Read DIOSPA QHELQACHISQ Quechua JEREMÍAS 32 Bible Online

JEREMÍAS 32 - DIOSPA QHELQACHISQ Quechua bible

JEREMÍAS 32

¹Señor Diosmi Jeremiasta rimapayarqan, Judá suyupi Sedequías chunkakaq watapiña kamachikushaqtin, Nabucodonosortaq Babilonia suyupi chunka pusaqniyoqkaq watapiña kamachikushaqtin.

²Chay p'unchaykunapin Jerusalenqa Babilonia soldadokunaq muyuykusqan kasharqan. Profeta Jeremiasñataq reypa wasinpi cárcel patiopi wisq'asqa kasharqan.

³Rey Sedequiasmi Jeremiasta wisq'achisqa: ¿Imanaqtinmi qan kay hinata rimanki? nispa. Nillasqataq, qanmi ninki, Señor Diosmi nin: Babilonia reyman kay llaqtata qopunaypaqñan kashani, paymi hap'ikapunqa.

⁴Judá rey Sedequiasqa manan ayqenqachu Caldea runakunamanta, cheqaqtapunin Babilonia reyman hap'ichisqa kanqa, uyapura paywan tupaspan ima ruwasqankutapas willakapunqa.

⁵Nabucodonosormi Babiloniaman apapunqa Sedequiasta, chaypin kamunqa watukuq rinaykama. Hinaña Caldea runakunawan maqanakunkichis chaypas, manapuniñan atipankichisñachu. Ñoqa Señor Diosmi chayta nini.

⁶Jeremiastaq nirqan Señor Diosmi niwarqan:

⁷Kunanmi tioyki Salumpa churin Hanamel wawqeyki hamuspa nisunki: Anatotpi hallp'ayta rantikuy. Chayqa qanmanmi tupasunki sispa aylluy kasqaykirayku hallp'ay rantiwanayki, nispa.

⁸Señor Diospa niwasqanman hinapunitaq Hanamel wawqeyqa hamurqan cárcel patiopi wisq'asqa kashaqtiy. Niwarqantaq: Benjamín hallp'api Anatotpi chakrayta rantikuway, qanmanmi tupasunki rantinaykipas tiyanaykipas. Rantikapuy, nispa. Chaymi yacharqani Señor Diospa simin kasqanta.

⁹Hinan Hanamel wawqeymanta rantikurqani Anatotpi chakranta, pesaspataq qopurqani chunka qanchisniyoq qolqeta.

¹⁰Hallp'a rantisqa qelqata ruwaspa sellorqani, testigokunawanpas firmachirqani, hinaspataq balanzapi qolqeta pesarqani.

¹¹Chaymantataq hap'irqani iskaynin qelqata, rantisqa escriturata wisq'aspa sellosqata, copiantataq mana wisq'asqallata.

¹²Iskaynintataq qorqani Maasiaspa churin Neriaspa churin Barucman Hanamel wawqeypa qayllanpi, qelqata firmaq testigokunaq qayllanpi, hinallataq llapan chay patiopi kashaq judío runakunaq qayllanpiwan.

¹³Paykunaq uyarishasqantaq Baructa nirqani:

¹⁴Kay iskay qelqata hap'iy, wisq'aspa sellosqata mana wisq'asqatawan, hinaspa t'uru p'uyñuman wisq'aykuy unay p'unchayta waqaychasqa kananpaq.

¹⁵Israelpa Diosnin Tukuy-atiyniyoq Señormi nin: Kay suyupin wakmanta rantikunqaku wasikunata, hallp'ata, chakrakunatapas, nispa.

¹⁶Neriaspa churin Barucman rantisqay qelqata qoykuspañan Señor Diosmanta mañakurqani:

¹⁷¡Ay, Apu Señor Diosnilláy! Qanmi hatun atiyniyoq kallpaykiwan hanaq pachata kay pachatawan kamarqanki. Qanpaqqa manataqmi imapas sasaqa kanchu.

¹⁸Qanqa waranqa miraykama mana tukukuq munakuyniykiwanmi munakushallankipuni, tayta-mamankuq huchanmantataq ichaqa wawankunata muchuchinki. Diosnilláy, manchana hatun Diosmi kanki, Tukuy-atiyniyoq Señor Diosmi sutiykiqa.

¹⁹Hatun yachayniykiwanmi qanqa unanchanki, atiywanmi qanqa ruwanki. Qanqa runaq llapan ruwasqantaqa qhawashankin, ruwasqanman hinataqmi sapankaman tupaqninta qonki.

²⁰Qanqa Egipto suyupi milagrokunatapas musphanakunatapas ruwarqankin, kunankamapas kaqllatapunin ruwashanki Israel ukhupi, wak runakuna ukhupipas, chay hinapin kunanpas sutiykiqa mentasqa.

²¹Qanqa hatun atiyniyoq kallpaykiwanmi Egiptomanta Israel llaqtaykita horqomurqanki, milagrokunawan musphanakunawan lliwta q'aqchaspa.

²²Hinaspan paykunaman lecheq miel misk'iq askha kasqan hallp'ata qorqanki, imaynan ñawpa taytankuman prometesqaykiman hina.

²³Ichaqa kay suyuman haykumuspa tiyaykuspankun, mana kasurqasunkikuchu, yachachikuyniykitapas mana ruwarqankuchu, kamachisqaykitapas manapuni ruwarqankuchu. Chay hawan kay tukuy llakikunataqa paykunaman chayachimunki.

²⁴¡Qhawariy! Caldea runakunan llaqtaman phawaykunankupaq llaqta muyuriq perqa qhepapi seqanakunata tawqakunkuña. Kunantaq maqanakuypas, yarqaypas, onqoypas kay llaqtata awqaq makinman hap'iykachinqa. Arí, Señor Diosníy, llapan nisqaykikunan hunt'akushan, chaytaqa rikushankipunin.

²⁵Chaytukuywanpas, Señor Diosníy, kamachiwankiraqtaq testigokunaq qayllanpi hallp'ata rantikunaypaq, hinaña kay llaqta, Caldea runakunaq makinman urmaykunan kashaqtinpas, nispa.

²⁶Hinan Señor Diosqa Jeremiasman kutichirqan:

²⁷— Ñoqan kani Señor Diosqa, lliw kawsaqkunaq Diosnin. Manan imapas sasachu ñoqapaqqa.

²⁸Chay hinatan ñoqaqa niyki: Ñoqan kay llaqtata hap'iykachishani Babilonia rey Nabucodonosorman runankunamanwan, paykunataq hap'ikapunqaku.

²⁹Llaqtata muyuykuq Caldea runakunan phawaykamuspa wasikunata ninawan kanaykunqaku. Kay llaqta runan phiñachiwarqan Baal dioskunaman inciensota q'apachispa, wak dioskunamanpas hich'aykunapaq vino ofrendatawan chay wasi patakunapi haywaspa.

³⁰Qallariymantapachan Israel llaqtaqa Judá llaqtapiwan mana allinkunata ruwashallankupuni, Israel runakunaqa ruwasqankuwanmi phiñachishallawankupuni. Ñoqa Señor Diosmi chayta nini.

³¹Kay llaqtaqa sayarichisqa kasqan p'unchaymantapachan kunankama ñoqata k'arakllatapuni phiñachishawan, chayraykun chinkachipusaq.

³²Lliw imaymana mana allin ruwasqankunawan phiñachiwasqankumantan Israel llaqtaq, Judá llaqtaq, reyninkunatapas, umallinkunatapas, sacerdotenkunatapas, profetankunatapas, Judapi Jerusalenpi tiyaq runakunatapas, llapallankuta chinkachipusaq.

³³Paykunaqa mana qhawariq tukuwaspan qheparpariwarqanku. Sapa rato hinaña yachachishani chaypas, manapunin yachachisqayta chaskiwayta munankuchu.

³⁴Ñoqapaq ruwasqa wasitawanpas qhellichapurqankun, millakuy diosninkuta churaykuspanku.

³⁵Kaqllataq Baal diospaq altarkunatapas Ben-hinom wayq'opi ruwarqanku, wawankuta qharitaraq warmitaraq Moloc diosman ruphachinankupaq. Chaykuna ruwanataqa manan rimarillarqanipaschu, chay millaykuna ruwanankutaqa manan yuyallarqanipaschu, chay hinata ruwaspankun Judá llaqtaqa huchallikurqanku, nispa.

³⁶Israelpa Diosnin Señormi nin: Qankunan kay llaqtamanta nishankichis: Maqanakuymi, yarqaymi, onqoymi Babilonia reyman llaqtata hap'iykachinqa, nispaykichis, ñoqataq ichaqa nishani:

³⁷Sinchi k'arak phiñakuyniy rawrariqtinmi hinantin suyukunaman ch'eqechirqani, chay runakunatan huñuykuspa kay llaqtaman kutichimpusaq mana imata manchakuspalla tiyakapunankupaq.

³⁸Paykunan llaqtay kanqa, ñoqataq Diosninku kasaq.

³⁹Paykunatan ruwasaq cheqaq ch'ulla yuyayllawanpuni yupaychawanankupaq, chaytaqa ruwanqaku paykunaqpas mirayninkuqpas allinninpaqmi.

⁴⁰Paykunawanmi wiñaypaq rimanakusaq: Manan hayk'aqpas wikch'usqaykichischu, allillantapunin ruwasqaykichis, sonqoykichismantaq churasaq ñoqa manchakuq kayta, ñoqamanta mana t'aqakuwanaykichispaq, nispa.

⁴¹Paykunata allin ruwasqaymantan kusikusaq, tukuy sonqoymantan cheqaqtapuni paykunata kay suyupi tiyachisaq, nispa.

⁴²Señor Diosqa nillantaqmi: Imaynan kay llaqtapaq hatun manchay llakita kachaykurqani, kaqllataqmi lliw allinkaq prometesqaykunata churasaq.

⁴³Qankunan kay suyumanta nishankichis: Purunyapunmi, mana runayoqmi mana uywayoqmi kashan, Caldea runakunaq makinpin kashan, nispa. Ichaqa wakmantan kay suyupi hallp'akunata rantikunqaku.

⁴⁴Benjamín hallp'api, Jerusalén llaqta muyuriqpi, Judá llaqtakunapi, orqo-orqopi kaq llaqtakunapipas, Shefela moqo-moqopi kaq llaqtakunapipas, Neguev ch'inneqpi kaq llaqtakunapipas hallp'ata qolqenkuwan rantikunqaku, rantisqanku qelqata ruwaspan sellochinqaku, testigokunawanpas firmachinqaku, llaqtankuman ñoqa kutichimuspa t'ikarichisqayrayku. Ñoqa Señor Diosmi chayta nini.