Read DIOSPA QHELQACHISQ Quechua JEREMÍAS 35 Bible Online

JEREMÍAS 35 - DIOSPA QHELQACHISQ Quechua bible

JEREMÍAS 35

¹Josiaspa churin Joacim Judapi rey kashaqtinmi Señor Diosqa ñoqa Jeremiasta niwarqan:

²Phaway Recab ayllu runaman, paykunawan rimaspataq ñoqa yupaychana wasiman pusay. Chaypitaq huknin wasipi vinota haywariy ukyanankupaq, nispa.

³Hinan ñoqaqa Habasiniaspa churin Jeremiaspa churin Jaazaniasta, wawqenkunata, churinkunata, llapan ayllunkunatawan tarimuspa,

⁴paykunata pusarqani Dios yupaychana wasipi Igdaliaspa churin Dios sonqo runa Hananpa churinkunaq wasinman. Chay wasin karqan umallikunaq wasinwan kuska, Salumpa churin punku qhawaq Maasiaspa wasin patapi.

⁵Chaypitaq Recabpa ayllunkunaq ñawpaqenman churaykurqani jarrapi hunt'a vinota vasokunatawan, hinaspan nirqani: Ukyaykuychis kay vinollatapas, nispa.

⁶Paykunataq nirqanku: Ñoqaykuqa manan vinotaqa ukyaykuchu, Jonadabpa taytan Recab ñawpa taytaykun kamachikurqan: Aman hayk'aqpas vinota ukyankichischu qankunapas mirayniykichispas.

⁷Aman wasita ruwakunkichischu, aman uvas chakratapas ruwakunkichischu, amallataq muhutapas t'akankichischu. Qankunaqa karpakunallapin tiyankichis. Ahinapin asta-astarikuspa purispaykichis kay suyupi unayta kawsankichis, nispa.

⁸Chaytan ñoqaykuqa ñawpa taytaykuq lliw kamachiwasqankuta kasukuyku, manapunin vinotaqa ukyaykuchu ñoqaykupas, warmiykupas, wawaykupas.

⁹Manan wasitapas ruwakuykuchu, manallataq uvas chakraykupas t'akasqa chakraykupas kanchu.

¹⁰Ñoqaykuqa karpakunallapin tiyayku ñawpa taytaykuq kamachikusqanman hina kasukuspayku.

¹¹Ichaqa Babilonia rey Nabucodonosor kay suyuta hap'ikapuqtinmi, Babilonia soldadokunamanta Siria soldadokunamantawan ayqekuspa, yuyaykurqayku kay Jerusalenman hamuyta. Chaymi kay Jerusalenpi tiyakushayku, nispa.

¹²Hinan Señor Diosqa Jeremiasta nirqan:

¹³— Israelpa Diosnin ñoqa Señormi kamachiyki Judá runakunata Jerusalenpi kaqkunatawan nimunaykipaq: ¿Manachu qankunaqa yachachisqata yachaqawaqchis? ¿Kamachisqatapas manachu kasukuwaqchis? Ñoqa Señor Diosmi chayta nini.

¹⁴Recabpa churin Jonadabpa mirayninpas ñawpa taytankuq kamachisqanta kasukuspa manan vinota ukyankuchu kunan p'unchaykama. Ñoqataq ichaqa sapa kutilla mana samaspa rimapayaykichis, manataq kasuwarqankichischu.

¹⁵Ñoqataq kachapayamushaykichis sapa kuti hina kamachiy profetakunata qankunata rimapayananpaq: Saqeychis millay puriyniykichista millay ruwayniykichistapas. Amaña wak dioskunata yupaychaspa puriychischu, ahinapin ñawpa taytaykichisman qankunamanwan qosqay hallp'api unayta kawsankichis, nispa. Qankunataq ichaqa mana kasuwaspa mana uyariwarqankichischu.

¹⁶Recabpa churin Jonadabpa mirayninkunapas kasukurqankun ñawpa taytankuq kamachisqanta, kay llaqtataq ichaqa mana kasuwanchu.

¹⁷Chayraykun ñoqa Israelpa Diosnin Tukuy-atiyniyoq Señorqa nini: ¡Uyariychis! Judá suyumanmi Jerusalenpi tiyaqkunamanwanmi chayachisaq nisqay hatun llakikunata, rimapayashaqtiy mana uyariwasqankumanta, waqyashaqtiy mana kasuwasqankumantawan, nispa.

¹⁸Chaymantataq Jeremiasqa Recab aylluta nirqan: — Israelpa Diosnin Tukuy-atiyniyoq Señormi nisunkichis: Qankunaqa ñawpa taytaykichis Jonadabpa kamachintan kasurqankichis, mana p'akispa llapan nisqankunatapas kasukuspa.

¹⁹Chayraykun Jonadabpa mirayninmantaqa kallanqapuni ñoqa serviq runa, nispa.