Read DIOSPA QHELQACHISQ Quechua JEREMÍAS 33 Bible Online

JEREMÍAS 33 - DIOSPA QHELQACHISQ Quechua bible

JEREMÍAS 33

¹Cárcel patiollapiraq wisq'asqa Jeremías kashaqtinmi, Señor Diosqa wakmanta nimurqan:

²Ñoqan kani kay pacha ruwaqqa, maychus kasqanpi allin takyachiqqa, ñoqan Señor Diosqa kani.

³Waqyakamuway uyarisqaykin, mana reqsisqayki hatun musphanakunatan rikuchisqayki.

⁴Ñoqa Israelpa Señor Diosninmi nini: Kay llaqtapi tiyaq runakunaq wasinkunata, Judá reykunaq wasinkunatawan thunirqanku, chaykunawantaqmi hark'achikunata ruwakurqanku espadawan phawaykuq Babilonia soldadokunamanta tupapakunankupaq.

⁵Caldea runakunan hamurqanku llaqta perqaman seqanakunata ruwaspa phawaykunankupaq. Manchana k'arak phiñakuyniywantaq chay maqanakuq runakunata wañuchirqani, chay thunisqa kaq wasikunapas ayakunawan hunt'aykusqan karqan. Millay mana chanin huchakuna ruwasqankumantan kay llaqtataqa manaña qhawarirqanichu.

⁶Chaywanpas ñoqan kay llaqtata hampispa qhaliyachisaq, paykunataqa hampisaqpunin, hinaspan paykunaman rikuchisaq thak-kay cheqaq kawsayta, mana imata manchakuspallan tiyanqaku.

⁷Judata Israeltawanmi wakmanta t'ikarichisaq, hinaspan sayarichisaq imaynan ñawpa karqan hinata.

⁸Ñoqa contra huchallikusqanmantapas ch'uyanchasaqmi, lliw mana allin ruwasqanmantapas, ñoqa contra sayarisqanmantapas pampachasaqmi.

⁹Llapan suyukunan uyarinqaku Jerusalenta allin ruwasqayta, chay hinapin kay llaqta ñoqapaq kanqa kusikuy, mentasqa kay, yupaychasqa hatunchasqa kaypiwan. Kay llaqtaman thak-kaytawan allinyaytawan qosqayta rikuspan, huk suyukuna manchakuspa khatatatanqaku, nispa.

¹⁰Señor Diosmi nin: Qankunan ninkichis: Kay cheqasqa ch'usaqmi mana runayoq mana uywayoq, nispa. Chay hinapunin Jerusalenpa callenkunapas, Judá suyu llaqtakunapas purun-purun, manataq tiyaq kanchu runapas uywapas,

¹¹ichaqa wakmantan chay cheqaskunapi uyarikunqa kusikuypas q'ochukuypas, casarakuq wayna-sipaspa takinpas, uyarikullanqataqmi ñoqa yupaychana wasiman rispa gracias qoy ofrenda apaqmantapas: Tukuy-atiyniyoq Señor Diosman graciasta qoychis, Señor Diosqa allinmi, munakuyninqa wiñaypaqmi, nispa nisqata. Arí, kay suyutan wakmanta t'ikarichisaq ñawpaq hina kananpaq, nispan nin Señor Diosqa.

¹²Tukuy-atiyniyoq Señor Diosmi nillantaq: Kay ch'usaq kashaq mana runayoq mana uywayoq suyupin llapan llaqtankunapiwan wakmanta kanqa pastokuna michiqkuna ovejanta mikhuchinanpaq.

¹³Orqo-orqopi kaq llaqtakunapi, Shefela moqo-moqopi kaq llaqtakunapi, Neguev ch'inneqpi kaq llaqtakunapi, Benjamín hallp'api, Jerusalenpa muyuriqninpi, Judá suyu llaqtakunapipas wakmantan rikunqaku makinwan ovejanta yupashaqta. Ñoqa Señor Diosmi chayta nini.

¹⁴Payqa nillantaqmi: Kanqan huk p'unchay Israel llaqtaman Judá llaqtamanwan prometesqayta hunt'anay.

¹⁵Chay tiempopin Davidpa mirayninmanta chanin runata sayarichisaq, paymi kay pachantinpi allinta ruwanqa chaninchanqataq.

¹⁶Chay p'unchaypin Judaqa qespichisqa kanqa, Jerusalenpas allillanpuni kawsanqa, kay sutiwantaqmi churanqaku: “Señor Diosmi ñoqanchismanta chaninchaspa sayaqqa”, nispa.

¹⁷Ñoqa Señor Diosmi nini: Manan hayk'aqpas tukukunqachu Davidpa mirayninmanta Israel kamachikuy tiyanapi tiyaqqa.

¹⁸Manallataq chinkanqachu Leví miray sacerdotekunapas ruphachina ofrendakunata, ruru ofrendakunata, wak ofrendakunatapas ñoqaman haywamuwananpaq, nispa.

¹⁹Señor Diosmi Jeremiasta nillarqantaq:

²⁰Ñoqan nini: — Tutatapas p'unchaytapas rimanakuspaymi unancharqani iman kaq horasllapipuni chayamunanpaq, chay rimanakusqayqa manan imaynamantapas p'akisqa kanmanchu.

²¹Chay hinallatataqmi kamachiy Davidwanpas rimanakurqani mirayninpuni paypa kamachikuy tiyananpi tiyananpaq, kaqllataqmi Leví ayllu sacerdotekunawanpas rimanakurqani paykunallapuni serviwananpaq. Chay rimanakusqaykunapas manallataqmi p'akisqa kanmanchu.

²²David kamachiypa miraynintaqa kamachiy ruwaq Levipa miraynintawanmi mana yupay atiyta mirachisaq, hanaq pachapi ch'askakunata hinaraq, qocha patapi aqota hinaraq, nispa.

²³Señor Diosmi Jeremiasta nillarqantaq:

²⁴— ¿Manachu uyarinki chay runakunaq rimasqanta? Paykunan nishanku: ¡Akllakusqan Judawan Israelwanqa iskaynin llaqtan Señor Diospa saqerparisqanña! nispa. Chay runakunan llaqtayta pasaqta pisichaspa mana suyupaqñachu qhawarinku.

²⁵Chaymi ñoqa Señor Diosqa nini: Ñoqan tutawanpas p'unchaywanpas rimanakurqani, kay pachamanpas hanaq pachamanpas churarqani mana p'akinankupaq kamachikuyniyta. Imaynan chaykunapas allin-allin churasqaña,

²⁶chay hinallataqmi Jacobpa mirayninwan kamachiy Davidwanpas rimanakusqayqa hunt'akunqapuni. Davidpa mirayninmantapunin akllasaq Abrahampa, Isaacpa, Jacobpa mirayninta kamachinanpaq. Paykunata khuyapayaspaymi wakmanta kay suyuman kutichimpusaq, nispa.