Read DIOSPA QHELQACHISQ Quechua LEVÍTICO 4 Bible Online

LEVÍTICO 4 - DIOSPA QHELQACHISQ Quechua bible

LEVÍTICO 4

¹Señor Diosmi Moisesta nirqan:

²— Israel runakunata nimuy: Mayqen runapas mana yachaspa huchallikunqa, Señor Diospa mayqen kamachikusqantapas p'akispa chayqa, kaykunatan ruwanqa:

³Uma sacerdotechus huchallikuspa llaqtata huchayoqpaq hap'ichinqa chayqa, huchallikusqanmantan Señor Diosman mana imanasqa torillota haywanqa hucha pampachaypaq.

⁴Dioswan Tupana Karpa punkumanmi torillota apanqa, hinaspan torilloq umanman makinta churaykuspa chayta Señor Diospa ñawpaqenpi nak'anqa.

⁵Uma sacerdotetaq torillo yawarmanta wakinta wisispa Dioswan Tupana Karpaman apaykunqa,

⁶hinaspan payqa dedonta yawarman challpuykuspa, Señor Diospa ñawpaqenpi qanchis kutita chay yawarwan ch'allanqa Ch'uya Cheqas cortinaq ñawpaqenman.

⁷Chay yawarwanmi sacerdoteqa llusiykullanqataq q'apaq incienso ruphachina altar waqrakunata, chaymi kashan Señor Diospa ñawpaqenpi. Torilloq wakin yawarnintataq hich'aykunqa ofrenda ruphachina altar chakiman, chaymi Dioswan Tupana Karpa punkupi kashan.

⁸Hucha pampachaypaq kaq torilloq llapan wirantataq hoqarinqa, hinallataq wiksa llika wiratapas,

⁹iskaynin rurunta, chaykuna qayllapi ñañu wasa wirata, sullk'a k'ipchantawan.

¹⁰Chaykunatan horqonqa imaynan sumaq kawsay ofrendapaq nak'asqa torillomanta horqon hinata. Hinaspan sacerdoteqa sacrificio ruphachina altar patapi chayta ruphachinqa.

¹¹Torilloq qarantataq, llapa aychantawan, umanta, makinkunata, ch'unchulninta, phusnuntawan,

¹²karpa-karpa hawa pichasqaman horqonqa uspha hich'anaman, chaypitaq llant'a ninapi ruphachinqa.

¹³Llapan Israel llaqtachus Señor Diospa mayqen kamachikusqantapas p'akispa, mana yachaspa huchallikurqan, manaña repararqanchu chaypas, huchayoqmi rikhurinqaku.

¹⁴Chaymantataq huchallikusqanku yachakunqa chayqa, paykunan huk torillota hucha pampachaypaq haywanqaku. Chaytan Dioswan Tupana Karpaman apamunqaku.

¹⁵Israel kurak runakunataq Señor Diospa ñawpaqenpi torilloq uman pataman makinkuta churaykunqaku, hinaspataq chay torillota nak'anqaku.

¹⁶Uma sacerdotetaq chay torillo yawarmanta hoqarispa Dioswan Tupana Karpaman apaykunqa.

¹⁷Hinaspan payqa dedonta yawarman challpuykuspa, Señor Diospa ñawpaqenpi qanchis kutita Ch'uya Cheqas cortinaq ñawpaqenman ch'allanqa.

¹⁸Chay yawarwanmi altar waqrakunata llusiykullanqataq, chaymi kashan Señor Diospa ñawpaqenpi. Wakin yawartataq hich'aykunqa ofrenda ruphachina altar chakiman, chaymi Dioswan Tupana Karpaman haykunapi kashan.

¹⁹Llapan wirantan horqonqa, hinaspan chayta altar patapi ruphachinqa.

²⁰Chay torillotan kaqllatataq ruwanqa hucha pampachaypaq torillota ruwasqanta hina. Chay hinatan sacerdoteqa huchanku pampachanapaq sacrificiota haywanqa, chaymi huchankuqa pampachasqa kapunqa.

²¹Karpa-karpa hawamanmi torillota apanqa, hinaspan chayta ruphachinqa ñawpaqkaq torillota ruphachisqanta hina. Chayqa Israel llaqtaq huchan pampachaypaq sacrificion.

²²Huk kamachikuqtaqchus mana yuyaypichu huchallikunqa Señor Diospa mayqen kamachikusqantapas p'akispa chayqa, huchayoqmi rikhurinqa.

²³Chaymantataq huchallikusqan huchata yachanqa chayqa, mana imanasqa orqo cabratan ofrendanpaq haywanqa.

²⁴Hinaspan orqo cabraq umanman makinta churaykuspa, Señor Diospa ñawpaqenpi nak'anqa ruphachina sacrificio nak'anapi. Chayqa hucha pampachaypaq ofrendan.

²⁵Sacerdotetaq orqo cabraq yawarninman dedonta challpuykunqa, hinaspan sacrificio ruphachina altar waqrakunaman llusiykunqa. Wakin yawartataq sacrificio ruphachina altar chakiman hich'aykunqa.

²⁶Llapan wirantataq altar patapi ruphachinqa, sumaq kawsaypaq ofrenda wirata hina. Chay hinatan sacerdoteqa kamachikuqpa huchan pampachaypaq sacrificiota haywanqa, hinan pampachasqa kapunqa.

²⁷Llaqtamanta mayqen runapas mana yachaspa huchallikunqa Señor Diospa mayqen kamachikusqantapas p'akispa chayqa, huchayoqmi rikhurinqa.

²⁸Hinaspa huchallikusqan huchata yachanqa chayqa, huchallikusqanmantan mana imanasqa china cabra ofrendata apanqa.

²⁹Hinaspan cabraq umanman makinta churaykunqa, ruphachina ofrenda nak'anapitaq chayta nak'anqa.

³⁰Chaymantataq sacerdoteqa yawarman dedonta challpuykunqa, hinaspan sacrificio ruphachina altar waqrakunaman llusiykunqa. Wakin yawartataq sacrificio ruphachina altar chakiman hich'aykunqa.

³¹Llapan wirantataq horqonqa, sumaq kawsay ofrenda wirata hina. Sacerdotetaq chayta altar patapi ruphachinqa, sumaq q'apayninqa Señor Diospa sonqonmanmi chayanqa. Chay hinatan sacerdoteqa chay runaq huchan pampachaypaq sacrificiota haywanqa, hinan pampachasqa kapunqa.

³²Malta ovejatataqchus huchapaq ofrendanta apamunqa chayqa, mana imanasqa chinatan apamunqa.

³³Hinaspan ovejaq umanman makinta churaykunqa, ruphachina sacrificio nak'anapitaq chayta nak'anqa.

³⁴Hinamantataq sacerdoteqa ovejaq yawarninman dedonta challpuykunqa, hinaspan sacrificio ruphachina altar waqrakunaman chayta llusiykunqa. Wakin yawartataq altar chakiman hich'aykunqa.

³⁵Llapan wirantataq horqonqa, sumaq kawsay ofrenda wirata hina, sacerdotetaq chayta altarpi ruphachinqa Señor Diospaq mikhuna ofrendakuna patapi. Chay hinatan sacerdoteqa chay runaq huchan pampachaypaq sacrificiota haywanqa, hinan pampachasqa kapunqa.