Read DIOSPA QHELQACHISQ Quechua LEVÍTICO 19 Bible Online

LEVÍTICO 19 - DIOSPA QHELQACHISQ Quechua bible

LEVÍTICO 19

¹Señor Diosmi Moisesta nirqan:

²— Llapa Israel runakunata nimuy, Señor Diosmi nin: Ch'uyan kankichis, ñoqa Diosniykichis Señor Dios ch'uya kasqayrayku.

³Sapankaykichismi mamaykichista taytaykichista respetankichis. Samana p'unchayniykunatapas waqaychankichismi. Ñoqaqa Diosniykichis Señor Diosmi kani.

⁴Aman idolokunata yupaychankichischu, amallataq metalta unuyachispa hich'asqa dioskunatapas ruwakunkichischu. Ñoqaqa Diosniykichis Señor Diosmi kani.

⁵Sumaq kawsay sacrificiota ñoqa Señor Diosman haywawaspaykichisqa, chaskisqa kanaykichispaq hinapunin chayta haywankichis.

⁶Haywawasqaykichis p'unchaymi mikhusqa kanqa, otaq paqarisnin p'unchaypas mikhusqa kanqa. Kinsakaq p'unchaypaq puchuqtaqmi ninapi ruphachisqa kanqa.

⁷Kinsakaq p'unchaypichus mikhusqa kanqa chayqa, qhellin kanqa, manan chaskisqachu kanqa.

⁸Pipas mikhuqqa huchachasqan kanqa, ñoqa Señor Diospaq t'aqasqa kaqta pisichasqanrayku. Chay runaqa llaqtanmantan qarqosqa kanqa.

⁹Chakraykita cosechaspaykiqa aman chakra cantokamachu ichhunki, amallataq ichhusqamanta puchuqkunataqa qhellankichu.

¹⁰Aman uvas chakraykitapas qhellankichu, amallataq urmaq uvastapas pallankichu, wakchakunapaqmi wak llaqtayoqkunapaqwan chaytaqa saqenki. Ñoqaqa Diosniykichis Señor Diosmi kani.

¹¹Aman suwakunkichischu, aman llullakunkichischu, amallataq runa-masintinpas q'otunakunchischu.

¹²Aman llullakuspa sutiypi jurankichischu, ñoqa Diosniykichispa sutiyta mana allinpaq hoqarispa. Ñoqaqa Señor Diosmi kani.

¹³Aman runamasiykita sarunchankichu, amallataq imantapas suwankichu. Aman llank'apakuqpa pagontaqa paqarisninkama wasiykipi hap'ikunkichu.

¹⁴Aman roqt'ota ñakankichu, ñawsaq ñawpaqenpipas aman misk'anata churankichu, aswanpas ñoqa Diosniykitan manchakuwanki. Ñoqaqa Señor Diosmi kani.

¹⁵Juez kaspaykiqa aman chanin-kayta waqllichinkichu, wakchamanpas qhapaqmanpas aman sayakunkichu, allintan runamasiykipaqqa chaninchanki.

¹⁶Aman llaqta-masiykikuna ukhupi hukmanta rimakuspa purinkichu. Aman runamasiykita wañuchinapaq mat'iykunkichu. Ñoqaqa Señor Diosmi kani.

¹⁷Aman wawqeykita sonqoykipi cheqnikunkichu, aswanpas anyaykunkin payta, ama huchallikuqmasin kanaykipaq.

¹⁸Aman vengakunkichu, amallataq llaqta-masiykikunapaqpas phiñakushallankichu, aswanpas qan kikiykita hinan runamasiykitaqa munakunki. Ñoqaqa Señor Diosmi kani.

¹⁹Unanchayniykunatan waqaychanki. Aman uywaykita wak rikch'aq uywawan urwachinkichu. Aman iskay rikch'aq muhuwan chakraykita tarpunkichu. Aman iskay rikch'aq q'aytuwan awasqa p'achawan churakunkichu.

²⁰Pipas mayqenpa rimaykusqan kamachi warmiwanpas puñunman, manaraq rantisqa manaraq kacharichisqa chay warmi kashaqtin chayqa, honranmantan payqa paganqa, ichaqa manan wañuchisqachu kanqaku, warmiq kamachi kasqanrayku.

²¹Qharitaqmi Ñoqawan Tupana Karpa punkuman huk anejota apamunqa ñoqapaq kutichipuna ofrenda kananpaq.

²²Chay anejotataqmi sacerdoteqa ñoqa Señor Diosman haywawanqa huchallikusqanmanta pampachanapaq, hinan huchallikusqanqa pampachasqa kapunqa.

²³Canaán suyuman haykuspaykichis imaymana niraq fruta sach'akunata mallkispaykichisqa, ñawpaq rurusqantan mana mikhuna qhellita hina qhawankichis. Kinsa watantinmi qhelli kanqa, aman rurusqantaqa mikhunkichischu.

²⁴Tawakaq watapitaq tukuy rurusqanqa ñoqa Señor Diosman qosqa kapunqa, ñoqata yupaychawanaykichispaq.

²⁵Phisqakaq watapitaq ichaqa rurusqanta mikhunkichis. Chaymi astawanraq rurunqa. Ñoqaqa Diosniykichis Señor Diosmi kani.

²⁶Aman imatapas yawarnintintaqa mikhunkichischu. Aman imatapas watunkichischu, amallataq layqachinkichischu.

²⁷Aman ch'ipu chukchaykichista rutukunkichischu. Amallataq sunkhaykichistapas rutukunkichischu.

²⁸Aman wañuqkunamanta cuerpoykichista kuchukunkichischu. Amallataq cuerpoykichispi ima señaltapas t'urpukunkichischu. Ñoqaqa Señor Diosmi kani.

²⁹Aman ususiykita qhelli huchapi purichinkichu rabona warmita hina, paqtan suyuntin qhelli huchapi purinman, hinaspa qhelli kawsay hunt'aykunman.

³⁰Samana p'unchayniykunatan waqaychankichis, ñoqa yupaychana cheqastan manchakunkichis. Ñoqaqa Señor Diosmi kani.

³¹Aman wañusqakunaq almanta tapuchinkichischu, amallataq layqamanpas rinkichischu, ama chaykunawan qhellichakunaykichispaq. Ñoqaqa Diosniykichis Señor Diosmi kani.

³²Machu runaq ñawpaqenpin sayaykunki, hinaspan payman k'umuykukunki. Ñoqa Diosniykitapas manchakuwankin. Ñoqaqa Señor Diosmi kani.

³³Hallp'aykichispi wak llaqtayoq qankunawan tiyaqtinqa, aman payta mana allinta ruwankichu.

³⁴Qankunawan tiyaq wak llaqtayoqtaqa llaqta-masiykichista hinan rikunkichis, qanta hinataqmi munakunkipas. Wak llaqtayoqllataqmi qankunapas Egipto suyupi kamurqankichis. Ñoqaqa Diosniykichis Señor Diosmi kani.

³⁵Tupushaspaqa aman mana chaninta ruwankichu, wask'anman tupuspapas, llasa aysaypipas, ima tupuypipas.

³⁶Chanin balanzakunatan, chanin aysanakunatan, chanin tupunakunatan qankunaqa hap'inaykichis. Ñoqaqa Diosniykichis Señor Diosmi kani, Egipto suyumanta horqomuqniykichis.

³⁷Llapa unanchayniykunatan, llapa kamachikuyniykunatan hunt'ankichis. Ñoqaqa Señor Diosmi kani, nispa.