Read DIOSPA QHELQACHISQ Quechua LEVÍTICO 11 Bible Online

LEVÍTICO 11 - DIOSPA QHELQACHISQ Quechua bible

LEVÍTICO 11

¹Señor Diosmi Moisestawan Aarontawan nirqan:

²— Israel runakunata nimuychis: Campo animalkunamantaqa mikhuwaqchismi mayqenpas,

³p'alqa phapatuyoq kutirpakuqkunata[3]

⁴Camelloqa mana mikhunan qankunapaq kanqa, kutirpakuqmi ichaqa manan p'alqa phapatuyoqchu.

⁵Aman mikhunkichischu k'ita qowita, kutirpakunmi ichaqa manan p'alqa phapatuyoqchu, chayqa mana mikhuna qhellin qankunapaqqa kanqa.

⁶Aman mikhunkichischu wisk'achata, kutirpakunmi ichaqa manan p'alqa phapatuyoqchu, chayqa mana mikhuna qhellin qankunapaqqa kanqa.

⁷Aman mikhunkichischu khuchita, p'alqa phapatuyoqmi ichaqa manan kutirpakunchu, chayqa mana mikhuna qhellin qankunapaqqa kanqa.

⁸Aman chay animalkunaq aychantaqa mikhunkichischu, amallataq chaykuna wañusqatapas llamiykunkichischu. Chaykunaqa mana mikhuna qhellin qankunapaqqa kanqa.

⁹Lamar-qochapipas mayukunapipas tiyaq animalkunataqa pharpayoqkunatan sarphayoqkunatan mikhunkichis.

¹⁰Ichaqa lamar-qochapipas mayukunapipas mana pharpayoq mana sarphayoq animalkunataqa millakunkichismi.

¹¹Aman chay animalkunaq aychantaqa mikhunkichischu, chay wañusqakunatapas millakunkichismi.

¹²Unupi kaq tukuy mana pharpayoqkunataqa mana sarphayoqkunataqa millakunkichismi.

¹³Phalaq animalkunataqa kaykunatan millakuspa ama mikhunkichischu: ankata, kunturta, qocha ankata,

¹⁴k'illinchata, tukuy t'aqa ankata,

¹⁵tukuy t'aqa alqamarita,

¹⁶surita[4], ch'useqta, tukuy t'aqa wamanta,

¹⁷hukuta, cormoranta, pikpirita, qellwata,

¹⁸cisneta, pelicanota, suweq'arata,

¹⁹cigüeñata, tukuy t'aqa waqarta, abubillata, masu huk'uchata ima.

²⁰Tawa chakiwan puriq raphrayoq llapa kurutaqa millakunkichismi.

²¹Chaywanpas tawa chakiwan puriq raphrayoq llapa kurutaqa mikhuwaqchismi, ichaqa chakinkunamanta moqoyoqmi kanan chaykunawan t'iwkananpaq.

²²Mikhuwaqchismi tukuy t'aqa langostata, tukuy t'aqa ch'illikuta, tukuy t'aqa t'isku-t'iskutapas.

²³Wakin raphrayoq tawa chakiyoq kurutaqa millakunkichismi.

²⁴Pipas wañusqa cuerpota llamiykuqqa ch'isinkaman qhelli kanqa

²⁵Pipas chaykunaq wañusqa cuerponta hoqariqpas p'achankunatan t'aqsanqa, ch'isinkamataq qhelli kanqa.

²⁶Llapa mana p'alqa phapatuyoq, mana kutirpakuq animalqa qhellin qankunapaqqa kanqa, chaykuna llamiykuqpas qhellin kanqa.

²⁷Tawa chakiyoq animalkunamantaqa chaki plantan sillowan puriq animalmantapas qhellin kanqa, pipas wañusqa cuerpota llamiykuqqa qhellin ch'isinkama kanqa.

²⁸Pipas chay wañusqa cuerpota hoqariqqa p'achantan t'aqsakunqa, ch'isinkamataq qhelli kanqa. Chay animalkunaqa qankunapaqqa qhellin kanqa.

²⁹Pampanta puriq huch'uy animalkunaqa kaykunan qankunapaq mana mikhuna kanqa: achuqalla, huk'ucha, tukuy t'aqa qaraywakuna.

³⁰Hinallataq erizo, cocodrilo, camaleonkunapas.

³¹Chay animalkunan qankunapaqqa mana mikhuna kanqa, pipas chay wañusqakunata tupaykuqqa ch'isinkaman qhelli kanqa.

³²Ima patamanpas chay wañusqakuna urmaykunqa chayqa, qhellin chayqa kanqa, k'ullupas, p'achapas, qarapas, costalpas, ima ruwanapiwanpas. Unuman chapusqan kanqa, ch'isinkamataq qhelli qhepanqa, chaymantañan ch'uya kapunqa.

³³Chay huknin wañusqachus ima t'uru mankamanpas urmaykunqa chayqa, chay ukhupi kaqkunantinmi qhelli kanqa, mankatapas p'akipunkichismi.

³⁴Chay mankapi unu ima mikhunamanpas hich'aykukunqa chayqa, chay mikhunaqa qhellin kanqa. Ima ukyanapas chay mankapi kaqqa qhellin kanqa.

³⁵Chay wañusqakuna ima patamanpas urmaykuspaqa qhellichanqan. Hornotapas q'onchatapas thuninkichismi, qhellin chaykunaqa qankunapaqqa kanqa.

³⁶Unu pukyuwan p'uytullawanmi ichaqa ch'uyallapuni kashanqa, aswanpas chay wañusqakunata tupaykuqqa qhellin kanqa.

³⁷Chay animalkunamanta mayqen wañusqapas urmaykunqa tarpunapaq kaq ima muhumanpas chayqa, manan qhellichasqachu kanqa.

³⁸Chay mayqen wañusqapas chullusqa muhuman urmaykunqa chayqa, qankunapaqqa chay muhuqa qhellin kanqa.

³⁹Mikhunaykichis ima animalpas wañunqa chayqa, chay wañusqata tupaykuqqa ch'isinkaman qhelli kanqa.

⁴⁰Pipas chay wañusqa aychata mikhuqpas hoqariqpas p'achankunatan t'aqsakunqa, ch'isinkamataq qhelli kanqa.

⁴¹Pampanta suchuq llapa huch'uy animalqa qhellin, aman mikhunkichischu.

⁴²Hinallataq qhasqonwan suchuqtapas, tawa chakinwan puriqtapas, askha chakiwan puriqtapas, aman mikhunkichischu, chaykunaqa qhellin.

⁴³Ama chay animalkunawanqa map'achakuychischu qhellichakuychischu, amataq chaykunawanqa qhellichachikuychischu.

⁴⁴Ñoqan Diosniykichis Señor Dios kani, qankunaqa ñoqapaq t'aqasqa kaychis, ch'uya kaychis ñoqa ch'uya kasqayrayku. Ama pampanta suchuq mayqen animalwanpas qhellichakuychischu.

⁴⁵Ñoqan Señor Diosqa kani, Diosniykichis kanaypaqmi Egipto suyumanta horqomurqaykichis. Ch'uya kaychis ñoqa ch'uya kasqayrayku.

⁴⁶Chaykunan uywakunamanta kamachisqa simiqa, hinallataq phalaq animalkunamantapas, unupi kaq llapa kawsaqkunamantapas, pampanta puriq llapa huch'uy animalmantapas.

⁴⁷Qankunaqa reqsinaykichismi qhellikaqtawan mana qhellikaqtawan, mikhuna animalkunatapas mana mikhuna animalkunatapas, nispa.