Read DIOSPA QHELQACHISQ Quechua JEREMÍAS 30 Bible Online

JEREMÍAS 30 - DIOSPA QHELQACHISQ Quechua bible

JEREMÍAS 30

¹Kay hinatan Señor Diosqa Jeremiasta nirqan:

²— Israelpa Diosnin ñoqa Señormi nini: Huk qelqa k'uyuman llapan qanwan rimasqaykunata qelqay.

³Chayamushanmi Israel llaqtayta Judá llaqtaytawan wakmanta kutichimpunay p'unchay ñawpa taytankuman qosqay hallp'aman chaypi kawsakapunankupaq, nispa. Ñoqa Señor Diosmi chayta nini.

⁴Kaykunan Israelpaq Judapaqwan Señor Diospa nisqan:

⁵Señor Diosmi nin: Llaksakuymanta qapariytan uyarini, sinchi manchakuymi, manataq thak-kay kanchu.

⁶Tapurikuychis, tapupakuychis, ¿qhariqa wawata wachakunmanchu? Chayri, ¿imanaqtintaq teqninku hap'intintakama sapanka qharita rikushani, wachakuy nanaywanpas q'ewikushanman hinata? ¿Imanaqtintaq llapankuri aya uya kashanku?

⁷¡Ay! ¡Qayllaykamushanñan llaksakuy p'unchay! ¡Chay p'unchay hinaqa manan hayk'aqpas kanchu! Jacobpa llaqtanpaqmi hatun llaki p'unchay kanqa, ñoqataqmi ichaqa chay p'unchaymanta paykunata qespichisaq, nispa.

⁸Ñoqa Tukuy-atiyniyoq Señor Diosmi nini: Chay p'unchaymi llaqtayta qespichisaq, kamachi kay yugotapas p'akispa, watasqakunatapas p'itispa, manaña huktawan wak llaqtakunaq kamachin kananpaq.

⁹Ahinapin ñoqa Diosninku Señor Diosllataña serviwanqaku, rey Davidtapas servinqaku, chay reytan ñoqa paykunapaq rikhurichisaq, nispa.

¹⁰Chay hinaqa, ñoqa Señor Diosmi nini: Kamachiy Jacob, ama manchakuychu, Israel llaqtalláy, ama musphaychu. Qantaqa karu llaqtamantan qespichisqayki, wawaykikunatapas apasqa kasqan llaqtamantaqa horqompusaqmi. Jacobqa kutimuspa llakhillan kanqa, mana piqpa muchuchisqan allillanmi kanqa.

¹¹Qanwanmi kashani qespichinaypaq. Maykunamanchus qanta ch'eqechisqay suyukunatan llapanta thunisaq, qantataqmi ichaqa manaña thunisqaykichu. Chaywanpas huchaykimantaqa muchuchisqaykipunin, ahinapi wananaykipaq, nispa. Ñoqa Señor Diosmi chayta nini.

¹²Señor Diosmi nin: K'iriykiqa mana hampiy atiyñan, lliq k'iriykiqa mana thaniy atiyñan.

¹³Qanqa mana piniyoq hinan kanki, k'iriykitaqa manan pipas hampinmanñachu, manataqmi qhaliyanaykipaq hampi kanñachu.

¹⁴Munaqniykikunan qonqarqapusunki, manañan qantaqa yuyarillankupaschu. Ñoqan awqayki hina k'irirqayki, mana khuyapayaspan muchuchirqayki millay mana chanin huchaykimanta, mana yupay atiy huchaykikunamanta.

¹⁵¿Imanaqtintaq k'iriykimanta qaparkachanki? Mana hampiy atiymi nanayniykiqa. Millay mana chanin huchaykimantan, mana yupay atiy huchaykikunamantawanmi chay hinata ruwarqayki.

¹⁶Ichaqa lliw qan oqoqmi oqosqa kanqa, lliw awqaykitaqmi apasqallataq kanqa, llat'anaqniykikunapas llat'anasqallataqmi kanqa, suwaqniykikunapas suwasqallataqmi kanqa.

¹⁷Paykunaqa qanmantan rimaqku: Sionqa qonqasqa alman, Sionqa mana piniyoqmi, nispanku. Ñoqataq ichaqa k'iriykita hampisqayki, k'iriykiqa llullu aychan kapunqa, nispa. Ñoqa Señor Diosmi chayta nini.

¹⁸Señor Diosmi nin: Jacobpa ayllunkunatan kutichimusaq, sapanka ayllutan khuyapayasaq, Jerusalentan kikin raqay-raqay patapi sayarichinqaku, kamachikuqpa wasintapas maychus kananpin sayarichinqaku.

¹⁹Chaykunapin uyarikunqa gracias qoy takikuna, uyarikullanqataq kusikuymanta asikuykuna. Ñoqan askhayachisaq, manataqmi pisiyanqakuchu, ñoqan altoman hoqarichisaq, manataqmi pisichasqachu kanqaku.

²⁰Jacobpa wawankunaqa ñawpaq hinan kapunqaku, llaqtanpas ñawpaqeypi allintan sayanqa, ñak'arichiqnintapas ñoqan ñak'arichisaq.

²¹Umallinkupas paykunamantan paqarinqa, kamachikuqninkupas kikin llaqtankumantan kanqa. Paywanmi qayllaykachikusaq, hinan qayllaykamuwanqa. Mana chayqa, ¿pi runataq atinman qayllaykamuwayta?

²²Paykunan llaqtay kanqa, ñoqataq Diosninku kasaq. Ñoqa Señor Diosmi chayta nini.

²³¡Qhawariychis Señor Diospa manchay kunununuyninta! Señor Diospa k'arak phiñakuyninmi tutuka hatun wayra hina phawanqa, millay runakunaq patanpin t'oqyanqa.

²⁴Señor Diospa phiñakuyninqa manapunin thaninqachu paypa yuyaykusqanman hina hunt'akunankama. Qhepa p'unchaymanmi chaykunata entiendenkichis, nispa.