Read DIOSPA QHELQACHISQ Quechua ISAÍAS 61 Bible Online

ISAÍAS 61 - DIOSPA QHELQACHISQ Quechua bible

ISAÍAS 61

¹Apu Señor Diospa Espiritunmi hunt'aykushawan, paymi akllakuwaspa hawiwarqan wakchakunaman allin willakuykunata willanaypaq. Kachamuwarqanmi llakisqa sonqoyoqkunata kusirichinaypaq, presokunaman kacharisqa kanankuta willanaypaq, carcelpi kaqkunaman lloqsipunankuta willanaypaq.

²Kachamuwarqanmi llaqtanta khuyapayanan p'unchay chayamunanta willanaypaq, awqanchiskunaman paypa ayni-kutichinan p'unchay hamunantawan willanaypaq. Kachamullawarqantaqmi lutopi kaqkunata sonqochanaypaq,

³Sionpi tiyaq llakikuymanta lutokuspa usphawan hach'ikunanmantaqa sumaq coronata qonaypaq, waqaymantaqa q'ochukuyta qonaypaq, unphuyaymantaqa yupaychayta takichinaypaq. Paykunaqa Señor Diospa mallkisqan encina sach'a hinan kanqaku, chanintapunin kawsanqaku, Señor Diostan hatunchanqaku.

⁴Paykunan ñawpa raqaykunata wakmanta perqanqaku, ñawpa thunisqakunatan wakmanta sayarichinqaku, unayña thunisqa llaqtakunatan wakmanta hatarichinqaku.

⁵Wak llaqtayoqkunan ovejaykichista michipusunkichis, wak runakunan chakraykichista llank'apusunkichis, uvasniykichistapas pallapusunkichis.

⁶Qankunataq “Señor Diospa sacerdotenkuna” nisqa kankichis, “Diosninchista serviqkuna” nisqa kankichis. Hatun suyukunaq kaqninkunatan usachinkichis, qhapaq kayninkun qankunaq kapunqa.

⁷Qankunaqa manañan p'enqachisqachu k'umuykachisqapaschu kankichis, aswanpas suyuykichistan hap'ikapunkichis, chaypin ancha askha kaqniyoq kankichis, wiñaypaqtaqmi q'ochukunkichispas.

⁸Señor Diosmi nin: Ñoqaqa chanin-kaytan munakuni, suwakuytapas mana chanin ruwaytapas cheqnikunin. Hunt'aq kaspaymi paykunaman premiota qosaq, paykunawanmi wiñaypaq rimanakusaq.

⁹Mirayninkupas hatun suyukuna ukhupin mentasqa kanqa, wawankupas llaqtakuna ukhupin reqsisqa kanqa. Llapa paykunata rikuqkunan reparanqaku ñoqa Señor Diosqa paykunata saminchasqayta, nispa.

¹⁰Anchatapunin Señor Diospa ruwasqan hawa q'ochukuni, sinchitapunin Diosniypa yanapawasqanmanta kusikuni, payqa qespichiwarqanmi, ñoqawanmi atipachirqan, uma k'uyunantin noviota hinan p'achachiwarqan, munay illakunawan sumaqchasqa noviata hinan p'achachiwarqan.

¹¹Imaynan chakra yurakunaqa phutumun, imaynan huertapipas muhuqa wiñamun, chhaynatan Apu Señor Diosqa hatun suyukunaq rikushasqan chanin-kayta yupaychayta phutuchimunqa.