Read DIOSPA QHELQACHISQ Quechua LEVÍTICO 18 Bible Online

LEVÍTICO 18 - DIOSPA QHELQACHISQ Quechua bible

LEVÍTICO 18

¹Señor Diosmi Moisesta nirqan:

²— Israel runakunata nimuy, Señor Diosmi nin: Ñoqaqa Diosniykichis Señor Diosmi kani.

³Aman tiyamusqaykichis Egipto suyu runakunaq ruwasqankuta hinaqa ruwankichischu, amallataq pusaykushasqay Canaán suyupi ruwasqankuta hinapas ruwankichischu, aman costumbrenkuman hinapas ruwankichischu.

⁴Kamachikuyniykunatan hunt'ankichis, unanchayniykunatan waqaychankichis, chaykunaman hinataq purinkichis, ñoqaqa Diosniykichis Señor Diosmi kani.

⁵Unanchayniykunatan kamachikuyniykunatan waqaychankichis, chaykunata hunt'aq runan kawsanqa. Ñoqaqa Señor Diosmi kani.

⁶Aman pi qharipas familian warmiwanqa puñukunqachu. Ñoqaqa Señor Diosmi kani.

⁷Aman taytaykita pisichankichu mamaykiwan puñukuspayki. Mamaykin payqa, aman paywan puñukunkichu.

⁸Aman taytaykiq qhepa warminwan puñukunkichu, chayqa taytaykita pisichaymi kanman.

⁹Aman panaykiwan puñukunkichu, taytaykiq ususinwanpas, mamaykiq ususinwanpas, qanwan wiñaq kaqtinpas, wakpi wiñaq kaqtinpas.

¹⁰Aman churiykiq ususinwanpas ususiykiq ususinwanpas puñukunkichu, paykunaqa yawarniykin.

¹¹Aman taytaykiq ususinwan puñukunkichu wak mamayoqña kaqtinpas, payqa panaykin.

¹²Aman taytaykiq pananwan puñukunkichu, payqa taytaykiq ayllunmi.

¹³Aman mamaykiq ñañanwan puñukunkichu, payqa mamaykiq ayllunmi.

¹⁴Aman taytaykiq wawqenpa warminwan puñukunkichu, payqa tiaykin.

¹⁵Aman qhachuniykiwan puñukunkichu, payqa churiykiq warminmi, amapunin paywan huchallikunkichu.

¹⁶Aman wawqeykiq warminwan puñukunkichu, chayqa wawqeykita pisichaymi kanman.

¹⁷Aman mamantin ususintinwan puñukunkichu. Aman chay warmiq churinpa ususinwanpas puñukunkichu, ususinpa ususinwanpas puñukunkichu, ayllu masintinmi kanku. Chayqa millay qhelli huchan.

¹⁸Warmiyki kawsashaqtinqa, aman ñañanwan casarallankitaqchu paywan puñukuspaqa cheqninachiwaqmi.

¹⁹Aman killanwan kashaq warmiwan puñukunkichu.

²⁰Aman runamasiykiq warminwan puñukunkichu, paywanqa qhellichakuwaqmi.

²¹Aman mayqen wawaykitapas Moloc diosman qonkichu ruphachisqata haywanapaq, aman chay hinata Diosniykiq sutinta sarunchankichu. Ñoqaqa Señor Diosmi kani.

²²Aman qharipura t'inkikunkichu, chayqa sinchi millay huchan.

²³Aman ima animalwanpas t'inkikunkichu, chaywanqa qhellichakuwaqmi. Aman mayqen warmipas ima animalmanpas qayllaykunqachu chaywan t'inkichikunanpaq, chayqa waqlliymi.

²⁴Aman chay hina ruwaykunawan qhellichakunkichischu, chaykunawanmi waqllirqanku qayllaykichismanta wikch'usaq chay suyu runakunaqa.

²⁵Chay suyu hallp'ataqmi qhellichasqa karqan, chaymi ñoqaqa mana chanin ruwasqankumanta muchuchirqani, chay suyu hallp'ataqmi tiyaqninkunata qarqomurqan.

²⁶Qankunaqa waqaychankichismi unanchayniykunata kamachikuyniykunatawan, amataq chay mayqen millaytapas ruwankichischu, llaqtayoqpas qankuna ukhupi tiyaq wak llaqtayoqpas.

²⁷Manaraq tiyashaqtiykichis chay suyupi tiyaq runakunaqa llapan kay millaykunatan ruwarqanku, chaymi chay suyuqa qhellillaña kapurqan.

²⁸Paqtan chay suyuqa qhellichaykusqaykichismanta qarqomusunkichisman, manaraq tiyashaqtiykichis chaypi tiyaq runakunata qarqomusqanta hina.

²⁹Pipas chay hina millaykunata ruwaqqa llaqtanmantan qarqosqa kanqa.

³⁰Hunt'aychispuni kamachikusqayta, amataq chay mayqen millay huchakunatapas ruwaychischu, chaykunatan manaraq haykushaqtiykichis Canaán suyu runakuna ruwarqanku, amataq chaykunawan qhellichakuychischu. Ñoqaqa Señor Diosniykichismi kani, nispa.