Read DIOSPA QHELQACHISQ Quechua JEREMÍAS 1 Bible Online

JEREMÍAS 1 - DIOSPA QHELQACHISQ Quechua bible

JEREMÍAS 1

¹Kay qelqan willakun Hilciaspa churin Jeremiaspa rimasqankunata ruwasqankunatawan. Jeremiasqa Benjamín ayllu hallp'api Anatot llaqtamantan karqan, ayllunkunaqa sacerdotekunan karqan.

²Señor Diosmi Jeremiasman rimaykurqan Amonpa churin Josías chunka kinsayoq watapiña Judapi rey kashaqtin.

³Chaymantapas rimaykullarqantaq Josiaspa churin Joacim Judapi rey kashaqtin. Rimaykullaqtaq Josiaspa churin Sedequías Judapi chunka hukniyoq wata rey kanankama. Chay wataq phisqa killanpitaq Jerusalén llaqta runakunaqa Babilonia suyuman kamachipaq apasqa kapurqanku.

⁴Señor Diosmi kay hinata niwarqan:

⁵Mamaykiq wiksanpi manaraq kashaqtiykin akllakurqayki, manaraq nacemushaqtiykin t'aqakurqayki, hatun suyukunapaq profeta kanaykipaqmi churarqayki, nispa.

⁶Ñoqataq nirqani: ¡Ay, Apu Señor Diosníy! Sinchi waynallaraqmi kani, manan rimaytapas yachaniraqchu, nispa.

⁷Señor Diostaq ichaqa niwarqan: Ama sinchi waynallaraqmi kani, niychu. Maytachus “riy” nisqaytan rinki, ñoqaq kamachisqaytataqmi rimamunki.

⁸Aman pitapas manchakunkichu, ñoqan qanwan kashani waqaychanaypaq. Ñoqa Señor Diosmi chayta nini.

⁹Chaymantataqmi Señor Diosqa makinta haywarimuwaspa simiyta tupaykuwarqan, niwarqantaq: Ñoqan simiykiman simiyta qoyki rimanaykipaq.

¹⁰Kunanmi huk kamachikuqta churayki hatun suyukunamanpas huch'uy suyukunamanpas, qanmi t'irankipas kumpankipas, qanmi chhallunkipas ñut'unkipas, qantaqmi sayarichinkipas takyachinkipas, nispa.

¹¹Señor Diosqa nillawarqantaqmi: Jeremías, ¿imatan rikushanki? nispa. Ñoqataq kutichirqani: Almendro[1] mallki k'allmatan rikushani, nispa.

¹²Señor Diostaq niwarqan: Allintan rikusqanki, ñoqaqa qhawashallasaqpunin simiykuna hunt'akunantaqa, nispa.

¹³Wakmantan Señor Diosqa tapuykuwarqan: — ¿Imatan rikushanki? nispa. Ñoqataq kutichirqani: — T'impushaq mankatan rikushani, wichay ladomanta kaykamaraq wasapasqan chayamushaqta, nispa.

¹⁴Señor Diostaq niwarqan: Wichay ladomantan wasapamunqa hatun llakikuna llapan kay suyupi tiyaq runakunaman.

¹⁵Ñoqa kikiymi waqyashani llapan wichay lado suyu ayllukunata hamunankupaq. Ñoqa Señor Diosmi chayta nini. Reykunan hamunqaku, Jerusalenman haykuna kikin punkukunapin kamachikuy tiyanankuta wakichikunqaku. Llaqta muyuriq perqa contran kanqaku, Judá llaqtakunatan muyuykunqaku.

¹⁶Ñoqan llaqtayta muchuchisaq saqerpariwasqanku huchankumanta, paykunan wak dioskunaman inciensota q'apachirqanku, paykunaq ruwasqanku idolokunatan yupaycharqanku.

¹⁷Qanqa allintapuni chumpiykita wataykukuy, sayariy, ñoqaq kamachisqay simita llapanta willamuy. Aman mancharikunkichu, mancharikunkichus chayqa, ñoqan paykunaq ñawpaqenpi khatatatachisqayki.

¹⁸Kunanmi qanta tukuchiyki allin kallpachasqa llaqtata hina, fierromanta wasi tusata hina, broncemanta perqata hina, Judá reykunawan, umalli runakunawan, sacerdotekunawan, llapan runakunawanpas churanakunaykipaq.

¹⁹Paykunan contraykipi sayarinqaku, ichaqa manan atipasunkikuchu, waqaychanaypaq qanwan kashasqayrayku. Ñoqa Señor Diosmi chayta nini.