Read DIOSPA QHELQACHISQ Quechua ISAÍAS 66 Bible Online

ISAÍAS 66 - DIOSPA QHELQACHISQ Quechua bible

ISAÍAS 66

¹Señor Diosmi nin: Hanaq pachan kamachikuy tiyanay, hallp'a pachataq chakiypa samanan. Chhaynaqa, ¿imayna wasitan perqapuwankichis? ¿Mayneqpitaq samakuyman?

²Ñoqan hinantin pachakunata ruwarqani, chaymi tukuy chaykunaqa paqarirqan. Ñoqaqa sumaqtan qhawarini k'umuykukuq, huch'uyyaykukuq, simiytapas manchakuq runataqa.

³Ichaqa llaqtay runakunan munaynillankuta akllakurqanku. Toro sacrificiotan haywanku, runatapas sacrificanankupaq wañuchillankutaqmi, ovejatapas sacrificankun, alqotapas mikhunankupaq sipillankutaqmi, ruru ofrendatapas haywankun, khuchi yawartapas haywallankutaqmi, inciensotapas q'apachinkun, idolotapas yupaychallankutaqmi, tukuy chay millaykunawanmi kusikunkupas.

⁴Chaymi ñoqapas paykunamanqa sinchi muchunata chayachimusaq, imatachus manchapakusqankutan paykunaman chayachimusaq. Waqyakurqanin, manataq pipas kutichimuwarqanchu, rimarqanin, manataq uyariwarqankuchu, aswanpas mana chanintan ruwarqanku, millakusqaytan akllakurqanku, nispa.

⁵Señor Diospa siminta manchakuqkuna, payta uyariychis. Paymi nisunkichis: Llaqta-masiykichismi cheqnikusunkichis, ñoqaman sonqollikusqaykichisraykun qarqosunkichis, hinaspa asipayaspa nisunkichis: Lliphlli-kayninta Señor Diosqa rikuchichun, kusikusqaykichista rikunaykupaq, nispanku. Ichaqa p'enqachisqan paykunaqa kanqaku, nispa.

⁶¡Uyariychis! ¡Llaqtan qaparkachamushan! ¡Uyariychis! ¡Diospa wasinpin warararay kashan! Señor Diospa awqankunata muchuchisqanmi chayqa.

⁷Señor Diosmi nin: Sión llaqtaqa manaraq nanaywan hap'ichikushaspan wachakurqan, nanaypas manaraq hap'ishaqtinmi qhari wawata wachakurqan.

⁸¿Pitaq chay hinata uyarirqan? ¿Pitaq chay hinata rikurqan? ¿Huk p'unchayllapichu hatun suyuqa paqarin? Sión llaqtaqa nanay hap'iqtinmi wawankunata wachakurqan.

⁹Ñoqataq wachakunanpaq cuerponta kichani chayqa, ¿manachu nacechiyman? Ñoqa nacechishaspayqa, ¿cuerponta mat'irqoymanchu? nispa.

¹⁰Jerusalenta llapa munakuqkuna, paywan kusikuychis, paymanta q'ochukuychis, Jerusalenpaq llapa waqaqkuna, paywan kuska anchata kusikuychis.

¹¹Paytaqmi mama hina luyluspa uywasunkichis sonqopas-sonqo kanaykichiskama, ñuñunkichismi hinaspan qhapaq kayninwan kusikunkichis.

¹²Señor Diosmi nin: Ñoqaqa mayuta hinan Jerusalenpi sumaq kawsayta mast'arisaq, hatun suyukunaq qhapaq kaynintapas Jerusalenpi mayuta hinan llimp'arichisaq. Jerusalenmi qankunata uywasunkichis, makinpin marq'amusunkichis, moqon patapin luylusunkichis.

¹³Imaynan mamaqa wawanta sonqochan, chay hinatan ñoqaqa qankunata sonqochasqaykichis, Jerusalenpin sonqochasqa kankichis, nispa.

¹⁴Chayta rikuqtiykichismi sonqoykichis kusikunqa, cuerpoykichispas q'achu hinan llanllarinqa. Señor Diosqa kamachinkunamanmi atiyninta rikuchinqa, awqankunapaqtaqmi k'arakta phiñakunqa.

¹⁵Señor Diosqa nina ukhupin chayamun, carretankunapas muyuq wayra hinan, k'arak phiñakuynintan sinchita phiñakuspa chayachinqa, rawrashaq ninawanmi muchuchinqa.

¹⁶Señor Diosqa ninawanmi juzganqa, espadanwanmi llapa runata taripanqa, askhatan wañuchinqa.

¹⁷Señor Diosmi nin: Wakin runakunan ch'uyanchakunku maqchikunku wak'a dioskunata yupaychana huertakunaman haykunankupaq. Chaykunapin chawpinkupi sayaykuq runa imaynatachus ruwasqanta hina ruwanku, chhaynatan mikhunku khuchi aychatapas, huk'ucha aychatapas, wak qhelli animalkunaq aychantapas. Ichaqa qonqayllan huk-nisqalla wañuchisqa kanqaku.

¹⁸Ñoqan yachani ruwasqankutapas yuyayninkutapas, chaymi ñoqaqa hamushani llapa llaqtakunatapas hatun suyukunatapas huñuykamunaypaq. Paykunan hamunqaku hinaspan qhapaq-atiyninta rikunqaku.

¹⁹Paykunapaqqa señaltan churasaq, hinaspan wakinninku puchuqta kachasaq kay suyukunaman: España suyuman, Libia suyuman, allin wach'iq runayoq Lidia suyuman, Tubal suyuman, Grecia suyuman. Kachallasaqtaqmi lamar-qocha patapi kaq karu suyukunamanpas, paykunaqa manan ñoqamanta uyariwarqankuchu, manan qhapaq-atiyninmantapas imatapas yachankuchu. Chay kachasqaykunaqa paykunamanmi qhapaq-atiyninmanta willamunqaku.

²⁰Hinan lliw suyukuna ukhumanta llapa llaqta-masiykichista Jerusalenman pusamunqaku caballokunapi, carretakunapi, toldoyoq carretakunapi, mulakunapi, camellokunapi ima. Paykunan Jerusalenpi ch'uya orqoyman ñoqapaq ofrenda hina pusasqa kanqaku, imaynan Israel runakunaqa wasiyman ch'uya haywanakunapi ofrendakunata apamunku hina.

²¹Paykunamantan wakinninkuta akllasaq sacerdotekunata Leví runakunata wasiypi serviq kanankupaq, nispa.

²²Señor Diosqa nillantaqmi: Ñoqan mosoq hanaq pachatapas mosoq hallp'a pachatapas kamasaq, chaykunan ñawpaqeypi wiñaypaq kashallanqapuni, chay hinan mirayniykichispas sutiykichispas kashallanqapuni.

²³Sapa killan, mosoq killa p'unchaypi, sapa semanan samana p'unchaypi, tukuy runa ñawpaqeypi k'umuykukuq hamunqaku.

²⁴Yupaychasqanku qhepata lloqsispankun ñoqa contra sayariqkunaq ayanta rikunqaku. Mikhuqninku kuruqa manapunin wañunqachu, ruphaqninku ninapas manapunin wañunqachu. Tukuy runapaqmi ancha millakuy kanqaku, nispa.