Read DIOSPA QHELQACHISQ Quechua JEREMÍAS 27 Bible Online

JEREMÍAS 27 - DIOSPA QHELQACHISQ Quechua bible

JEREMÍAS 27

¹Josiaspa churin Sedequías Judapi kamachikuyta qallarishaqtinmi, Señor Diosqa Jeremiasta nirqan:

²— Lazokunata yugotawan ruwakuy, chaytataq kunkaykiman watakuy.

³Hinaspan Edom suyu reyman, Moab suyu reyman, Amón suyu reyman, Tiro llaqta reyman, Sidón llaqta reymanwan willachimunki paykunaq sutinpi Jerusalenpi kaq rey Sedequiasman hamuq runakunawan.

⁴Kamachinkitaq reyninkuman kayta willanankupaq, Israelpa Diosnin Tukuy-atiyniyoq Señormi nin:

⁵Ñoqan hatun atiyniyoq kallpaywan kay pachata runantinta uywantinta ruwarqani, chaytaqa pi munasqaymanmi qoni.

⁶Kunantaq llapa suyukunata Babilonia rey kamachiy Nabucodonosorpa kamachin kanankupaq qoni, salqa animalkunatawanpas qollanitaq payta servinankupaq.

⁷Llapa suyukunan payta servinqaku, wawanpa wawankamaraq, Babilonia suyuq atipasqa kanan p'unchay chayamunankama. Hinan Babilonia runakunaqa askha suyukunaq hatuchaq reykunaq atipasqan kanqaku.

⁸Mayqen suyupas mayqen reypas Nabucodonosorta mana serviyta yugontapas mana apayta munaqtaqa ñoqan muchuchisaq hatun maqanakuywan yarqaywan onqoywan ima, llapachallanku paypa kamachinpi kanankukama. Ñoqa Señor Diosmi chayta nini.

⁹Chayrayku ama uyariychischu profetaykichistapas, watuqniykichistapas, mosqoy willaqniykichistapas, layqaykichistapas, wañusqakuna rimachiqniykichistapas. Paykunan nisunkichis: Aman Babilonia reytaqa servinkichischu, nispa.

¹⁰Chaytaqa llullakuspan nishasunkichis, chay hawan llaqtaykichismanta apasqa kankichis. Ñoqan wikch'usqaykichis, hinan wañumunkichis.

¹¹Aswanmi mayqen suyupas Babilonia reypa kamachinta ruwaspa yugonta apaqqa kaq hallp'allanpi qhepakunqa chakranta llank'akuspa. Ñoqa Señor Diosmi chayta nini.

¹²Chaytataqmi ñoqa Jeremiasqa Judá rey Sedequiasman iman kaqta willarqani: Babilonia reyta llaqtantawan serviychis yugontapas apaychis, chay hinapin kawsankichis.

¹³¿Imaraykutaq awqa-tinkuypipas, yarqaypipas, onqoypipas wañuyta munankichis qanpas llaqtayki runapas? Babilonia reyta mana kasuqkunaqa chay hinapin wañunqaku Señor Diospa nisqanman hina.

¹⁴Ama profetaykichiskunataqa kasuychischu. Paykunan nisunkichis: Aman Babilonia reytaqa servinkichischu, nispa, chaytaqa llullakuspan rimanku.

¹⁵Señor Diosmi nin: Manan ñoqachu kachamuni, aswanpas llullakuspan sutiypi rimanku. Chay hawan suyuykichismanta wikch'usqaykichis, qankunapas profetaykichispas wañunkichispunin, nispa.

¹⁶Kaqllataq sacerdotekunaman llaqta runakunamanwan nirqani, Señor Diosmi nin: Ama profetaykichista uyariychischu. Paykunan nishallankupuni: Señor Dios yupaychana wasipi serviciokunata Babiloniaman apasqankutan yaqaña apampunqaku, nispa, chaytaqa llullakuspan nishanku.

¹⁷¡Amapunin uyarinkichischu! ¡Hinalla Babilonia reypa kamachin kaychis, kawsallankichismi! ¿Imanaqtintaq kay llaqtari raqay-raqayman tukunman?

¹⁸Cheqaq profetachus kanku chayqa, simiytapas uyarirqankupunitaq chayqa, ñoqamantayá mañakamuwachunku ñoqa yupaychana wasipi serviciokuna Judá reypa wasinpi kaqkuna Jerusalenpi kaqkunapas ama Babiloniaman apasqa kananpaq, ñoqan Tukuy-atiyniyoq Señor Diosqa kani, nispa.

¹⁹Dios yupaychana wasi haykunapi tusakunata, broncemanta qochata, carretakunata, llaqtapi wakin kaqkunatapas,

²⁰manan Nabucodonosorqa apasqachu, Judá rey Joacimpa churin Jeconiasta lliw umalli runakunatawan Jerusalenmanta Judamantawan Babiloniaman apashaspaqa.

²¹Dios yupaychana wasipi qhepaqkunamanta, Judá reypa wasinpi, Jerusalén reypa wasinpi qhepaqkunamantan Israelpa Diosnin Tukuy-atiyniyoq Señorqa nillarqantaq:

²²Babiloniamanmi chaykunata apapunqaku, chaypin qhepampunqa ñoqaq watukunaykama. Chaymantataqmi kayman churanaypaq kutichimpusaq, nispa. Ñoqa Señor Diosmi chayta nini.