Read DIOSPA QHELQACHISQ Quechua ISAÍAS 63 Bible Online

ISAÍAS 63 - DIOSPA QHELQACHISQ Quechua bible

ISAÍAS 63

¹¿Pin kay, Edom suyumanta hamuq? ¿Pin kay, Bosra llaqtamanta puka p'achayoq hamuq? ¿Pin kay, sumaq p'achaykusqa hamuq? ¿Pin kay, qharillaña thaskimuq? Ñoqa Señor Diosmi kani, qespichinaypaq atiyniyoqmi kani, atipasqaytan willakuni.

²¿Imanaqtintaq p'achaykiri pukachasqa kashan? ¿Imanaqtintaq uvas saruqpa p'achan hina p'achaykiri pukallaña kashan?

³Ñoqallan uvas sarunapi sarurqani, manan hatun suyukunamanta pipas yanapawarqanchu. K'arakta phiñakuspan awqaykunata sarurqani, k'arakta phiñakuspan paykunata t'usturqani, yawarninkun p'achayman ch'allaykuwarqan, llapa p'achaytan pukachaykukurqani.

⁴Ñoqan yuyaykukurqani awqaykunata muchuchinaypaq, llaqtayta kacharichinay p'unchaymi chayamunña.

⁵Allintan qhawarirqani, manan pipas yanapaykuwaqniy karqanchu, mana yanapaykuwaqniy kaqtinmi utirayarqani, chaymi makiyqa atipachiwarqan, k'arakta phiñakuspan kallpachakurqani.

⁶K'arakta phiñakuspan hatun suyukunata t'usturqani, k'arak phiñakuyniywanmi paykunata machachirqani, hinaspan yawarninkuta pampaman hich'arqani.

⁷Señor Diospa khuyakuyninmantan willakusaq, tukuy imaymanata ruwapuwasqanchismantan payta yupaychasaq, Israel runakunata anchatapuni munakuspanmi khuyapayaspanmi paykunapaq sumaq sonqonwan tukuy imaymanata ruwarqan.

⁸Paymi nirqan: Paykunaqa llaqtaypunin kanku, manan paykunaqa saqerpariwanqakuchu, nispa. Chaymi payqa tukuy llaki-phutiyninkumanta qespichirqan,

⁹manan kachapurichu manataq angelchu paykunataqa qespichirqan, aswanpas Dios kikinmi paykunataqa qespichirqan. Munakuspanmi khuyakuspanmi paykunata kacharichirqan, may unaymantañan sapa p'unchay paykunata marq'ayninpi qespichirqan.

¹⁰Paykunataq ichaqa pay contra sayarirqanku, Santo Espirituntan phiñachirqanku, chaymi Señor Diosqa awqanku kapurqan, pay kikinmi paykuna contra maqanakurqan.

¹¹Ichaqa ñawpa p'unchaykunatan yuyarirqanku, Moisespapas runakunaqpas kawsasqan p'unchaykunatan yuyarirqanku, chaymi tapukurqanku: ¿Maytaq lamar-qochamanta paykunata horqomuq Diosri? ¿Maytaq runakunatawan umallikunatawan horqomuqri? ¿Maytaq Moisesman Santo Espiritunta churaqri?

¹²¿Maytaq hatun atiyninwan Moisesta pusamuqri? ¿Maytaq wiñaypaq mentasqa kananpaq unuta ñawpaqenkupi iskayman t'aqaspa

¹³unu ukhunta paykunata chimpachiqri? Imaynan caballoqa ch'in cheqasninta purin, chay hinatan paykunaqa mana misk'akuspalla purirqanku.

¹⁴Imaynan wakakunaqa q'omer wayq'oman uraykun, chay hinatan Señor Diospa Espiritunqa samarinaman paykunata pusarqan. Diosnillayku, chay hinatan llaqtaykita pusarqanki, ahinapin sutiykiqa ancha hatunchasqa karqan, nispa.

¹⁵Señor Diosnillayku, hanaq pachamanta qhawarimuwayku, ch'uya qhapaq tiyanaykimanta qhawarimuwayku, ¿Manañachu ancha sienteywan munakuwankiku? ¿Maytaq atiyniykiri? ¿Manañachu ñoqaykupaq sonqoyki ch'allaq nin? ¿Manañachu ñoqaykuta khuyapayawankiku?

¹⁶Qanqa taytaykun kanki, Abrahamña mana yuyariwankuchu chaypas, Israelña mana reqsiwankuchu chaypas, Señor Diosnillayku, qanmi taytaykuqa kanki, maypachamantapas kacharichiqniykun kanki.

¹⁷Señor Diosnillayku, ¿imanaqtintaq ñanniykikunamanta pantaqta hinallata qhawawankiku? ¿Imanaqtintaq qanta mana manchakunaykupaq sonqoykutapas rumiyaykachinki? Kamachiyki kasqaykurayku kutirimpuwayku, llaqtayki kasqaykurayku hampuwayku.

¹⁸Pisi tiempollan awqaykuqa ch'uya llaqtaykita munaychakuwarqanku, paykunan ch'uya wasiykita sarunchakurqanku.

¹⁹Mana hayk'aq kamachisqaykikuna hinan kapushayku, manapas hayk'aq llaqtaykichu kaykuman karqan hinan kapushayku.