Read DIOSPA QHELQACHISQ Quechua LEVÍTICO 7 Bible Online

LEVÍTICO 7 - DIOSPA QHELQACHISQ Quechua bible

LEVÍTICO 7

¹Kaytaqmi kutichipuna ofrendamanta kamachikuy simiqa. Chay ofrendaqa ancha ch'uyan.

²Mayneqpichus ruphachina sacrificio nak'akun chaypin kutichipuna ofrendata nak'anqa, yawarnintataq altar muyuriq qhataman hich'aykunqa.

³Chay ofrendaq wirantataq llapanta haywanqa, chupanta, wiksa llika wirata,

⁴iskaynin rurunta, chaykuna qayllapi ñañu wasa wirata, sullk'a k'ipchantawan.

⁵Hinaspan sacerdoteqa chaykunata altar patapi ruphachinqa, Señor Diospaq mikhuna ofrendata. Chayqa kutichipuna ofrendan.

⁶Sacerdoteq mayqen churinpas chaytaqa mikhullanmanmi, karpaq ch'uya kanchanpin mikhunqaku. Chay ofrendaqa ancha ch'uyan.

⁷Imaynan hucha pampachaypaq sacrificio, ahinallataqmi kutichipuna ofrendapaqpas, kaqkama kamachikuy simillan iskayninpaqpas kanqa. Hucha pampachachiq sacerdotepaqmi chay animalpa aychanqa kanqa.

⁸Piqpa ruphachina sacrificiontapas haywaq sacerdoteqa chay animalpa qarantan hap'ikapunqa.

⁹Hinallataqmi hornopi chayasqa ima ruru ofrendapas, sartenpi chayasqa ruru ofrendapas, mankapi theqtisqa hak'u ofrendapas haywaq sacerdotepaqmi kanqa.

¹⁰Aceiteyoq chapusqapas mana aceiteyoqpas llapa hanku ruru ofrendaqa Aaronpa llapa churinkunapaqmi kanqa, sapankapaqpas kaqkamalla.

¹¹Señor Diosman haywana sumaq kawsay ofrendapaq kamachikuy simiqa kaymi:

¹²Señor Diosta agradecekuspachus sumaq kawsay ofrendata haywanqa chayqa, animaltawanmi haywanqa aceitewan chapuspa mana qonchuyoq t'antakunata, aceitewan llusisqa mana qonchuyoq llaphllallaña t'antakunata, aceiteyoq allin q'apisqa ñut'u hak'u tortakunatawan.

¹³Qonchuyoq t'antakunatawanmi chay agradecekuy sumaq kawsay ofrendantapas haywallanqataq.

¹⁴Sapanka rikch'aq t'antamantan huktakama Señor Diospaq t'aqanqa, chay t'aqasqatataq sumaq kawsay ofrendaq yawarninta hich'aykuq sacerdoteman qopunqa.

¹⁵Chay sumaq kawsay ofrendaq aychantataq haywasqa kasqan p'unchaypi mikhunqaku, manan imatapas qhepantin p'unchaypaqqa saqenqakuchu.

¹⁶Pipas ofrendata apamunqa prometekusqanta hunt'aspa otaq tukuy sonqonmanta qospa chayqa, sacrificionta haywasqan p'unchaypin mikhunqaku, chaymanta puchuqtataq qhepantin p'unchay mikhunqaku.

¹⁷Chaymantapas kinsakaq p'unchaykama puchuqtataq ruphachipunqaku.

¹⁸Sumaq kawsaypaq sacrificasqa aychatachus kinsakaq p'unchaypi mikhunqa chayqa, haywaqtaqa manan Diosqa chaskinqachu, manan haywaqpaqpas allinninpaqchu kanqa. Aswanpas qhelli aychan kanqa, pipas chayta mikhuqqa muchuchisqan kanqa.

¹⁹Ima qhelliqpas tupaykusqan aychataqa aman mikhunqakuchu, aswanpas ruphachisqan kanqa. Pipas ch'uya kashaqllan aychataqa mikhunqa.

²⁰Pipas qhelli kashaspa Señor Diosman haywasqa sumaq kawsay ofrenda aychata mikhunqa chayqa, llaqtan ukhumantan qarqosqa kanqa.

²¹Pipas runaq ima qhellintapas, qhelli animaltapas, ima millay qhellitapas tupaykuspa, Señor Diosman haywasqa sumaq kawsay ofrenda aychata mikhunqa chayqa, llaqtan ukhumantan qarqosqa kanqa, nispa.

²²Señor Diosmi Moisesta nirqan:

²³— Israel runakunata nimuy: Aman waka wiratapas, oveja wiratapas, cabra wiratapas mikhunkichischu.

²⁴Wañusqa animalpa wiranqa, phiña animalpa llik'irqarisqan animalpa wiranpiwanqa imapaqpas kapuchun, ichaqa aman chaytaqa mikhunkichischu.

²⁵Pipas Señor Diosman mikhuna ofrenda hayway atina animalpa wiranta mikhunqa chayqa, llaqtan ukhumantan qarqosqa kanqa.

²⁶Chaymantapas, amallataqmi may tiyasqaykichispipas ima yawartapas mikhunkichischu, phalaq animalkunaqtapas uywakunaqtapas.

²⁷Pipas ima yawartapas mikhunqa chayqa, llaqtan ukhumantan qarqosqa kanqa, nispa.

²⁸Señor Diosmi Moisesta nirqan:

²⁹— Israel runakunata nimuy: Pipas sumaq kawsay ofrendata Señor Diosman haywanqa chayqa, chay ofrendanmantan wakinta Señor Diospa ñawpaqenman apaspa sumaq sonqota hina haywanqa.

³⁰Makinwanpunin apamunqa Señor Diospaq mikhuna ofrendakunata. Wiratan pechontawan apamunqa, pechontaqa maywisqa sacrificiota Señor Diosman haywananpaq.

³¹Wirataqa altarpin sacerdote ruphachinqa, pechontaqmi Aaronpaq churinkunapaqwan kanqa.

³²Sacerdotemanmi qollankichistaq sumaq kawsay ofrendaq paña chakanta paypaq t'aqasqa ofrendata hina.

³³Mayqen sacerdotepas sumaq kawsay ofrendaq yawarninta wirantawan haywaqqa paña chakantan hap'ikunqa.

³⁴Israel runakunaq sumaq kawsay ofrendankunamantan maywisqa kaq pechonta chakantawan t'aqaspa Aaronman churinkunamanwan qorqan, kayqa Israel runakunapaq wiñay kamachikuymi kanqa, nispa.

³⁵Chaykunatan Señor Diospaq mikhuna ofrendakunamanta Aaronman churinkunamanwan tupaqta qorqanku, Señor Diospa sacerdoten kanankupaq churasqanku p'unchaypi.

³⁶Chay hawisqanku p'unchaypin Señor Diosqa Israel runakunata kamachirqan chaykunata qonankupaq. Chaykunataqa wiñaypaqmi mirayninkuna qoshallanqakupuni.

³⁷Chaykunan kamachikuy simikunaqa ruphachina ofrendapaq, hucha pampachay ofrendapaq, kutichipuna ofrendapaq, sacerdote churana ofrendapaq, sumaq kawsay ofrendapaqwan.

³⁸Chaykunatan Señor Diosqa Sinaí orqopi Moisesman kamachirqan Señor Diosman ofrendakunata haywanankupaq, Israel runakunata Sinaí ch'inneqpi kamachisqan p'unchay.