Read DIOSPA QHELQACHISQ Quechua JEREMÍAS 20 Bible Online

JEREMÍAS 20 - DIOSPA QHELQACHISQ Quechua bible

JEREMÍAS 20

¹Dios yupaychana wasi qhawaqkunamanta aswan kurak umallin karqan Imerpa churin sacerdote Pasurqa. Paymi uyarirqan Jeremiaspa willakusqanta,

²hinaspan Jeremiasta hasut'ichirqan, hinallataq yupaychana wasi qaylla wichay lado Benjamín Punku nisqapi chakintawan makintawan cepopi kanichirqan.

³Qhepantin p'unchaytaq Pasurqa Jeremiasta cepomanta kacharichimurqan, chaymi Jeremiasqa payta nirqan: — Señor Diosmi Pasur sutiykita t'ikrarqapun “Hinantinpi Q'aqchakuy” nisqaman.

⁴Señor Diosmi nin: Qantan tukuchisqayki mancharikuyman qan kikiykipaq llapan amigoykikunapaqpas. Qan kikiyki qhawakushaqtiykin, amigoyki awqanpa wañuchisqan kanqa. Llapan Judapi tiyaq runakunatapas Babilonia reymanmi hap'iykachisaq, chay reymi wakinta Babiloniaman kamachi kanankupaq apanqa, wakintataq wañuchinqa.

⁵Hinallataqmi awqanpa makinman hap'iykachisaq kay llaqtaq qhapaq kaynintapas llapan kaqninkunatapas, chaniyoq illankunatapas, Judá reykunaq qhapaq kayninkutapas, paykuna llat'anaspa chaykunata Babiloniaman apanankupaq.

⁶Qanpas Pasur, Babiloniaman apasqan kanki, llapan wawakunantin warmintin ima. Chaypin wañupunki, chayllapitaqmi p'ampapusunkikupas, qantapas amigoykikunatapas, mayqenkunamanchus llullakuspa profetizarqanki chaykunatapas, nispa.

⁷Señor Diosníy, qanqa q'otullawanmi uyachiwasqanki, ñoqataq hinalla uyakusqani. Aswan kallpayoqmi kasqanki, chaymi atipawarqanki. Tukuy runaq asikunanpaqmi kapushani, ch'isiyaqnintinmi ñoqawan burlakushanku.

⁸Sapa kuti rimaspaymi qaparispa waqyakuni: ¡Ch'aqwaymi kanqa! ¡Thunikuymi kanqa! nispallapuni. Chay hinata simiyki willasqaymantan sapa kutilla k'amiwanku asipayawanku.

⁹Chaymi nirqani: Señor Diosmanta amaña rimasaqchu, paypa sutinpipas amaña runaman willasaqchu, nispa. Ichaqa sonqoypin simiykiqa nina hinaraq rawrashan, tulluytaraqmi parichishan. Upallakuyta munani chaypas manapunin ch'inyakuyta atinichu.

¹⁰Uyarishanin runakunaq chhiwchinakusqanta: ¡Hinantinpin q'aqchakuy kashan! ¡Hamuychis ch'atasunchis! nispa nishaqta. Reqsisqaykunaraqmi munashanku purisqaypipas misk'akunayta. Paykunan ninku: Ichapaschá q'otusqa kanqa, chaypi atipananchispaq, hinaspataq vengakunanchispaq, nispanku.

¹¹Qanmi Señor Diosníy, ñoqawanqa kashanki, mana atipana maqanakuq soldado hinaraq. Qatiykachawaqniykunaqa misk'akunqakun, manataqmi atipawanqakuchu. Pisipaspankun p'enqasqa qhepakunqaku, p'enqaypi rikukusqankuqa mana hayk'aq qonqasqan kanqa.

¹²Tukuy-atiyniyoq Señor Diosníy, qanpunin kanki chanin t'aqwiqqa, qanpunin kanki runaq sonqon rikuqqa. Rikuchiway chay runakuna ñak'arichisqaykita, chaninchaqniy kanaykipaq akllakusqaymi kanki.

¹³Señor Diosman takiychis, Señor Diosta yupaychaychis. Paypunin sarunchasqata millaykunaq atiyninmanta qespichin.

¹⁴¡Paqarisqay p'unchayqa ñakasqa kachun! ¡Mamaypa wachakuwasqan p'unchayqa ama saminchasqachu kachun!

¹⁵¡Taytayta kusichiq runaqa ñakasqa kachun, taytayta qharin wawayki kasqa, niqpas ñakasqa kachun!

¹⁶¡Chay runaqa Diospa mana khuyapayaspa thunisqan llaqtakuna hina kachun! Chay runaqa tutamantapacha nanaymanta qaparisqata uyarichun, kuskan p'unchaytataq awqa-tinkuypi ch'aqwayta uyarichun,

¹⁷mamaypa wiksallanpiraq mana wañuchiwasqanmanta. Chay hinapiqa mamaypa wiksallanpiña p'ampakuyman karqan, ñoqaqa manaña hayk'aqpas paqariymanñachu karqan.

¹⁸¿Imapaqraqmi mamaypa wiksanmantaqa lloqsimurqani, nanayllata phutikuyllatawan rikunaypaq, p'enqayllapi ch'isiyanaypaq? nispa.