Read DIOSPA QHELQACHISQ Quechua LEVÍTICO 23 Bible Online

LEVÍTICO 23 - DIOSPA QHELQACHISQ Quechua bible

LEVÍTICO 23

¹Señor Diosmi Moisesta nirqan:

²— Israel runakunata nimuy, Señor Diosmi nin: Fiestaykunaqa yupaychanapaq hatun huñunakuy p'unchaykunan. Kay hinan kanqa.

³Soqta p'unchaymi llank'ankichis, qanchiskaq p'unchaymi ichaqa samana kanqa, yupaychanapaq hatun huñunakuna p'unchay, aman imatapas llank'ankichischu. Ñoqa Señor Diospaq samana p'unchaymi kanqa, maypiña tiyankichis chaypas.

⁴Kay fiestaykunamanta yupaychanapaq huñunakuykunamantaqa tiemponpipunin willachinkichis.

⁵Ñawpaqkaq killaq chunka tawayoq p'unchayninpin rasphiyaykuyta ñoqa Señor Diospaq Pascua Fiestay qallarinqa.

⁶Chay killaq chunka phisqayoq p'unchayninpitaq ñoqa Señor Diospaq Mana Qonchuyoq T'anta Fiestay qallarinqa. Qanchis p'unchaymi mana qonchuyoq t'antata mikhunkichis.

⁷Ñawpaqkaq p'unchayqa yupaychanapaq huñunakuyniykichismi kanqa, aman imatapas llank'ankichischu.

⁸Qanchis p'unchaymi mikhuna ofrendata ñoqa Señor Diosman haywawankichis. Qanchiskaq p'unchaypitaqmi yupaychanapaq huñunakuy kanqa, aman imatapas llank'ankichischu, nispa.

⁹Señor Diosmi Moisesta nirqan:

¹⁰— Israel runakunata nimuy, Señor Diosmi nin: Ñoqaq qonay hallp'aman haykuspaykichis cosechaspaykichisqa, sacerdotemanmi huk marq'ay ichhusqaykichis ñawpaqkaq ruruta apamunkichis.

¹¹Sacerdotetaqmi chay marq'ay ichhumusqata ñoqa Señor Diosman maywispa haywawanqa, qankuna chaskisqa kanaykichispaq. Samana p'unchay qhepatan chay ofrenda maywisqata haywawanqa.

¹²Chay marq'ay ichhumusqata haywawasqaykichis p'unchaypin mana imanasqa watayoq borregota ruphachina sacrificiota ñoqa Señor Diosman haywawankichis.

¹³Haywallawankichistaqmi ruru ofrendatapas, hich'anapaq huk litro vinotapas, aceitewan chapusqa tawa kilo ñut'u hak'utapas, chayqa ñoqa Señor Diospaq mikhuna ofrendan kanqa, sumaq q'apayninmi sonqoyman chayanqa.

¹⁴Aman mikhunkichischu t'antatapas, hank'asqa rurutapas, qholla rurutapas, ñoqa Diosniykichisman chaykunata haywawanaykichis p'unchaykama. Wiñaypaq kamachikuy simin chayqa kanqa miray-mirayniykichispaq maypiña tiyasqaykichispipas.

¹⁵Samana p'unchaypa paqarisnin p'unchaymantapacha, marq'ay ichhumusqata maywisqa ofrendata haywawasqaykichismantan qanchis semana hunt'ata yupankichis.

¹⁶Qanchiskaq samana p'unchaypaqmi paqarisninkama phisqa chunka p'unchayta yupankichis, chaymantañan chayllaraq cosechasqa trigo ofrendata ñoqa Señor Diosman haywawankichis.

¹⁷Wasiykichismantan iskay t'antata ñoqapaq maywisqa ofrendata apamunkichis, chayqa qonchuyoq chapusqa tawa kilo ñut'u hak'umantan kanqa, ñoqapaq ñawpaqkaq ruru ofrenda kananpaq.

¹⁸T'antatawanmi qanchis mana imanasqa borregota watayoqtakama haywawankichis, huk torillota, iskay anejotawan. Chaykunaqa ñoqa Señor Diosman ruphachina sacrificion kanqa. Haywallawankichistaqmi ruru ofrendatapas, hich'aykunapaq vino ofrendatapas, chayqa ñoqa Señor Diospaq mikhuna ofrendan, sumaq q'apayninmi sonqoyman chayanqa.

¹⁹Haywallawankichistaqmi hucha pampachaypaq huk orqo cabratapas, watayoqtakama iskay borregotataq sumaq kawsay ofrendapaq.

²⁰Sacerdotetaq maywisqa ofrendata ñoqa Señor Diosman haywawanqa, ñawpaqkaq ruru t'antatawan iskaynin borregotawan. Chaykunaqa ñoqa Señor Diospaq maywisqa ofrendakunan, sacerdotekunapaqmi kanqa.

²¹Chay p'unchayllapitaqmi yupaychanaykichispaq huñunakunkichis, aman chaypiqa imatapas llank'ankichischu. Wiñaypaq kamachikuy simin chayqa kanqa miray-mirayniykichispaq maypiña tiyasqaykichispipas.

²²Chakraykichista ichhuspaykichisqa aman chakraq cantonkamachu ichhunkichis, amallataq ichhusqaykichistapas qhellankichischu. Chaytaqa wakchakunapaqmi wak llaqtayoqkunapaqwan saqenkichis. Ñoqaqa Diosniykichis Señor Diosmi kani, nispa.

²³Señor Diosmi Moisesta nirqan:

²⁴— Israel runakunata nimuy, Señor Diosmi nin: Qanchiskaq killaq qallariynin p'unchayqa samanaykichis hatun p'unchaymi kanqa. Chay p'unchaytan waqrakunata tocaspa qallarinkichis, hinaspan yupaychawanaykichispaq huñukuspa yuyariwankichis.

²⁵Aman imatapas llank'ankichischu, mikhuna ofrendatan ñoqa Señor Diosman haywawankichis, nispa.

²⁶Señor Diosmi Moisesta nirqan:

²⁷— Chay qanchiskaq killaq chunkakaq p'unchayninmi Hucha Pampachay P'unchay kanqa. Yupaychanapaq hatun huñunakuyniykichismi kanqa, ayunankichismi, ñoqa Señor Diosmantaqmi mikhuna ofrendata haywawankichis.

²⁸Aman chay p'unchaypiqa imatapas llank'ankichischu, chayqa Hucha Pampachay P'unchaymi, ñoqa Diosniykichis Señor Diospa ñawpaqeypi huchaykichis llapan pampachasqa kananpaq.

²⁹Pipas chay p'unchaypi mana ayunaqqa, llaqtamanta qarqosqan kanqa.

³⁰Pipas chay p'unchaypi imatapas llank'anqa chayqa, ñoqan chay runata wañuchisaq.

³¹Aman imatapas llank'ankichischu. Wiñaypaq kamachikuy simin chayqa kanqa miray-mirayniykichispaq maypiña tiyasqaykichispipas.

³²Qankunapaqqa samanaykichis hatun p'unchaymi, isqonkaq p'unchay ch'isinmantan qhepantin p'unchay ch'isinkama ayunaspa samankichis, nispa.

³³Señor Diosmi Moisesta nirqan:

³⁴— Israel runakunata nimuy, Señor Diosmi nin: Chay qanchiskaq killaq chunka phisqayoq p'unchayninpin ñoqapaq Ch'uklla Ruway Fiesta qallarinqa, qanchis p'unchaytaq kanqa.

³⁵Ñawpaqkaq p'unchaymi yupaychanapaq hatun huñunakuy kanqa, aman imatapas llank'ankichischu.

³⁶Qanchis p'unchaynintinmi mikhuna ofrendata ñoqa Señor Diosman haywawankichis. Pusaqkaq p'unchaypitaqmi yupaychanapaq huñunakuyniykichis kallanqataq, mikhuna ofrendatan ñoqaman haywawankichis. Chayqa tukupay p'unchay hatun huñunakuymi, aman chaypiqa imatapas llank'ankichischu.

³⁷Chaykunan ñoqa Señor Diospa hatun fiestaykunaqa, chaykunamanmi yupaychanapaq huñunakuyman waqyankichis. Chay fiestakunapin mikhuna ofrendakunata, ruphachina sacrificiokunata, ruru ofrendakunata, hich'ana ofrendakunata sapanka tupamusqan p'unchaypi ñoqa Señor Diosman haywawankichis.

³⁸Chay fiestakunaqa samana p'unchaykunamantaqa sapaqmi, chay ofrendakunapas qokuyniykichiskunamanta, prometekusqaykichista hunt'anapaq ofrendakunamanta, tukuy sonqoykichismanta ñoqaman qosqa llapa ofrendakunamantapas sapaqmi.

³⁹Qanchiskaq killaq chunka phisqayoq p'unchayninpitaqmi hallp'aq rurusqanta hoqarispaykichisña, qanchis p'unchayta ñoqa Señor Diospaq fiestata ruwankichis. Ñawpaqkaq p'unchaymi samana kanqa, pusaqkaq p'unchaypas samana p'unchayllataqmi kanqa.

⁴⁰Ñawpaqkaq p'unchaypin sach'aq allinkaq rurunkunata hoqarinkichis, hoqarillankichistaqmi palmera sach'a k'allmakunatapas, raphisapa sach'a k'allmakunatapas, unu patapi saucekunatapas, hinaspan ñoqa Diosniykichis Señor Diospa ñawpaqeypi qanchis p'unchayta kusikunkichis.

⁴¹Sapa watan qanchis p'unchayta ñoqapaq chay fiestata chay hinata ruwankichis. Wiñaypaq kamachikuy simin miray-mirayniykichispaq kanqa. Qanchiskaq killapin fiestata ruwankichis.

⁴²Qanchis p'unchaytan Israelpi llapan naceqkuna ch'ukllakunapi tiyanqa.

⁴³Chay hinapin Egipto suyumanta horqomuspa Israel runakunata karpakunapi tiyachisqayta wawaykichiskuna yachanqa. Ñoqaqa Diosniykichis Señor Diosmi kani, nispa.

⁴⁴Chay hinatan Moisesqa Israel runakunata rimaykurqan Señor Diospa hatun fiestankunamanta.