Read DIOSPA QHELQACHISQ Quechua LEVÍTICO 15 Bible Online

LEVÍTICO 15 - DIOSPA QHELQACHISQ Quechua bible

LEVÍTICO 15

¹Señor Diosmi Moisestawan Aarontawan nirqan:

²— Israel runakunata nimuychis: Mayqen qharipas q'eya hisp'ay onqoywan hap'ichikuspaqa qhellin kanqa.

³Q'eya hisp'ayninchus purimunqa otaq watakamunqa chayqa, payqa qhellin kanqa. Chay q'eya hisp'aymi kay hinata qhellichan:

⁴Q'eya hisp'aqpa puñusqan puñunaqa qhellin kanqa, tiyasqan ima tiyanapas qhellin kanqa.

⁵Pipas puñunanta tupaykuqqa p'achankunatan t'aqsakunqa, pay kikinpas unuwanmi bañakunqa, ch'isinkamataq qhelli kanqa.

⁶Pipas q'eya hisp'aqpa tiyasqan patapi tiyaykuqqa p'achankunatan t'aqsakunqa, pay kikinpas unuwanmi bañakunqa, ch'isinkamataq qhelli kanqa.

⁷Hinallataqmi q'eya hisp'aqta tupaykuqpas p'achankunata t'aqsakunqa, pay kikinpas unuwanmi bañakunqa, ch'isinkamataq qhelli kanqa.

⁸Q'eya hisp'aqtaq ch'uya runa pataman thoqaykuqtinqa, thoqaykusqa runan p'achankunata t'aqsakunqa, unuwanmi bañakunqa, ch'isinkamataq qhelli kanqa.

⁹Q'eya hisp'aqpa sillakusqan monturapas qhellin kanqa.

¹⁰Pipas tiyasqanpi kaqta imatapas tupaykuqqa, ch'isinkaman qhelli kanqa. Chayta apaqpas p'achankunatan t'aqsakunqa, unuwanmi bañakunqa, ch'isinkamataq qhelli kanqa.

¹¹Q'eya hisp'aq runachus makinta mana maqchikuspa pitapas tupaykun chayqa, chay tupaykusqan runaqa p'achankunatan t'aqsakunqa, pay kikinpas unuwanmi bañakunqa, ch'isinkamataq qhelli kanqa.

¹²Q'eya hisp'aqpa tupaykusqan t'uru mankaqa p'akisqan kanqa, k'ullumanta apaykachanakunataq unuwan mayllisqa kanqa.

¹³Q'eya hisp'aq qhaliyapuqtinqa, qanchis p'unchaymi yupakunqa ch'uyanchakunanpaq. Hinaspataq p'achankunata t'aqsakunqa, pukyumanta horqomusqa unuwan cuerpontapas bañakunqa, ch'uyataq kapunqa.

¹⁴Pusaqkaq p'unchaypitaq iskay kullkuta otaq iskay urpi malqota aparikuspa Señor Diospa ñawpaqenman qayllaykunqa Dioswan Tupana Karpa punkuman, hinaspan chaykunata sacerdoteman qonqa.

¹⁵Sacerdoten hukninta haywanqa hucha pampachay ofrendapaq, huknintataq ruphachina ofrendapaq. Chay hinatan sacerdoteqa Señor Diospa ñawpaqenpi q'eya hisp'asqanmanta ch'uyanchanqa.

¹⁶Muhun phawachikuq qhariqa unuwanmi cuerpontinta bañakunqa, ch'isinkamataq qhelli kanqa.

¹⁷Ima p'achatapas ima qaratapas muhun kharkachanqa chayqa, unuwanmi t'aqsasqa kanqa, ch'isinkamataq qhelli kanqa.

¹⁸Huk qharitaq huk warmiwan puñunqa, hinataq muhun phawaykunqa chayqa, iskayninkun unuwan bañakunqaku, ch'isinkamataq qhelli kanqaku.

¹⁹Warmiq killanchus purinqa chayqa, qanchis p'unchaymi qhelli kanqa. Pipas payta tupaykuqqa ch'isinkaman qhelli kanqa.

²⁰Killayoq kashaspa ima patamanpas siriykusqanqa qhellin kanqa, hinallataq ima patamanpas tiyaykusqanqa qhelli kanqa.

²¹Pipas puñunanta tupaykuqqa p'achankunatan t'aqsakunqa, unuwanmi bañakunqa, ch'isinkamataq qhelli kanqa.

²²Pipas tupaykunqa paypa tiyaykusqan ima tiyanatapas chayqa, p'achankunatan t'aqsakunqa, unuwanmi bañakunqa, ch'isinkamataq qhelli kanqa.

²³Ahinaqa, pipas puñunantapas tiyaykusqan ima tiyanatapas tupaykuqqa ch'isinkaman qhelli kanqa.

²⁴Pipas killayoq warmiwan puñunqa, hinataq warmiq yawarninwan qhellichakunqa chayqa, qanchis p'unchaymi qhelli kanqa. Chay p'unchaykunapi chay qhariq puñusqan mayqen puñunapas qhellin kanqa.

²⁵Warmiq killanchus purimunanmantapas askha p'unchaytawanraq purimunqa, otaq killan mana purinanpi purinqa chayqa, killan purimunan p'unchaykunapi hinan yawarnin purishasqan p'unchaykunapi qhelli kanqa.

²⁶Yawarnin purishasqan p'unchaykunapi puñusqan puñunapas tiyaykusqan ima tiyanapas qhellin kanqa, killan purimushaqtin puñuna hina.

²⁷Pipas chaykunata tupaykuqqa qhellin kanqa, p'achankunatapas t'aqsakunqan, pay kikinpas unuwanmi bañakunqa, ch'isinkamataqmi qhelli kanqa.

²⁸Yawar puriynin thanipuqtintaq qanchis p'unchayta yupanqa, chaymantataq ch'uya kapunqa.

²⁹Pusaqkaq p'unchaypitaq payqa hap'imunqa iskay kullkuta mana chayqa iskay malqo urpitapas, hinaspan chaykunata sacerdoteman apamunqa Dioswan Tupana Karpa punkuman.

³⁰Sacerdotetaq hukninta hucha pampachaypaq haywanqa, huknintataq ruphachina ofrendapaq, hinaspan sacerdoteqa Señor Diospa ñawpaqenpi payta yawar puriyninmanta ch'uyanchanqa.

³¹Ahinatan Israel runakunataqa qhelli kayninkumanta t'aqankichis, mana chayqa paykuna ukhupi kaq karpayta qhelli kasqankuwan qhellichaspankun wañunkuman.

³²Chay kamachikuykunan q'eya hisp'aq qharipaq, muhun phawaywan qhellichakuq qharipaqwan,

³³killan puriq warmipaq, yawar hisp'aq qharipaq, yawarnin puriq warmipaq, killanwan qhellichakushaq warmiwan puñuq qharipaqpas, nispa.