Read DIOSPA QHELQACHISQ Quechua JEREMÍAS 28 Bible Online

JEREMÍAS 28 - DIOSPA QHELQACHISQ Quechua bible

JEREMÍAS 28

¹Sedequías Judá suyupi tawa wata phisqa killaña rey kashaqtinmi Gabaón llaqtayoq Azurpa churin profeta Hananías Señor Dios yupaychana wasipi Jeremiaswan rimarqan. Llapan sacerdotekunaq llaqta runakunaq qayllanpin Jeremiasta nirqan:

²— Israelpa Diosnin Tukuy-atiyniyoq Señormi nin: ¡P'akipuniñan Babilonia reypa yugonta!

³Iskay wata ukhupitaqmi rey Nabucodonosorpa kay yupaychana wasimanta Babiloniaman llapan apasqan kaqkunata kutichimpusaq.

⁴Hinallataq kutichimpusaq Judá rey Joacimpa churin Jeconiasta llapan Judá suyumanta Babiloniaman apasqa runakunatawan. Ñoqaqa p'akipusaqmi Babilonia reypa yugontaqa, ninmi Señor Diosqa, nispa.

⁵Chaymantataq yupaychana wasipi kashaq llapan sacerdotekunaq, runakunaq qayllanpi Jeremiasqa Hananiasta nirqan:

⁶— ¡Arí! ¡May allinchá kanman chay hinata Señor Dios ruwaqtinqa! ¡May allinchá kanman nisqaykita hunt'aspa Señor Diosqa Babiloniamanta kutichimpuqtinqa, lliw apasqa runakunata, yupaychana wasipi serviciokunatawan kutichimpuqtinqa!

⁷Ichaqa uyariway llapa runaq ñawpaqenpi nisqayta:

⁸Manaraq qanpas ñoqapas kashaqtinchismi profetakunaqa maqanakuymanta, yarqaymanta, onqoymantawan ñawpa p'unchay rimasqakuña askha suyukunaq contranta, atiyniyoq reykunaq contrantawan.

⁹Huk profetachus allin kawsaymanta willakunqa chayqa, rimasqan hunt'akusqallanpin reqsikunqa Señor Diospa kachamusqan kasqanqa, nispa.

¹⁰Chaymi Hananiasqa Jeremiaspa kunkanmanta yugota horqospa p'akirqorqan.

¹¹Llapa runaq qayllanpitaq nirqan, Señor Diosmi nin: Kay hinatan iskay wata ukhupi Babilonia rey Nabucodonosorpa yugonta p'akisaq lliw suyukunaq much'unmanta horqospa, nispa. Chaymantataq Jeremiasqa ripurqan.

¹²Jeremiaspa kunkanmanta yugota horqospa Hananiaspa p'akisqanmanta huk p'unchaykuna qhepatataq Señor Diosqa Jeremiasta nirqan:

¹³— Phaway, Hananiasman willamuy, Señor Diosmi nisunki: K'aspi yugollatan p'akirqanki, kunantaqmi chaypa rantinpi fierro yugo kanqa, nispa.

¹⁴Ñoqa Israelpa Diosnin Tukuy-atiyniyoq Señormi nini: Chay suyukunaq kunkanmanmi churaykuni fierro yugota, paykuna Babilonia rey Nabucodonosorpa kamachinpi kanankupaq, salqa animalkunatapas payta servinankupaqmi qoni, nispa.

¹⁵Hinan Jeremiasqa Hananiasta nirqan: — ¡Yaw, Hananías, uyariway! Señor Diosqa manan kachamusqasunkichu, aswanpas qanqa llullakuspan llaqta runawan yanqa suyarayachikushanki.

¹⁶Chayraykun Señor Diosqa nisunki: Arí, kachasqaykin, kay pachamanta qanta ch'usaqyachinaypaq. Kunan watan wañunki runakunata contraypi sayarichisqaykimanta, nispa.

¹⁷Profeta Hananiastaq chay kikin watapi qanchiskaq killapi wañukapurqan.