Read DIOSPA QHELQACHISQ Quechua ISAÍAS 62 Bible Online

ISAÍAS 62 - DIOSPA QHELQACHISQ Quechua bible

ISAÍAS 62

¹Sión llaqtaraykun mana upallakusaqchu, Jerusalén llaqtaraykun mana ch'inyakusaqchu, pacha illarimuy hina chaninchasqa kasqan k'anchanankama, qespichisqa kasqanpas tutapi k'anchay hina rawranankama.

²Jerusalenlláy, hatun suyukunapas chaninchasqa kasqaykitan rikunqaku, llapa reykunapas hatunchasqa kasqaykitan rikunqaku. Kikin Señor Diosmi mosoq sutiwan sutichasunki,

³Señor Diospa makinpin munayllaña corona hina kanki, Diosniykiq makinpin reypa churakunan corona hina kanki.

⁴Manañan “Qosaq Wikch'usqan” nisqachu kanki, manañan hallp'aykipas “purunyachisqa” nisqachu kanqa, aswanmi “Ancha munakusqay” nisqa kanki, hallp'aykipas “Casarasqa Warmi” nisqan kanqa. Qanwanmi Señor Diosqa kusikunqa, payqa qosa hinan hallp'aykipaq kanqa.

⁵Imaynan waynapas doncella sipaswan casarakun, chay hinatan churiykikunaqa qanta hap'ikapusunki, imaynan qosapas warminwan kusikun, chay hinatan Diosniykiqa qanwan kusikunqa.

⁶Jerusalenlláy, perqaykikuna patapin qhawaqkunata churarqani, paykunaqa tutapas p'unchaypas manapunin upallakunqakuchu. Prometekusqanmanta Señor Diosta yuyarichiqkuna ama sayk'uychischu.

⁷Aman Diosta samachinkichischu Jerusalenta wakmanta perqanankama, Jerusalenta teqsimuyuntinwan yupaychachinankama.

⁸Señor Diosmi hunt'ananpaq jurarqan, atiyninwanmi kayta hunt'anqa: Manan hayk'aqpas trigoykitaqa awqaykikunawan mikhuchisaqchu, manan llank'asqayki vinotapas wak llaqta runakunawan ukyachisaqchu,

⁹aswanpas qankuna cosechaqkunan chaytaqa mikhunkichis, hinaspan ñoqata yupaychawankichis, uvastapas pallankichismi, hinaspan ch'uya wasiy patiokunapi chay vinota ukyankichis, nispa.

¹⁰Jerusalenpi tiyaqkuna, punkunkunata lloqsiychis, ñanta llaqtaypaq wakichiychis, hatun ñanta allichaychis, rumikunata pallaychis, llaqtakunapaq banderata sayachiychis.

¹¹Señor Diosmi kay pachantinman willan: Sionpa ususinta niychis: ¡Qhawariy! Qespichiqniykin premio aparisqa hamushan, ¡Qhawariy! Horqokampusqan llaqtanwanmi hamushan, nispa.

¹²Paykunatan “Ch'uya Llaqta” ninqaku, “Señor Diospa Qespichimusqankuna” ninqaku, Jerusalentataqmi “Diospa Munakusqan Llaqta” ninqaku, “Manañan Wikch'upusqa Llaqta” ninqakuchu.