Read DIOSPA QHELQACHISQ Quechua JEREMÍAS 29 Bible Online

JEREMÍAS 29 - DIOSPA QHELQACHISQ Quechua bible

JEREMÍAS 29

¹Profeta Jeremiasmi, Jerusalenmanta cartata qelqarqan Babiloniapi qhepaq kurak taytakunaman, sacerdotekunaman, profetakunaman, llaqta runakunamanwan. Paykunan karqan rey Nabucodonosorpa Jerusalenmanta Babiloniaman preso apachisqan.

²(Chaykunan karqan: Jerusalenmanta rey Jeconías, maman reina, oficialninkuna, Jerusalenmanta Judamantawan umallikuna, artesanokuna, fierro takaqkuna, wakin runakuna apasqa qhepata).

³Judá rey Sedequiasmi Babilonia rey Nabucodonosorman kacharqan Safanpa churin Elasata Hilciaspa churin Gemariastawan, paykunamanmi Jeremiasqa apachirqan preso apasqa kaqkunapaq cartata. Chay cartapin nirqan:

⁴Israelpa Diosnin Tukuy-atiyniyoq Señormi Jerusalenmanta Babiloniaman lliw preso apasqakunaman nin:

⁵Wasikunata ruwakuychis, chaypitaq tiyakuychis. Chakrakunata llank'akuychis mikhunaykichispaq.

⁶Casarakuychis wawakunayoq kanaykichispaq, wawaykichiskunapas casarakuchunku wawakunayoq kanankupaq. Chaypi askhayaychis, amataq pisiyaychischu.

⁷Llank'aychis apaqniykichis llaqtaq allinninpaq, chay llaqtapaqtaq ñoqamanta mañakunkichis, chay llaqta allin kaqtinqa qankunapas allillantaqmi kankichis.

⁸Ñoqa Israelpa Diosnin Tukuy-atiyniyoq Señormi niykichis: Aman q'otuchikunkichischu qankuna ukhupi kaq profetakunawanpas watuqkunawanpas, aman uyarinkichischu mosqoykunata willakuqtinkupas.

⁹Sutiypi paykunaq willasqankuqa llullan, ñoqaqa manan hayk'aqpas kachamurqanichu. Ñoqa Señor Diosmi chayta nini.

¹⁰Señor Diosmi nillantaq: Babiloniapi kasqaykichis qanchis chunka wata hunt'akuqtinmi, qankunaq allinniykichista ruwasaq, rimasqaytapas hunt'asaqpunin Babiloniamanta kayman kaqta kutichimpuspay.

¹¹Ñoqaqa yachanin qankunapaq yuyaykusqayta, allinniykichispaqmi yuyaykushani, manan mana allinniykichispaqchu. Suyasqaykichis kawsaytan ima sumaqta qhepaman qosqaykichis. Ñoqa Señor Diosmi chayta nini.

¹²Chay p'unchaypin qankuna waqyakuwankichis, qayllaykamuwaspan mañakuwankichis, ñoqataq uyarisqaykichis.

¹³Maskhawaspan tariwankichis, tukuy sonqowan maskhawasqaykichisrayku.

¹⁴Arí, qankunaqa tariwankichispunin, wakmantan t'ikarichisqaykichis. Hinantin suyuman ch'eqechisqaytan huñuykampusqaykichis, wikch'usqa kasqaykichis Jerusalén llaqtaman kutimpunaykichispaq, nispa. Ñoqa Señor Diosmi chayta nini.

¹⁵Qankunataqmi ninkichis: Kay Babiloniapipas Señor Diosqa qowanchismi profetakunata, nispa. [

¹⁶Tukuy-atiyniyoq Señor Diosmi nin: Davidpa kamachikuy tiyananpi tiyaq reymanta, Babiloniaman apasqa runakunaq ayllun Jerusalenpi kashaq mana apasqa runakunamanta,

¹⁷paykunamanmi maqanakuyta, yarqayta, onqoytawan kachaykusaq. Ismusqa higosta hinan mana mikhuy atiyta paykunata ruwasaq. Ñoqa Tukuy-atiyniyoq Señor Diosmi chayta nini.

¹⁸Paykunatan maqanakuywan, yarqaywan, onqoypiwan qatiykachasaq, chayta rikuspan llapa suyukuna manchakuymanta khatatatanqaku. May suyumanña apachisqaypipas pisicharparisqan kanqaku hatun p'enqaypi rikukuspa, runakunataq paykunaq sutinta hoqarispa hukkunata ñakanqaku.

¹⁹Chay hinan kanqa sapa kuti hina kamachiy profetakunawan willachishaqtiy mana kasukusqankumanta mana uyarikusqankumanta. Ñoqa Señor Diosmi chayta nini.][3]

²⁰Jerusalenmanta Babiloniaman apachisqa runakuna, uyariychis Señor Diospa nisqanta:

²¹Ñoqa Israelpa Diosnin Tukuy-atiyniyoq Señormi Colaiaspa churin Ahabmanta, Maasiaspa churin Sedequiasmantawan niykichis: Paykunan llullakuspa ñoqaq sutiypi nisunkichis. Paykunatan rey Nabucodonosorman hap'iykachisaq, qayllaykichispin paykunata wañuchinqa.

²²Chaymi Judamanta Babiloniaman apasqa kaqkunaqa pitapas ñakayta munaspaqa ninqaku: Imaynan Sedequiasta Ahabtawan Babilonia reyqa ninapi q'aspachirqan, ahinata qantapas Señor Diosqa ruwachun, nispa.

²³Paykunan millay mana ruwanata Israel llaqtapi ruwarqanku, runa-masinkuq warminwan wasanchay huchata ruwaspa, llullakuspataq sutiypi rimarqanku ñoqaq mana kamachisqayta. Chay ruwasqankutaqa ñoqa kikiymi yachani, rikunitaq. Ñoqa Señor Diosmi chayta nini.

²⁴Israelpa Diosnin Tukuy-atiyniyoq Señormi Jeremiasta kamachirqan Nehelam llaqtayoq Semaiasman ninanpaq.

²⁵Chay Semaiasmi Babiloniamantapacha Jerusalenpi kaq llapan runakunaman Maasiaspa churin sacerdote Sofoniasman wakin sacerdotekunamanwan pay kikin qelqamuspa nimusqa:

²⁶Señor Diosmi qanta churarqasunki sacerdote Joiadaq rantinpi kanaykipaq. Yupaychana wasipiqa qanmi kurak kanki. Huk waq'aña profetaman tukuspa rimaqtinpas, qanmi carcelman kunkanmanta fierro cadenawan wataspa churanaykipaq kamachisqa kanki.

²⁷¿Imanaqtintaq Anatot llaqtayoq Jeremiastari mana anyankichu, qankunaq qayllaykichispi profeta hina rimashaqtin?

²⁸Babiloniakamapas qelqataraqmi apachimuwarqanku, chaypitaq nimusqa: Preso apasqa runakunaqa unaytan kamunkichis, wasita ruwakuspa tiyaychis, chakrata llank'aychis mikhunaykichispaq, nispa.

²⁹Chaytataq sacerdote Sofoniasqa Jeremiasman leeykurqan.

³⁰Hinan Señor Diosqa Jeremiasta nirqan:

³¹— Willachiy llapan preso apasqa runakunaman, Señor Diosmi Nehelam llaqtayoq Semaiasmanta nin: Semaiasmi mana ñoqa kamachishaqtiy nirqasunkichis, yanqataq q'otuspa suyarayachirqasunkichis.

³²Chay hawan ñoqa Señor Diosqa Semaiasta miraynintawan muchuchisaq. Paypa mirayninqa manan kay llaqtapi kapunqachu, manataqmi llaqtayman allin kawsay qosqaypipas kawsaysikunqachu, llaqtayman rimaspa ñoqa contra sayarichisqanmanta, nispa. Ñoqa Señor Diosmi chayta nini.