Read DIOSPA QHELQACHISQ Quechua JEREMÍAS 24 Bible Online

JEREMÍAS 24 - DIOSPA QHELQACHISQ Quechua bible

JEREMÍAS 24

¹Babilonia rey Nabucodonosormi Jerusalenmanta suyunman presota aparqan Judá rey Joacimpa churin Jeconiasta, Judapi umalli runakunata, artesanokunata, fierro takaq runakunatawan. Chaykuna qhepatan Señor Diosqa rikuchiwarqan yupaychana wasiq ñawpaqenpi iskay canasta higosta.

²Hukkaq canastapi higosmi kasqa ñawpaq poqoqmanta allinnin, hukkaqpitaq kasqa millay mana mikhuykuy atiy higos.

³Hinan Señor Diosqa tapuykuwarqan: Jeremías, ¿imatan rikushanki? nispa. Ñoqataq nirqani: Higostan, sumaq kaqqa may sumaqpunin kashan, mana allin kaqtaq millaypuni kashan, mana mikhuykuy atiyraq, nispa.

⁴Chaymi Señor Diosqa niwarqan:

⁵Ñoqa Israelpa Diosnin Señormi nini: Chay sumaq higosta hinan qhawarisaq Judamanta apasqanku runakunata, Caldea runakunaq suyunmanqa ñoqan paykunata apachirqani.

⁶Chaypin sumaqta rikumusaq, kay llaqtamantaq kutichikampusaq. Paykunataqa sayarichisaqmi manataq thunisaqchu, takyachisaqmi manataq t'irasaqchu.

⁷Allin yuyaytan qosaq ñoqa Señor Dios kasqayta reqsiwanankupaq, tukuy sonqowanmi ñoqaman kutirimpuwanqaku. Paykunan llaqtay kanqa, ñoqataq Diosninku kasaq.

⁸Ichaqa Judá rey Sedequiasta, umalli runakunata, Jerusalenpi qhepakuqkunata, suyupi qhepakuqkunata, hinallataq Egiptoman pasakuqkunatapas chay millay mana mikhuy atiy higosta hinan qhawarisaq.

⁹Paykunatan wak suyukunapaq sinchi mancharikuyta ruwasaq, maymanchus ch'eqechisqay suyukunapin paykunaqa kanqaku k'aminapaq, rimaypi rimanapaq, asikunapaq, ñakanapaqwan.

¹⁰Paykunamanqa kachaykusaqmi awqa-tinkuyta, yarqayta, hatun onqoytawan, ñawpa taytankuman qosqay suyupi llapanku tukukunankukama, nispa.