Read DIOSPA QHELQACHISQ Quechua LEVÍTICO 13 Bible Online

LEVÍTICO 13 - DIOSPA QHELQACHISQ Quechua bible

LEVÍTICO 13

¹Señor Diosmi Moisestawan Aarontawan nirqan:

²— Piqpa aychanpipas punkisqapas, pukayasqapas, k'anchashaqpas kanqa, lepra onqoyman rikch'akuq ima llagapas kanman chayqa, sacerdote Aaronmanpas churinmanpas pusasqan kanqa.

³Sacerdotetaq aycha qaranpi llagata qhawanqa, hinaspa llagaq kasqanpi suphu yuraqyasqata llagapas aswan ukhuman haykusqanta tarinqa chayqa, lepra onqoymi. Sacerdoten chayta allinta qhawaspaña chay runata qhelli kasqanta sut'inchanqa.

⁴Chay k'anchashaq cheqaschus yuraq kanqa, manataq aswan ukhumanchu haykunqa, suphupas manataq yuraqyanqachu chayqa, sacerdoten chay onqoyniyoq runata qanchis p'unchayta wisq'anqa.

⁵Qanchiskaq p'unchaypitaqmi sacerdoteqa qhawanqa, llagataqchus kaqlla kashanqa aycha qarapi mana aqarispa chayqa, qanchis p'unchaytawanraqmi sacerdoteqa payta wisq'anqa.

⁶Qanchiskaq p'unchaypitaq sacerdoteqa qhawallanqataq, chay llagataq mana k'anchapushanqachu, aycha qarapipas manataq aqarinqachu[5] chayqa, pukayasqalla kaqtinmi sacerdoteqa chay runata ch'uya kasqanta sut'inchapunqa. P'achankunatan t'aqsakunqa, ch'uyataq kapunqa.

⁷Ch'uya kananpaq sacerdoteman qhawachikamusqan qhepatataqchus chay runaq aycha qaranpi pukayasqaqa aqarinqa chayqa, huktawanmi sacerdoteman qhawachikamunqa.

⁸Sacerdotetaqchus qhawashaspa rikunqa aycha qarapi pukayasqa mirarisqanta chayqa, chay runatan qhelli kasqanta sut'inchanqa, chayqa lepra onqoymi.

⁹Mayqen runapipas lepra onqoy rikhuriqtinqa sacerdotemanmi pusasqa kanqa.

¹⁰Sacerdotetaq chayta qhawanqa, aycha qarapitaqchus yuraq punkisqa rikhurinqa, chaytaq suphuta yuraqyachinqa, punkisqapitaq llullu aycha rikhurinqa chayqa,

¹¹aycha qaranpi unay lepra onqoyñan. Sacerdoten paytaqa qhelli kasqanta sut'inchanqa, qhelli kasqanta rikuspan mana wisq'anqachu.

¹²Lepra onqoytaqchus cuerpontinman aqarinqa, chhaynapi onqosqata umamanta chakikama khiki onqoyniyoqta hina sacerdote rikunqa chayqa,

¹³paymi allinta qhawanqa. Onqoytaqchus cuerpontinta tukunqa chayqa, ch'uyatan khiki onqoyniyoqta sut'inchanqa. Llapallan yuraqyapuqtinmi payqa ch'uya.

¹⁴Maypachachus llullu aycha paypi rikhuriqtinmi ichaqa, qhelli kapunqa.

¹⁵Sacerdoten chay llullu aychata qhawanqa, hinaspan qhelli kasqanta sut'inchanqa. Llullu aychaqa qhellin, chayqa lepra onqoymi.

¹⁶Llullu aychataqchus hukman tukunqa yuraqyapunqataq chayqa, sacerdotemanmi qayllaykunqa,

¹⁷hinan sacerdoteqa payta qhawanqa. Chay llagataqchus yuraqyapunqa chayqa, sacerdoten chay onqoypa hap'isqanta ch'uya kasqanta sut'inchanqa, chaymi ch'uya kapunqa.

¹⁸Piqpa aychanpipas llaga alliyasqanmantaña,

¹⁹punkispa yuraqyanqa otaq t'oqra-pukapas kanqa chayqa, chay runaqa sacerdotemanmi qhawachikamunqa.

²⁰Sacerdotetaq qhawanqa, chaytaqchus aycha qarapi aswan ukhu kapushanqa, suphunpas yuraqyasqataq kapushanqa chayqa, sacerdoten qhelli kasqanta sut'inchanqa. Chay ch'upu sayariqqa lepra onqoymi.

²¹Sacerdotetaqchus chayta qhawaspa mana chaypi yuraq suphuta rikunqachu, manataq aycha qara ukhumanpas haykunqachu, aswanpas tiyaykapunqataq chayqa, qanchis p'unchaytan payta wisq'anqa.

²²Aycha qarapitaqchus aqarinqa chayqa, sacerdoten qhelli kasqanta sut'inchanqa, chayqa lepra onqoymi.

²³K'anchashaq punkisqataqchus kaqllapi mana aqarispa kashanqa chayqa, sacerdoten chayta ch'uya kasqanta sut'inchanqa.

²⁴Piqpa aycha qaranpipas ninaq ruphasqan kanqa, hinaspa ninaq ruphasqan llullu aychapi t'oqra-pukapas yuraq k'anchashaqpas kanqa chayqa,

²⁵sacerdoten chayta qhawanqa. Suphutaqchus yuraq k'anchashaq cheqaspi yuraqyashanqa, chaytaq aycha qara ukhuman haykushanqa chayqa, ruphasqapi hatariq lepra onqoymi. Sacerdoten qhelli kasqanta sut'inchanqa, lepra onqoy kasqanrayku.

²⁶Ichaqa sacerdotetaq chayta qhawaspa, yuraq k'anchashaq cheqaspi yuraq suphu mana rikhurisqanta, manataq aycha qara ukhumanchu haykusqanta, aswanpas t'oqrayasqata rikunqa chayqa, qanchis p'unchaytan chay runata sacerdote wisq'anqa.

²⁷Qanchiskaq p'unchaypitaqmi sacerdoteqa payta allinta qhawanqa, aycha qaramantaqchus aqarinqa chayqa, sacerdoten chay runata qhelli kasqanta sut'inchanqa, chayqa lepra onqoymi.

²⁸Yuraq k'anchashaqchus kaqllapi kashanqa, manataq aycha qaraman aqarinqachu, tiyaykapunñataq chayqa, ruphasqa k'iri sich'un. Sacerdoten chayta ch'uya kasqanta sut'inchanqa ruphasqa k'iri sich'u kasqanrayku.

²⁹Qhariqpas warmiqpas umanpi otaq k'akinpi llaga hina hatarinqa chayqa,

³⁰sacerdoten chay llagata allinta qhawanqa. Chaytaqchus aycha qarapi aswan ukhu rikhurinqa, chaypi suphupas q'elluniraytaq t'akallataq kanqa chayqa, sacerdoten chayta qhelli kasqanta sut'inchanqa. Chayqa millay seqsi onqoymi, umapi otaq k'akipi lepra onqoymi.

³¹Sacerdotetaq chay llagata qhawaspa, aycha qara ukhuman mana haykusqanta, manallataq chaypi yana suphupas kasqanta rikunqa chayqa, qanchis p'unchaytan sacerdoteqa chay runata wisq'anqa.

³²Qanchiskaq p'unchaypitaqmi sacerdoteqa chay llagata allinta qhawanqa, manataq millay seqsi onqoy aqariqtinqa, chaypi q'elluniray suphupas mana kaqtinqa, manallataq aycha qarapi llagapas ukhumanchu haykuqtinqa,

³³chay runatan suphunta k'isuchinqa, ichaqa manan millay seqsi onqoy cheqastaqa k'isukunqachu, sacerdotetaq chay runata qanchis p'unchaytawanraq wisq'anqa.

³⁴Qanchiskaq p'unchaypitaq sacerdoteqa chay millay seqsi onqoyta allinta qhawanqa, manataqchus onqoyqa aycha qarapi aqarinqachu, manataq aycha qara ukhumanchu haykunqa chayqa, sacerdoten chay runata ch'uya kasqanta sut'inchanqa. P'achankunatan t'aqsakunqa, ch'uyataq kapunqa.

³⁵Ichaqa ch'uyayapusqan qhepatataqchus millay seqsi onqoyqa aycha qarapi aqaripushanqa chayqa,

³⁶sacerdoten chayta allinta qhawanqa. Millay seqsi onqoytaqchus aycha qarapi aqaripushanqa chayqa, manañan sacerdoteqa q'elluniray suphutaqa maskhanqachu. Chay runaqa qhellin.

³⁷Ichaqa millay seqsi onqoytataqchus mana aqarishaqta hina reparanqa, chaypitaqchus yana suphu lloqsimunqa chayqa, chay millay seqsi onqoyqa alliyapusqañan. Payqa ch'uyan kapushan, ch'uya kasqantataq sacerdoteqa sut'inchanqa.

³⁸Hinallataq qhariqpas otaq warmiqpas aycha qaranpi yuraq alqakuna kanqa chayqa,

³⁹sacerdoten allinta qhawanqa. Aycha qaranpitaqchus yuraq niray alqakuna rikhurinqa chayqa, manan onqoychu. Chay runaqa ch'uyan.

⁴⁰Piqpa chukchanpas urmaqtinqa, p'aqlan kapun, ichaqa ch'uyan.

⁴¹Piqpa mat'i chukchanpas urmaqtinqa, p'aqla mat'in kapun, ichaqa ch'uyan.

⁴²Uma p'aqlanpipas otaq mat'i p'aqlanpipas t'oqra-puka punkisqa kanqa chayqa, p'aqlanpi sayariq lepra onqoymi.

⁴³Sacerdoten chayta allinta qhawanqa, punkisqataqchus p'aqlanpipas t'oqra-puka kanqa, aycha qarapi lepra onqoyman rikch'akuq chayqa,

⁴⁴lepra onqoymi, chay runaqa qhellin. Umanpi chay hina punkisqa llaga kaqtinmi, sacerdoteqa qhelli kasqanta sut'inchanqa.

⁴⁵Pipas lepra onqoyniyoqqa llik'irqarisqa p'achayoq t'ampa umantinmi kanqa, simi patan pakasqataq qaparkachaspa purinqa: ¡Qhellin kani! ¡Qhellin kani! nispa.

⁴⁶Chay lepra onqoyniyoq kasqanraykun tukuy tiempo qhelli kanqa, sapallantaq karpa-karpa hawapi tiyanqa.

⁴⁷P'achapi qhoqayay kaqtinqa, millma p'achapiña, lino p'achapiña,

⁴⁸lino awasqapiña, millma awasqapiña, qarapiña, qaramanta ima ruwasqapiña kaspapas,

⁴⁹q'omerniray otaq pukaniray kanqa chayqa, qhoqayay mirariymi, sacerdotemanmi chay qhoqayayta qhawachimunqa.

⁵⁰Hinan sacerdoteqa chay qhoqayayta allinta qhawanqa, hinaspan qhoqayasqataqa qanchis p'unchayta wisq'anqa.

⁵¹Qanchiskaq p'unchaypitaqmi qhoqayasqata allinta qhawanqa, qhoqayaytaqchus mirarinqa p'achapipas, awasqapipas, qaramanta ima ruwasqapipas chayqa, ismuchiq qhoqayaymi, qhellin chayqa kanqa.

⁵²Ruphachikunqan chay qhoqayasqakunaqa ismuchiq qhoqayay kasqanrayku.

⁵³Ichaqa sacerdote allinta qhawaqtin chay qhoqayasqakunapi qhoqayayqa mana mirarinqachu chayqa,

⁵⁴sacerdoten kamachikunqa chay qhoqayasqata t'aqsanankupaq, chaymantataq qanchis p'unchaytawan wisq'anqa.

⁵⁵Chay qhoqayay t'aqsasqa kasqan qhepatataq sacerdoteqa allinta qhawanqa, qhoqayasqatataq mana hukniray kasqantachu rikunqa chayqa, qhellin, hinaña mana mirarinqachu chaypas. Mayneq ladopipas ismuchiq qhoqayayqa kachun, ninapipunin ruphachinqaku.

⁵⁶Ichaqa sacerdote chayta allinta qhawaqtin, t'aqsasqamantaña qhoqayayqa mana yuraqñachu rikhurinqa chayqa, chaytan llik'inqa p'achamantapas, qaramantapas, awasqamantapas.

⁵⁷Huktawantaqchus p'achapipas, awasqapipas, qaramanta ruwasqapipas rikhurinqa chayqa, mirarishanmi, chay qhoqayasqataqa ninapin ruphachinqaku.

⁵⁸Ichaqa p'achatapas, awasqatapas, qaramanta imatawanpas t'aqsasqamanta qhoqayayqa chinkapunqa chayqa, huk kutitawanmi t'aqsakunqa, chaymi ch'uya kapunqa.

⁵⁹Chaymi millma p'achapipas, lino p'achapipas, awasqapipas, qaramanta ruwasqa imapipas qhoqayaypaq kamachikuy simiqa, ch'uyatapas qhellitapas sut'inchanapaq, nispa.