Read DIOSPA QHELQACHISQ Quechua LEVÍTICO 14 Bible Online

LEVÍTICO 14 - DIOSPA QHELQACHISQ Quechua bible

LEVÍTICO 14

²— Lepra onqoyniyoqta ch'uyanchanapaq kamachikuy simiqa kaymi: Chay runatan ch'uyanchakunan p'unchaypi sacerdoteman pusamunqaku.

³Sacerdoten karpa-karpa hawaman pusaspa allinta payta qhawanqa. Lepra onqoyniyoqtachus qhaliyapusqantaña rikunqa chayqa,

⁴chay ch'uyanchakuqmanmi iskay kawsashaq ch'uya pichinchutapas, cedro k'aspitapas, puka q'aytutapas, muñatapas apamunapaq kamachinqa.

⁵Chaymantataq sacerdoteqa kamachinqa pukyumanta horqomusqa unuyoq manka patapi huknin pichinchuta sipinapaq.

⁶Hinamantataq hap'inqa kawsashaq pichinchuta, cedro k'aspita, puka q'aytuta, muñatawan, hinaspa pukyumanta horqomusqa unu patapi sipisqa pichinchuq yawarninman chaykunata challpuykunqa.

⁷Hinaspataq lepra onqoymanta ch'uyanchakuqman qanchis kutita ch'allaykunqa, ahinapin ch'uya kapusqanta sut'inchanqa. Chaymantataq kawsashaq pichinchuta campoman kacharparipunqa.

⁸Ch'uyanchakuqtaq p'achankunata t'aqsakunqa, llapa suphuntapas k'isukunqa, hinaspataq unuwan bañakuspa ch'uya kapunqa. Chaymantataq karpa-karpaman haykunqa, ichaqa qanchis p'unchaymi karpanpi mana tiyanqachu.

⁹Qanchiskaq p'unchaypitaq k'isukunqa llapan chukchanta, sunkhanta, ñawi qhechiphranta, tukuy suphuntawan. P'achankunatan t'aqsakunqa, cuerpontapas unuwanmi bañakunqa, ahinapin ch'uya kapunqa.

¹⁰Pusaqkaq p'unchaypin mana imanasqa iskay borregota apamunqa, mana imanasqa malta ovejatawan, ruru ofrendapaqtaq aceitewan chapusqa soqta kilo ñut'u hak'utawan, kinsa cuarta aceitetawan.

¹¹Ch'uyanchaq sacerdotetaq ch'uyanchakuqta chaykunatawan Señor Diosman qayllaykachinqa Dioswan Tupana Karpa punkuman.

¹²Sacerdoten huknin borregota hap'ispa kinsa cuarta aceitewan kutichipuna ofrendata haywanqa, chaytan maywispa Señor Diospaq ofrendata haywanqa.

¹³Hinaspan chay borregota karpa kanchapi nak'ana cheqaspi nak'anqa, chaypin ruphachina sacrificiotapas hucha pampachaypaq sacrificiotapas nak'anku. Huchapaq nak'asqa hinan kutichipuna ofrendaqa sacerdotepaq. Chay ofrendaqa ancha ch'uyan.

¹⁴Chaymantataq sacerdoteqa kutichipuna ofrenda nak'asqaq wakin yawarninta hoqarispa llusiykunqa ch'uyanchakuqpa paña ninrin ura puntata, paña makinpa mama dedonta, paña chakinpa mama dedontawan.

¹⁵Hinallataqmi sacerdoteqa kinsa cuarta aceiteta hap'ispa wakinta lloq'e maki qochanman hich'aykunqa,

¹⁶hinaspan paña dedonta lloq'e makinpi kaq aceiteman challpuykuspa aceiteta dedonwan qanchis kutita Señor Diospa ñawpaqenman ch'allanqa.

¹⁷Hap'isqan puchuq aceitewantaq sacerdoteqa yawar pataman llusiykunqa ch'uyanchakuqpa paña ninrin ura puntata, paña makinpa mama dedonta, paña chakinpa mama dedontawan.

¹⁸Hap'isqan puchuq aceitetataq hich'aykunqa ch'uyanchakuqpa uman pataman. Chhaynatan sacerdoteqa chay runaq ch'uyanchakunanpaq Señor Diospa ñawpaqenpi ruwanqa.

¹⁹Chaymantataq sacerdoteqa hucha pampachaypaq sacrificiota haywanqa, qhelli kasqanmanta chay runata ch'uyanchanapaq. Hinamantataq ruphachina ofrendata nak'anqa.

²⁰Hinaspan sacerdoteqa ruphachina sacrificiotapas ruru ofrendatapas altar patapi haywanqa. Chay hinatan sacerdoteqa chay runaq huchan pampachasqa kananpaq ruwanqa, ch'uyataq kapunqa.

²¹Wakchataq mana aypakunchu chayqa, huk borregotan maywisqa ofrendapaq apanqa, chaymi Señor Diospaq t'aqasqa kanqa. Apallanqataqmi ruru ofrendapaq aceiteyoq chapusqa iskay kilo ñut'u hak'uta, kinsa cuarta aceiteta,

²²iskay kullkutapas, mana chayqa iskay malqo urpitapas, aypasqanman hina. Hukninmi hucha pampachaypaq sipisqa kanqa, huknintaq ruphachina ofrendapaq kanqa.

²³Pusaqkaq p'unchaypin chaykunata sacerdoteman apanqa, Dioswan Tupana Karpa punkuman, Señor Diospa ñawpaqenpi ch'uyanchakunanpaq.

²⁴Sacerdotetaq hap'inqa maywisqa ofrendapaq borregota kinsa cuarta aceitetawan, hinaspan chaykunata Señor Diospaq maywisqa ofrendata haywanqa.

²⁵Maywisqa ofrendapaq borregota nak'aspañataq wakin yawarninta hoqarispa llusiykunqa ch'uyanchakuqpa paña ninrin ura puntata, paña makinpa mama dedonta, paña chakinpa mama dedontawan.

²⁶Hinaspan sacerdoteqa lloq'e maki qochanman wakin aceiteta hich'aykunqa.

²⁷Paña makin huknin dedonwantaq lloq'e makinpi kaq aceiteta sacerdoteqa qanchis kutita Señor Diospa ñawpaqenman ch'allanqa.

²⁸Hinallataqmi sacerdoteqa aceitewan yawar pataman llusiykunqa ch'uyanchakuqpa paña ninrin ura puntata, paña makinpa mama dedonta, paña chakinpa mama dedontawan.

²⁹Hap'isqan puchuq aceitetataq ch'uyanchakuqpa umanman hich'aykunqa, chhaynatan sacerdoteqa chay runaq ch'uyanchakunanpaq Señor Diospa ñawpaqenpi ruwanqa.

³⁰Hinallataqmi aypasqanman hina huknin kullkuta, mana chayqa huknin malqo urpitapas haywanqa.

³¹Huknintan hucha pampachaypaq, huknintataq ruphachina sacrificiota haywanqa, ruru ofrendatawan kuska. Chay hinatan sacerdoteqa Señor Diospa ñawpaqenpi ruwanqa, chay ch'uyanchakuqpa huchan pampachasqa kananpaq.

³²Chay hinaqa, wakcha runa lepra onqoyniyoq kanman, manataq ch'uyanchakunanpaq iman qona ofrendata haywayta atinmanchu chayqa, chay kamachikuyman hina ruwanqa, nispa.

³³Señor Diosmi Moisestawan Aarontawan nirqan:

³⁴— Hap'ikapunaykichispaq ñoqaq qonay Canaán hallp'aman haykuqtiykichis, mayqen wasipipas salliyta rikhurichiqtiyqa,

³⁵wasiyoqmi sacerdoteman willaq rinqa: Imachá wasiypi salliq hina rikhurin, nispa.

³⁶Hinaqtinmi sacerdoteqa sallisqanta qhawaq manaraq wasiman haykushaspa qasichinapaq kamachikunqa, ama imapas chaypi kaq qhellichakunanpaq. Chaymantañan sacerdoteqa chayta allinta qhawananpaq haykunqa.

³⁷Chayta allinta qhawaspachus wasi perqakunapi sallisqata tarinqa q'omer niray khapusqakunata, chaykunataq perqa qhatapi aswan t'oqorqarisqa rikhurinqa chayqa,

³⁸chaymantan sacerdoteqa lloqsinqa, hinaspan qanchis p'unchayta chay wasita wisq'anqa.

³⁹Qanchiskaq p'unchaypitaqmi sacerdoteqa allinta qhawanqa, salliytaqchus wasi perqakunaman mirarinqa chayqa,

⁴⁰sacerdoten kamachikunqa chay sallisqa rumikunata khakaspa llaqta hawapi qhelli cheqasman wikch'umunankupaq.

⁴¹Wasi ukhutataq muyuriqta qhetuchinqa, qhetusqanku hallp'atataq llaqta hawapi qhelli cheqasman hich'amunqaku.

⁴²Hinaspan wak rumikunata hoqarispa khakasqa rumikunaq kasqanta perqanqaku, hinallataq mosoq iskuwan wasita llut'anqaku.

⁴³Rumitapas khakasqanku qhepata, wasi qhatatapas qhetuspa, llut'apasqanku qhepataña chay wasipi salliy rikhurinqa chayqa,

⁴⁴sacerdoten haykullanqataq hinaspa chayta allinta qhawanqa. Salliytataqchus wasipi mirarisqata tarinqa chayqa, wasita khapuq salliymi, qhellin chayqa.

⁴⁵Chaymi chay wasitaqa thuninqaku. Wasiq ruminkunata, k'aspinkunata, hallp'antawantaq llapallanta llaqta hawapi qhelli cheqasman horqonqaku.

⁴⁶Wisq'asqa kashasqan p'unchaykunapi pipas chay wasiman haykuqqa, ch'isinkaman qhelli kanqa.

⁴⁷Chay wasipi puñuqpas mikhuqpas p'achankunatan t'aqsakunqa.

⁴⁸Ichaqa sacerdote haykuspa chayta allinta qhawaspa, llut'apasqa qhepataña chay salliypa mana mirarisqanta rikunqa chayqa, chay wasiq ch'uya kasqantan sut'inchanqa, salliypa chinkapusqanrayku.

⁴⁹Chaymantataq chay wasita ch'uyanchanapaq hap'inqa iskay pichinchuta, cedro k'aspita, puka q'aytuta, muñatawan.

⁵⁰Hinaspan pukyumanta horqosqa unuyoq manka patapi huknin pichinchuta sipinqa.

⁵¹Cedro k'aspita, muñata, puka q'aytuta kawsashaq pichinchutawan hap'ispataq, pukyumanta horqomusqa unu patapi sipisqa pichinchuq yawarninman chaykunata challpuykunqa. Hinamantataq wasita qanchis kutita ch'allanqa.

⁵²Chay hinatan wasita ch'uyanchanqa pichinchu yawarwan, pukyumanta horqomusqa unuwan, kawsashaq pichinchuwan, cedro k'aspiwan, muñawan, puka q'aytuwan ima.

⁵³Kawsashaq pichinchutataq llaqta hawa campoman kacharparipunqa. Chay hinatan wasita ch'uyanchanapaq ruwanqa, hinan ch'uya kapunqa.

⁵⁴Chay kamachikuykunan llapa lepra onqoypaq, millay seqsi onqoypaq,

⁵⁵p'achapi qhoqayaypaq, wasipi salliypaq,

⁵⁶punkisqapaq, pukayasqapaq, k'anchashaq aycha qarapaqwan.

⁵⁷Chay kamachikuykunaqa hayk'aqchus qhelli, hayk'aqchus ch'uya kasqanta yachanapaqmi churasqa, nispa.