqhayaqniykichispas chawpi p'unchay k'anchay hinan kanqa.

¹¹Ñoqa Señor Diosqa pusallasqaykichispunin, ch'inneqkunapin saksata mikhuchisqaykichis, cuerpoykichistan kallpachasqaykichis. Hinan allin qarpasqa huerta hina kankichis, mana ch'akiq pukyu hinan kankichis.

¹²Mirayniykin ñawpa raqaykunata wakmanta perqanqaku, ñawpa p'unchaykunapi perqasqa teqsikuna patapin perqanqaku. Qankunamantan ninqaku: Q'asakunatan allicharqanku, wasikunayoq callekunatan wakmanta ruwarqanku, nispa.

¹³Ama samana p'unchayta pisichaychischu, ama ch'uya p'unchayniypi llank'aychischu. Samana p'unchayta kusikuna p'unchaypaq qhawariychis, ch'uya p'unchayniyta allinpaq hap'iychis. Chayta allinta rikuychis, ama ima ruwanaykichiskunamanpas sonqollikuspaykichis, ama llank'aspaykichis, ama yanqakunata rimaspaykichis.

¹⁴Chay hinatachus ruwankichis chayqa, serviwaspaykichismi kusikunkichis, ñoqataq sumaqtapuni pusasqaykichis, hinan qankunaqa taytaykichis Jacobman qosqan suyupi kusikunkichis, nispa. Señor Diosmi chayta nin.