Read DIOSPA QHELQACHISQ Quechua JEREMÍAS 11 Bible Online

JEREMÍAS 11 - DIOSPA QHELQACHISQ Quechua bible

JEREMÍAS 11

¹Señor Diosmi niwarqan:

²Rimanakusqay simita uyarispa Judá runakunaman Jerusalenpi tiyaqkunamanwan willay:

³Israelpa Diosnin Señormi nin: Kay rimanakuyta mana kasukuq runaqa llapanmi ñakasqa kanqa.

⁴Ñawpa taytaykichispaqmi Egipto llaqtaqa fierro unuyachina horno hina karqan, chaymanta horqomushaspaymi paykunawan rimanakuspa nirqani: Uyariwaychis llapan nisqayta, kasuwaychistaq kamachisqaytapas. Chay hinapin qankunaqa llaqtay kankichis, ñoqataq Diosniykichis kasaq.

⁵Ahinapin ñawpa taytaykichisman juraspa prometesqayta hunt'anay kanqa, paykunamanmi lecheq miel misk'iq askha kasqan hallp'ata qoyta prometerqani, imaynan kunan p'unchay qoshaykichis hinata, nispa. Ñoqataq kutichirqani: Arí, Señor Diosníy. Chay hinapuni kachun, nispa.

⁶Hinan Señor Diosqa nillawarqantaq: Kayta willaykuy Judá suyu llaqtakunapi Jerusalén callekunapipas. Uyariychis kay rimanakusqa simikunata, hinaspa hunt'aychis.

⁷Ñawpa taytaykichiskunata Egiptomanta horqomushaspaymi, allin-allinta ñawpaqmanta paykunaman willarqani kasuwanankupaq, kunan p'unchaykamapas llaqtaymanqa willapayashallanipunin.

⁸Ichaqa manan kasuwarqankuchu, manataq uyariwarqankupaschu, aswanmi sapankanku sonqonkuq millay kasqanman hina purirqanku. Manapunin hunt'ayta munarqankuchu rimanakusqayman hinaqa, chaymi imaynan rimanakusqanchispi karqan ñak'arichinaypaq chayta hunt'arqani, nispa.

⁹Señor Diosqa nillawarqantaqmi: Judá runakunaqa Jerusalenpi tiyaqkunapiwanmi ñoqa contra rimanakuspa,

¹⁰kasqan ñawpa taytankuq hucha ruwasqanman kutiripurqanku, paykunaqa manan uyariwayta munarqankuchu, aswanmi wak dioskuna yupaychaq ripushanku. Judá llaqtan Israel llaqtapiwan ñawpa taytankuwan rimanakusqayta p'akipunku.

¹¹Chayraykun paykunaman kachamusaq mana ayqey atinankupaq hatun llakita. Hinan waqyakamuwanqaku yanapanayta munaspa, manataqmi uyarisaqchu. Ñoqa Señor Diosmi chayta nini.

¹²Chaymantataq Judá runakunaqa Jerusalén runakunapiwan sacrificio ruphachisqanku dioskunaman rispa yanapayta mañakunqaku, chaykunaqa manataqmi qespichiyta atinqachu hatun llaki chayamuqtinqa, nispa.

¹³Señor Diosmi llaqtanta nirqan: Yaw, Judá, askha llaqtaykiq kasqanman hinan askha diosniykikunaqa, imaynan Jerusalén callekunaqa askha, chay hinallataqmi millay Baal diosman sacrificio ruphachina altarniykipas askha qanpa p'enqayniykipaq, nispa.

¹⁴Chaymi Señor Diosqa nillawarqantaq: Qanqa aman chay runakunapaq valepakuwankichu, manan paykunataqa uyarisaqchu hatun llakipiña rikukuqtinkupas, nispa.

¹⁵Señor Diosmi llaqtanta nillarqantaq: Sumaq wayllusqay llaqtalláy, qanqa millaykunatan ruwashanki, chayri, ¿imañataq ruwanayki ñoqa yupaychana wasipiri? ¿Qanqa yuyankichu aychakuna haywamuwasqaykiwan prometekusqaykipiwan hatun llakimanta pakakuyta? ¿Yuyankichu chayta ruwaspa kusikuyta?

¹⁶Huk p'unchaymi sutiyarqayki sumaq llanllashaq rurusapa olivo mallkita, kunantaqmi chikchi t'oqyaq hinaraq rawrarispa raphiykikunata ruphasaq, k'allmaykikunatapas p'akisaq.

¹⁷Tukuy-atiyniyoq Señor Diosmi plantarqasunki, kunantaqmi ichaqa qankuna contra hatun llakita kachamushan. Qankunan, Israelpiwan Judapiwan, mana chaninta ruwaspa Baal dioskunaman sacrificiota haywaspaykichis phiñachirqankichis, nispa.

¹⁸Señor Diosmi willaykuwarqan awqaykunaq mana allin ruway yuyaykuwasqankuta, paymi ñawiyta kichariwarqan chayta reparanaypaq.

¹⁹Ñoqaqa llakhillan kasharqani, nak'anaman apanapaq borrego hina, mana allin ruwanawankuta mana yachaspa. Paykunaqa nisharqankuñan: Chay mallkita q'omerllaraq kashaqtin wit'urqapusun, mana pipas paymanta yuyarinanpaq hukpaqkama chinkachipusun, nispa.

²⁰Ñoqan mañakurqani: Tukuy-atiyniyoq Señor Diosnilláy, qanmi chanin juzgaq kanki, qanmi runaq yuyaynintaqa llapanta yachanki, makiykimanmi kawsayniyta hap'iykachimurqayki, qanpuni rikuchiway chay runakuna muchuchisqaykita, nispa.

²¹Anatot runakunan wañuchiyta munaspa niwarqanku: Aman Señor Diospa sutinpi rimankichu, mana chayqa wañurqachisqaykikun, nispa.

²²Chaymi Tukuy-atiyniyoq Señor Diosqa paykunamanta nirqan: Cheqaqtapunin paykunataqa ñak'arichisaq. Waynakunan maqanakuypi wañuranqaku, churinkuwan ususinkuwantaqmi yarqaymanta wañuranqaku,

²³manataq hukllapas paykunamanta qhepaq kanqachu. Chayamunqan wañurananku wataqa, chaypitaqmi ñoqa pasaqtapuni ñak'arichisaq, nispa.