Read DIOSPA QHELQACHISQ Quechua JEREMÍAS 17 Bible Online

JEREMÍAS 17 - DIOSPA QHELQACHISQ Quechua bible

JEREMÍAS 17

¹Yaw, Judá, huchaykiqa fierro cincelwan qelqasqan kashan, sonqoykipi huk qaqapi hina ch'ila umiñaq ñawch'inwan k'awaspa qelqasqa, altarniykikunaq waqranpipas k'awaspa qelqasqa.

²Wawaykikunan altarniykikunapi yupaychanku, orqo patakunapi, sapanka q'omer mallki chakikunapi, alto orqo patakunapi Asera diosakunata yupaychanku,

³campopi kaq moqo patakunapipas yupaychanku. Kaqniykikunata qhapaq kayniykitawan suwawan apachispan tukuy hinantinpi huchallikusqaykimanta pagachisqayki.

⁴Mana thanispa nina rawray hinan phiñakuyniyqa rawrashan, chayraykun qanman qosqay hallp'amantaqa munay mana munay lloqsinki, mana reqsisqayki hallp'apin awqaykiq kamachin ruwaqta churasqayki.

⁵Señor Diosmi nin: Ñakasqan kashan pipas ñoqamanta t'aqakuqqa, runamasinman hap'ipakuqqa, wañuq runallaman hap'ipakuqqa.

⁶Ch'aki pampapi kanlli hinan mana hayk'aq allin wiñaq, chay runaqa mana unuq kanan purunpin tiyan, kachi-kachi pampapin tiyan.

⁷Saminchasqa kachun ñoqaman hap'ipakuq runaqa, ñoqa Señor Diospi suyakuqqa.

⁸Mayu patapi wiñaq sach'a hinan kashan, unu ukhumanmi saphiykunpas. Ruphay tiempo chayamuqtinpas manan manchakunchu, raphinpas q'omerllapunin kashan, chiraw mitapipas manan naq'enchu, tukuy tiempotaq rurushallanpuni.

⁹Runaq sonqonqa tukuy imamantapas aswan q'otukuqmi, millay ruwaqtaq kanpas, ¿pitaq chay sonqotari reqsinman?

¹⁰Ñoqa Señor Diosmi sonqotaqa t'aqwini, tukuy yuyaykusqakunatapas probani. Sapanka hukmantaq kawsasqanman hina qoni, ruwasqankuman hinapunin kutichini, nispa.

¹¹Suwakuspalla qhapaqyaqkunaqa mana runtusqanta oqllaq p'isaqa hinan, allin kallpanpi kashallasparaqmi qhapaq kayninta chinkachikapunqa, qhepamantaq mana yuyayniyoqman tukupunqa.

¹²Ñoqanchispa yupaychananchis wasiqa qhapaq kamachikuy tiyanan, qallariymantapacha orqo patapi churaykusqa.

¹³Señor Diosníy, qanqa Israelpa hap'ipakunanmi kanki, qanta llapan qonqarpariqkunaqa p'enqachisqan kanqaku. Qanmanta llapan karunchakuqqa hallp'api qelqasqa suti hinallan chinkarqapunqa, qan, cheqaq ch'uya unu pukyu kashaqtiyki wikch'usqasuykimanta.

¹⁴Señor Diosníy, qanpuni hampiway, qhaliyasaqmi, qanpuni qespichiway, qespichisqataq kasaq, Señor, qanllapunin yupaychanayqa kanki.

¹⁵Qhawariy, runakunan niwan: ¿Maytaq Señor Diospa siminri, hunt'akushanchu? ¡Kunanpachayá hunt'akuchun! nispa.

¹⁶Chaywanpas manan tanqarqaykichu llakikuy p'unchayta kachamunaykipaq, manan munarqanichu paykunaq hatun llakipi kanankuta, chaymantaqa qanmi yachanki, rimasqaytapas qanmi uyarirqanki.

¹⁷Ama ñoqapaq phiña mancharikuyraq kaychu, qanqa llakikuy p'unchaypi pakaykukunaymi kanki.

¹⁸Qatiykachawaqniykunaqa p'enqachisqa kachun, ama ñoqaqa, paykuna q'aqchasqaqa kachun, ama ñoqaqa, paykuna pataman llakikuykuna chayamuchun, hukpaqkama paykunata chinkachipuy kuti-kutirisparaq, nispa.

¹⁹Señor Diosmi niwarqan: Phaway, suyaykamuy Judá reykunaq lloqsinan haykunan “Llaqta Punku” nisqapi, kaqllatataq ruwanki Jerusalenpa wakin punkunkunapipas.

²⁰Ninkitaq: Punkunta haykuq Judá reykuna, Judá runakuna, Jerusalenpi tiyaqkuna, uyariychis Señor Diospa siminta.

²¹Paymi nin: Kawsaytachus munankichis chayqa, samana p'unchaypiqa ama q'epita q'epiychischu, amataq kay Jerusalén punkuntapas apaykuychischu.

²²Samana p'unchaypiqa amapuni ima q'epillatapas wasiykichismanta horqomuychischu, amataq ima llank'anatapas ruwankichischu. Samana p'unchaytaqa t'aqapuwaychis, imaynatachus ñawpa taytaykichiskunata kamachisqayman hina.

²³Chaywanpas paykunaqa manapunin kasukurqankuchu, manataq uyarikurqankupaschu, aswanraqmi rumi sonqoman tukurqanku mana uyarinankupaq.

²⁴Ñoqa Señor Diosmi nini: Cheqaqtapuni kasuwankichis chayqa, samana p'unchaypipas manapuni ima q'epitapas kay punkunta apaykunkichischu chayqa, kay p'unchaytapas ñoqapaqpuni t'aqapuwankichis chayqa, manataq ima llank'anaykichistapas ruwankichischu chayqa,

²⁵Davidpa kamachikuy tiyananpi tiyaq reykunapas umalli runankunapas haykunqan kay llaqtaq punkunkunata. Judá runakunapas Jerusalenpi tiyaqkunapas haykunqakun, carretakunapi caballokunapi ima. Jerusalenpi wasikunapas kallanqapunin.

²⁶Jerusalenmanqa hamunqakun muyuriqninpi tiyaqkuna, Judá llaqtakunaq runankunapas, Benjamín ayllumantapas, Shefela moqo-moqomantapas, orqo-orqomantapas, Neguev ch'inneqmantapas. Paykunan apamunqaku Dios yupaychana wasiman ruphachinapaq uywakunata, wak sacrificiokunata, ruru ofrendakunata, inciensota, gracias qoy ofrendakunatawan.

²⁷Chay hinaqa, kasuwankichismi, samana p'unchaytapas ñoqapaqmi t'aqapuwanaykichis, samana p'unchaypipas manan q'epintinchu Jerusalenman haykunaykichis, mana chay hinata ruwaqtiykichisqa ñoqan ninawan kanaykusaq Jerusalén llaqta punkukunata, hinan ninaqa qhapaq wasikunatapas ruphaykunqa, manataq pipas nina sipiyta atinqachu, nispa.