Read DIOSPA QHELQACHISQ Quechua LEVÍTICO 6 Bible Online

LEVÍTICO 6 - DIOSPA QHELQACHISQ Quechua bible

LEVÍTICO 6

¹Señor Diosmi Moisesta nirqan:

²— Pipas runamasinta q'otun ima hap'ichikusqanpipas mañaykusqanpipas chayqa, ñoqa contran huchallikun. Pipas runamasinmanta suwakunpas qechunpas chayqa, ñoqa contran huchallikun.

³Pipas chinkasqata tarikuspa mananchakun, llullakuspa juran, runakunaq huchallikusqanta hinapas huchallikun chayqa, ñoqa contran huchallikun.

⁴Chay hinata huchallikuqqa kutichipunqan suwakusqanta, qechusqanta, ima hap'ichikuytapas hap'isqanta, chinkasqata tarikusqanta,

⁵imamanta llullakuspa jurasqanmantapas. Chaytan mana imanasqallata chay kaqniyoq runamasinman qopunqa huchachasqa kasqan p'unchaypi, chay kutichipusqan valorninpa phisqa partentawan yapaykuspa.

⁶Kutichipuna ofrendapaqtaq huk mana imanasqa anejota ñoqaman apamunqa, allin chaninchasqata, hinaspa sacerdoteman qonqa.

⁷Sacerdotetaq ñawpaqeypi chayta haywawanqa chay runaq huchan pampachasqa kananpaq, hinan pampachasqa kapunqa imapichus huchallikusqanmanta, nispa.

⁸Señor Diosmi Moisesta nirqan:

⁹— Aaronta churinkunatawan kamachimuy: Kaymi ruphachina sacrificiopaq kamachikuy simiqa: Ruphachina sacrificioqa tutantinmi altar patapi kashanqa, altarpi ninaqa rawrashallanqapunin.

¹⁰Sacerdoteqa lino p'achantan churakunqa, lino calzoncillotan ukhunmanpas churakunqa. Ruphachina sacrificiota nina ruphapuqtintaqmi payqa altarmanta usphata hoqarispa altar qayllaman churaykunqa.

¹¹Chaymantataq p'achanta ch'utikuspa wak p'achawan churakunqa, hinaspan karpa-karpa hawaman usphata apanqa mana qhelliyoq cheqasman.

¹²Altar patapi hap'ichisqa ninaqa aman wañunqachu, aswanpas sapa tutamantan sacerdoteqa chayman llant'ata churanqa, chay patamantaq ruphachina sacrificiota churaykunqa, hinaspanmi chay patapi ruphachinqa sumaq kawsay ofrenda wirata.

¹³Altarpi ninaqa rawrashallanqapunin. Aman wañunqachu.

¹⁴Kaymi ruru ofrendapaq kamachikuy simiqa: Aaronpa churinkunan chayta Señor Diospa ñawpaqenpi haywanqaku, altarpa chimpanpi.

¹⁵Hinaspan ruru ofrendamanta hapt'ay ñut'u hak'uta hoqarinqa aceitentawan llapa inciensontawan. Chaytan altar patapi ruphachinqa llapallanta Señor Diosman apamusqa kasqanta yuyarinapaq, sumaq q'apaynintaq Señor Diospa sonqonman chayanqa.

¹⁶Ofrendamanta puchuqtataq Aaronqa churinkunapiwan mana qonchuyoqta mikhunqaku, ch'uya cheqaspi Dioswan Tupana Karpa kanchapi.

¹⁷Mana qonchuyoq chayachisqatan mikhunqaku. Paykunamanmi chayta qoni mikhuna ofrendaykunamanta tupaqninkuta. Chayqa ancha ch'uyan, hucha pampachaypaq ofrenda hina, kutichipuna ofrenda hina.

¹⁸Aaronpa mayqen churinpas chaytaqa mikhullanmanmi. Chayqa Señor Diospaq mikhuna ofrendakunan, Aaronpa mirayninman tupaqllapunin kashanqa. Tukuy imapas chaykunata tupaykuqqa ch'uyan kapunqa, nispa.

¹⁹Señor Diosmi Moisesta nirqan:

²⁰— Kay ruru ofrendatan Aaronpas churinkunapas ñoqaman haywawanqaku hawisqa kasqanku p'unchaypi. Iskay kilo ñut'u hak'utan apamunqaku sapa p'unchay ruru ofrendata apamusqankuta hina. Tutamanta kuskanta haywawanqaku, ch'isintataq huk kuskanta.

²¹Sartenpin ruwanqaku aceitewan allin q'apisqata, hinaspan p'akirqarisqata ruru ofrendata hina ñoqaman haywawanqaku, sumaq q'apayninpas sonqoymanmi chayamunqa.

²²Taytan Aaronpa rantinpi hawisqa sacerdotepas chay hina ofrendallatataq haywawanqa. Chayqa chaskinaypaq tupaqllapunin, llapallanmi chayqa ruphachisqa kanqa, kay kamachikuytaqa wiñaypaqmi ruwallankichispuni.

²³Sacerdoteq ima ruru ofrendanpas llapachallanmi ruphachisqa kanqa, manan chaytaqa pipas mikhunqachu, nispa.

²⁴Señor Diosmi Moisesta nirqan:

²⁵— Aarontawan churinkunatawan nimuy: Kaymi hucha pampachaypaq sacrificio haywanapaq kamachikuy simiqa: Mayneqpichus ruphachina sacrificio nak'akun, chaypin hucha pampachay ofrendaqa Señor Diospa ñawpaqenpi nak'akullanqataq. Chay ofrendaqa ancha ch'uyan.

²⁶Haywaq sacerdoten Dioswan Tupana Karpapi chayta mikhunqa, chay kanchaqa ch'uyan.

²⁷Imapas ofrenda aychata tupaykuqqa ch'uyan kanqa. Yawarnintaqchus p'achanman ch'allaykunqa chayqa, chay p'achatan karpaq ch'uya kanchanpi t'aqsanqaku.

²⁸Wayk'usqanku t'uru mankataqmi p'akisqa kanqa, bronce mankapitaqchus wayk'urqanku chayqa, qhetuspa unuwan maqchisqan kanqa.

²⁹Mayqen sacerdoteq churinpas chaytaqa mikhullanmanmi. Chay ofrendaqa ancha ch'uyan.

³⁰Hucha pampachaypaq ofrendaq yawarnintan ichaqa Dioswan Tupana Karpaman apaykunqa. Ch'uya Cheqaspi hucha pampachaypaq haywananpaqmi chayqa, manan chay ofrendataqa mikhunqachu, ninapi ruphachisqan kanqa.