Read DIOSPA QHELQACHISQ Quechua JEREMÍAS 37 Bible Online

JEREMÍAS 37 - DIOSPA QHELQACHISQ Quechua bible

JEREMÍAS 37

¹Babilonia rey Nabucodonosormi Judapi rey kananpaq churarqan Josiaspa churin Sedequiasta, Joacimpa churin Jeconiaspa rantinpi.

²Señor Diospa Jeremiaswan willachisqantaqa manan kasurqankuchu Sedequiaspas oficialninkunapas llaqta runakunapas.

³Chaywanpas rey Sedequiasqa kacharqan, Selemiaspa churin Jucalta, Maasiaspa churin sacerdote Sofoniastawan profeta Jeremías valekuqta: Diosninchis Señor Diosmanta ñoqaykupaq mañapuwayku, nispa nimunankupaq.

⁴Jeremiasqa manan wisq'asqaraqchu karqan, payqa llaqta ukhupi maytapas riyta atillarqanmi.

⁵Babilonia soldadokuna Jerusalenta phawaykunanpaq muyupayashaqtinmi, rey Faraonpa soldadonkunaqa Egipto suyumanta lloqsimurqanku Sedequiasta yanapaq, chayta uyarispan Babilonia runakunaqa chaymanta kutipurqanku.

⁶Hinan Señor Diosqa Jeremiasta rimaykurqan,

⁷Israelpa Ñoqa Señor Diosninmi nini: Judá rey Sedequiaspa kachamusqankunaman niychis, Egiptomanta rey Faraonpa soldadonkuna yanapaqniykichis lloqsimuqkunaqa kaqtan Egiptoman kutipunqaku.

⁸Babilonia soldadokunaqa wakmantan kutimunqaku Jerusalén llaqtaman phawaykunankupaq, haykuspataq ninawan kanaykunqaku.

⁹Ñoqa Señor Diosmi willashaykichis: Ama yanqa kikiykichista q'otukuspa yuyaychischu: Babilonia soldadokunaqa cheqaqtapunin ripunqa, nispaykichis, chayqa manan hinachu kanqa.

¹⁰Hinaña qankuna Babilonia soldadokunata llapanta maqanakuypi atipawaqchis chaypas, karpankupi iskay kinsa k'irisqakuna qhepankuman, chaykunan sayarimuspa llaqtaykichista ninawan kanaykunkuman, nispa.

¹¹Babilonia soldadokunataq Jerusalén muyuykusqankumanta kutipurqanku, Faraonpa soldadonkuna hamushasqanta yacharqospanku.

¹²Hinan Jeremiasqa Benjamín aylluta risharqan hallp'a rakiyman, chaypi tupaqnin hallp'a chaskikapuq.

¹³Benjamín Punku nisqaman chayaqtintaq, hap'irqapurqan Hananiaspa churin Selemiaspa churin Irías. Paymi karqan chaypi kaq guardiakunaq umallin, nirqantaq: — Caldea runakunamanmi qanqa rishanki, nispa.

¹⁴Jeremiastaq nirqan: — Yanqan chaytaqa niwanki, manan Caldea runakunamanchu rishani, nispa. Iriastaq ichaqa mana uyariq tukuspa umallikunaq qayllanman apamurqan.

¹⁵Paykunataq Jeremiasta sinchita phiñarikuspa suq'achirqanku, hinaspan reypa qelqaqnin Jonatanpa wasinman wisq'achirqanku. Chay wasin carcelman tukuchisqa karqan.

¹⁶Ahinapin Jeremiasqa cárcel wasiq pachan t'oqoman wisq'asqa karqan unay p'unchaykunapaq.

¹⁷Rey Sedequiastaq kamachirqan tiyasqanman Jeremiasta pusamunankupaq, payta pusamuqtinkutaq reyqa pakallapi tapuykurqan: — ¿Señor Diosqa icha imallatapas rimaykurqasunkichu? nispa. Jeremiastaq nirqan: — Arí, kashanmi. Qanmi Babilonia reyman hap'ichisqa kanki, nispa.

¹⁸Rey Sedequiastataq Jeremiasqa tapuykukurqan: — ¿Ima mana allintan contraykitapas umalliykikunaq contrantapas llaqta runaq contrantapas ruwarqani carcelman wisq'achiwanaykichispaq?

¹⁹¿Maytaq chay: Manan Babilonia reyqa hamunqachu qanmanpas suyumanpas, nispa profetizaqkunarí?

²⁰Kunanqa reyníy, ama hinachu kay, mañakusqayta uyariykuway: Amaña wakmanta apachiwayñachu qelqaqniyki Jonatanpa wasinmanqa, ama chaypi wañunaypaq, nispa.

²¹Chaymi rey Sedequiasqa kamachikurqan Jeremiasqa guardiakunaq patiollanpiña waqaychasqa kananpaq. Hinaspan sapa p'unchay t'antata qochirqan callemanta rantichimuspa, ahinatan rantichimurqan llaqtapi t'anta kanankama. Ahinapitaqmi Jeremiasqa patiollapi waqaychasqa qhepakapurqan.