Read DIOSPA QHELQACHISQ Quechua JEREMÍAS 26 Bible Online

JEREMÍAS 26 - DIOSPA QHELQACHISQ Quechua bible

JEREMÍAS 26

¹Judapi Josiaspa churin Joacim chayllaraq rey kashaqtinmi, Señor Diosqa Jeremiasta nirqan:

²Ñoqa yupaychana wasiq pationpin kashan Judá suyuq llapan llaqtankunamanta yupaychaq hamuqkuna, chaypi sayaykuspa qanman nisqay simikunata paykunaman willay, ama imallatapas pakaykuspa.

³Ichapaschá nisqaykita kasukuspa millay ruwayninkuta saqepunkuman, ñoqapas manañataq yuyaykusqayman hinachu tukuy millay ruwasqankumanta ñak'arichiyman.

⁴Qanmi paykunaman ninki, Señor Diosmi nin: Qankunaqa uyariwanaykichispunin, kamachikuy simi churasqaytapas kasuwanaykichispunin.

⁵Sapa kuti hina kachamusqay kamachiy profetakunaq nisqantapas kasunaykichispunin, kunankaman paykunata mana uyarishankichischu.

⁶Manataqchus lliw chaykunata ruwankichis chayqa, Silo llaqtata hinan kay yupaychana wasita thunipusaq, hinan kay pacha suyukuna kay llaqtaq sutinta hukkuna ñakanapaq hoqarinqaku, nispa.

⁷Yupaychana wasipi Jeremiaspa rimasqantan lliw sacerdotekunapas profetakunapas llaqta runakunapas uyarirqanku.

⁸Señor Diospa kamachimusqanta niyta tukuqtin hinataq, sacerdotekunapas profetakunapas lliw llaqta runakunapas payta hap'ispa nirqanku: — ¡Kunanpachan wañunki!

⁹¿Imaraykun Señor Diospa sutinpiraqtaq rimanki: Kay yupaychana wasin Silo llaqta hina thunisqa kanqa, kay llaqtapas purunyachisqa mana runayoqmi kanqa, nispa? nispankun Jeremiasman llapanku ch'ichikurqanku.

¹⁰Chaymantataq Judá suyuq umallinkuna chayta uyarispanku, reypa wasinmanta yupaychana wasiman rirqanku, chaypitaq “Mosoq Punku” nisqapi tiyaykurqanku.

¹¹Hinan sacerdotekunaqa profetakunapiwan paykunata llaqta runakunatawan nirqanku: — ¡Kay runataqa wañuchiychis llaqta contra rimasqanmanta! Qankunapas kikiykichismi uyarishankichis, nispa.

¹²Chaymi Jeremiasqa llapan umallikunaman runakunamanwan nirqan: — Señor Diosmi kachamuwan, sutinpi qankunaman llapan uyarisqaykichista ninaypaq, llaqta contrata yupaychana wasi contratawan.

¹³Chay hinaqa, kawsayniykichista t'ikraychis, Diosniykichis Señor Diostapas kasukuychis, chay hinapi ichapas Señor Diosqa muchuchiy yuyaykusqanta manaña chayachimusunkichischu.

¹⁴Ñoqaqa qankunaq makiykichispin kashani, mayqenchus chaninkaq allinkaq rikch'akusunkichis chayta ruwawaychis.

¹⁵Ichaqa kayta allinta yachaychis, ñoqatachus wañuchiwankichis chayqa, qankunan lliw llaqtallantin huchachasqa kankichis mana ima huchayoq runata wañuchisqaykichismanta. Ñoqataqa cheqaqtapunin Señor Diosqa kachamuwan kay simikunata qankunaman willanaypaq, nispa.

¹⁶Chaymi umallikunaqa llaqta runakunapiwan sacerdotekunata profetakunatawan nirqanku: — Manan ima huchanpas kanchu kay runata wañuchinanchispaq, payqa Diosninchis Señor Diospa sutinpipunin rimaykuwasqanchis, nispa.

¹⁷Chaymantataq wakin kurak taytakuna sayarimuspa huñusqa kashaq runakunata nirqanku:

¹⁸— Judapi Ezequías rey kashaqtinmi, Moreset llaqtayoq Miqueasqa Señor Diospa sutinpi llapa Judá llaqtaman rimasqa: “Tukuy-atiyniyoq Señor Diosmi nin: Sionqa chakra llank'ana pampan kapunqa, Jerusalenpas raqay-raqaymi purunyapunqa, yupaychana wasiq orqonpipas sach'akunan wiñapunqa”, nispa.

¹⁹¿Chay nisqanmanta rey Ezequiaspas Judá llaqta runakunapiwan Miqueasta wañuchisqakuchu? Aswansi reyqa Señor Diosta manchakuspa mañakusqa payta khuyapayaykunanpaq, chayraykus Señor Diosqa muchuchiy yuyaykusqanta mana paykunaman chayachisqachu. ¿Chaychu ñoqanchisri kikinchispa contranchispi mana huchayoq runata wañuchispa astawanraq huchallikusunman? nispa.

²⁰(Quiriat-jearim llaqtayoq Semaiaspa churin Uriaspas profetizallasqataq, Señor Diospa sutinpitaq suyu contra llaqta contratawan Jeremías hina rimasqa.

²¹Rey Joacimtaq umallinkunapiwan soldadonkunapiwan chay rimasqanta yacharqospanku, Uriasta wañurqachiyta munasqa. Uriastaqsi yacharqospa manchakuymanta Egiptoman ayqekapusqa.

²²Rey Joacimtaqsi Acborpa churin Elnatanta huk runakunatawan Egiptoman kachasqa,

²³hinas Egiptomanta Uriasta pusamusqaku, hinaspataqsi rey Joacimman hap'iykachisqaku, paytaqsi espadawan wañuchisqa, ayantapas q'opa pataman p'ampachimusqa).

²⁴Safanpa churin Ahicamñataq ichaqa Jeremiasman sayapakurqan, chay hinapin Jeremiastaqa llaqta runaman mana hap'ichirqankuchu, manallataq wañuchirqankupaschu.