Read DIOSPA QHELQACHISQ Quechua JEREMÍAS 12 Bible Online

JEREMÍAS 12 - DIOSPA QHELQACHISQ Quechua bible

JEREMÍAS 12

¹Señor Diosníy, qanwan churanakuytaqa manan atiymanchu, qanpunin chaninqa rikhurinki. Chaytukuywanpas tapurikuytan munayki, imanaqtinchus mana chaninkuna kasqanmanta. ¿Imanaqtintaq millay runakunaqa allinpuni kanku? ¿Imanaqtintaq runamasin hap'iykachiqkunaqa kusisqa tiyakunku?

²Qanmi plantanki, paykunataq saphirinku, wiñaspataq rurunku. Simillankuwanmi yupaychashasunkiku, sonqonkumantan ichaqa karupi kashanki.

³Ñoqatan ichaqa reqsiwankipuni, Señor Diosníy, qanqa rikuwankin yachankitaqmi, imaynachus sonqoy qanpaq kasqanta. Chay runakunata ovejata hina nak'anaman apay, wañurqarichina p'unchaypaq señalaykuy.

⁴¿Hayk'aqkamataq hallp'aqa ch'akilla kanqa? ¿Hayk'aqkamataq pampapi qorakunapas tuntinqa? Animalkunapas, phalaq animalkunapas lliwmi wañupushan, chay suyu runakunaq millay ruwasqan hawa, paykunaqa ninkun: Ruwasqanchistaqa manan Diosqa rikunchu, nispa.

⁵Señor Diostaq niwarqan: Chakipi phawaq runakunaq qhepanta phawaspallaraq sayk'unki chayri, ¿imaynataraqtaq sayk'uwaq caballopi phawaqwan phawaspari? Thak kawsay llaqtapi kashaspapas mana imatapas reparankichu chayri, ¿imaynañataq kapuwaq Jordanpa sach'a-sach'a wayq'onpiri?

⁶Aylluykimanta wawqeykikunallaraqtaqmi wañuyman hap'iykachisunkiku, qhepaykipi qaparkachamuspataq qatiykachashasunkiku. Chayrayku, ama paykunaman hap'ipakuychu, sumaq simiwanña rimapayashaqtinpas, nispa.

⁷Señor Diosmi nillarqantaq: Llaqtaytaqa saqerparipurqanin, akllakusqaytaqa wikch'upurqanin, ñoqan chay sinchi munasqaytaqa awqanpa makinman hap'iykachirqani.

⁸Akllakusqay llaqtaymi kutipakuwarqan, yunkapi león hinaraqmi contrayta qaparirqan, chayraykun cheqnikapuni.

⁹Llaqtayqa sumaq color phuruyoq phalaq animal hinan, aycha mikhuq ankakunaq muyuykusqan. ¡Waqyamuychis llapan salqa animalkunata mikhuq hamunankupaq!

¹⁰Askha michiqkunan uvas chakrayta chaqoykurqanku, hallp'aytapas saruykurqanku. Sumaq munasqay hallp'aytan pasaq purunman tukuchirqanku.

¹¹Sinchi ch'usaqtan tukuchirqanku, waqanapaq hina kashaqtan rikushani. Llapan suyun ch'usaqyachisqa kapushan, manataqmi pimanpas imapas qokunchu.

¹²Llapan ch'inneqpi pata pampakunamanmi llat'anaqkuna wakwaykurqanku, chaykunaqa Señor Diospa espadanmi suyuntinpi k'uchunmanta-k'uchunkama wañuchinanpaq, manataqmi pipaqpas thak-kay kanqachu.

¹³Trigotan t'akarqanku, khiskallatataq hoqarirqanku, ñoqaq rawrashaq phiñakuyniy hawa. Lliw ima llank'asqankupas yanqakaman karqan, mikhuy hoqariypitaq p'enqasqa kanqaku, nispa.

¹⁴Señor Diosmi nirqan: Israelpa qayllanpi tiyaq millay llaqtakunamanmi rimapayayta munashani. Paykunan llaqtayman hallp'anku kananpaq qosqayta purunyachirqanku. Paykunatan suyunkumanta wikch'usaq, chaykuna ukhumantataqmi Judá llaqtayta horqokapusaq.

¹⁵Wikch'usqay qhepatataqmi paykunata khuyapayasaq, hinaspan kutichimpusaq kaqta llaqtanman hallp'anmanwan.

¹⁶Ñawpaqmi llaqta-masinkunaqa llaqtayta yachachirqan Baalpa sutinpi jurayta, kunantaq ichaqa llaqtaywan tiyanankupaq kaykunata ruwananku: Imaynan llaqtayqa serviwan, chay hinatan serviwananku, kaqllataq ñoqaq sutiypi jurananku.

¹⁷Mana kasukuq llaqtatan ichaqa saphinmanta t'iraspa wikch'upusaq, nispan nin Señor Diosqa.