Read DIOSPA QHELQACHISQ Quechua LEVÍTICO 9 Bible Online

LEVÍTICO 9 - DIOSPA QHELQACHISQ Quechua bible

LEVÍTICO 9

¹Pusaqkaq p'unchaypin Moisesqa waqyarqan Aaronta churinkunata, Israel kurak runakunatawan.

²Hinaspan Aaronta nirqan: — Mana imanasqa torillota hucha pampachay ofrendapaq hap'iy, mana imanasqa anejotataq ruphachina sacrificiopaq, hinaspa chaykunata Señor Diosman hayway.

³Israel runakunatan ninki: Orqo cabrata hucha pampachay ofrendapaq hap'iychis, hinallataq watayoq mana imanasqa torillotapas watayoq mana imanasqa borregotapas ruphachina sacrificiopaq.

⁴Hap'illaychistaq sumaq kawsay ofrendapaq huk torota huk anejotawan. Chaykunatan Señor Diosman haywankichis aceiteyoq chapusqa ruru ofrendatawan. Kunanmi Señor Diosqa rikhurisunkichis, nispa.

⁵Chaymi Moisespa kamachikusqan kaqkunata aparqanku Dioswan Tupana Karpaq ñawpaqenman, llaqtantintaq asuykuspa Señor Diospa ñawpaqenpi sayaykurqanku.

⁶Hinaqtinmi Moisesqa nirqan: — Señor Diosmi kay hinata ruwanaykichispaq kamachirqasunkichis paypa lliphlli-kaynin rikhurinasuykichispaq, nispa.

⁷Hinaspan Moisesqa Aaronta nirqan: — Altarman qayllaykuy, hucha pampachay ofrendata hayway, ruphachina sacrificiotapas, huchaykipas llaqtaq huchanpas pampachasqa kananpaq. Haywallaytaq llaqtaq huchan pampachay ofrendatapas, Señor Diospa kamachikusqanman hina, nispa.

⁸Aaronmi altarman asuykurqan, hinaspan pay kikinpa huchan pampachasqa kananpaq torillota nak'arqan.

⁹Aaronpa churinkunataq taytankuman yawarta apamurqanku, Aarontaq yawarman dedonta challpuykuspa altar waqrakunata llusiykurqan, wakin yawartataq altar chakiman hich'aykurqan.

¹⁰Hinaspan altar patapi ruphachirqan hucha pampachay ofrendaq wiranta, rurunkunata, sullk'a k'ipchantawan, Moisesta Señor Diospa kamachisqanman hina.

¹¹Ichaqa aychatawan qaratawantaq karpa-karpa hawapi kanaykurqan.

¹²Aaronqa nak'allarqantaqmi ruphachina sacrificiotapas, churinkunataq yawarta payman haywarqanku, chaytan payqa altar muyuriq qhataman hich'aykurqan.

¹³Chay qhepatataq kuchurqarisqa ruphachina sacrificiota ch'ulla-ch'ullamanta payman haywarqanku, umantapas haywallarqankutaq, paytaq chaykunata altar patapi ruphachirqan.

¹⁴Chaymantataq ch'unchulkunatapas chakinkunatapas maqchispa, altarpi ruphachina sacrificio patapi ruphachirqan.

¹⁵Haywallarqantaqmi llaqtaq ofrendantapas. Llaqtaq huchan pampachasqa kananpaqqa orqo cabratan hap'irqan, hinaspan chayta nak'aspa ñawpaqkaq sacrificiota hina hucha pampachaypaq haywarqan.

¹⁶Chaymantataq ruphachina sacrificiota llaqtapaq haywarqan, maychus ruwanaman hinataq ruwarqan.

¹⁷Haywallarqantaqmi ruru ofrendatapas, chaymanta hapt'arikuspataq altar patapi ruphachirqan tutamanta ruphachina sacrificiotawan kuska.

¹⁸Hinallataq sumaq kawsay ofrenda torotapas anejotapas llaqtapaq nak'arqan. Churinkunataq payman yawarta haywarqanku, chaytan payqa altar muyuriq qhataman hich'aykurqan.

¹⁹Hinaspan toro wirata, anejo wiratawan, chupanta, wiksa llika wirata, rurunkunata, sullk'a k'ipchantawan,

²⁰nak'asqakunaq pechonman churaykurqan, hinaspan payqa altar patapi wirakunata ruphachirqan.

²¹Señor Diosmantaq pechonkunata paña chakankunatawan hap'ispa Aaronqa maywispa Señor Diospaq haywarqan, chaymi maywisqa ofrenda, Moisesta Señor Diospa kamachisqanman hina.

²²Chaymantataq Aaronqa llaqtaman makinta haywarispa samincharqan. Hucha pampachaypaq ofrendata, ruphachina sacrificiota, sumaq kawsay ofrendatapas haywasqa qhepatataq uraykurqan.

²³Hinamantataq Moiseswan Aaronwan Karpapi Ch'uya Cheqasman haykurqanku, lloqsispataq llaqtata samincharqanku. Hinan Señor Diospa lliphlli-kayninqa llaqtantinman rikhurirqan.

²⁴Señor Diostaq ninata kachamurqan,[2] hinan altar patapi rupharparirqan ruphachina sacrificiota wirakunantinta. Llaqtallantin chayta rikuspataq kusisqa qaparirqanku, hinaspan pampakama k'umuykurqanku.