Read DIOSPA QHELQACHISQ Quechua JEREMÍAS 39 Bible Online

JEREMÍAS 39 - DIOSPA QHELQACHISQ Quechua bible

JEREMÍAS 39

¹Judá rey Sedequiaspa isqonkaq wataq chunkakaq killanpi kamachikushaqtinmi Babilonia rey Nabucodonosorqa llapan soldadokunantin Jerusalenman hamurqanku, hinaspataq llaqtata muyuykurqanku.

²Sedequías chunka wata tawa killaña kamachikushaqtinmi, killaq isqon p'unchayninpi llaqta muyuriq perqata q'asarqanku.

³Jerusalén hap'isqa kaqtintaq Babilonia reypa llapan umallinkuna haykuspa “Chawpi Punku” nisqapi kamachikuq tiyaykurqanku. Chaykunan karqan Nergal-sarezer, Samgar-nebo, qollana Sarsequim, hatun qollana hukkaq Nergal-sarezer, wakin umallikunapiwan.

⁴Chaykunata rikuspataq, rey Sedequiasqa soldadonkunantin llaqtamanta ayqekapurqanku. Reypa huerta kanchan cheqasnintan tutapacha rispa iskaynin perqa tupay punkunta lloqsirqorqanku, hinaspataq Jordán wayq'oman puririykapurqanku.

⁵Paykunaq qhepanta phawarispataq, Babilonia soldadokunaqa Jericó pampaman Sedequiasman tariparqorqanku. Hap'irqospataq Hamat suyupi Ribla llaqtapi kaq rey Nabucodonosorman aparqanku. Chaypin rey Nabucodonosorqa kamachikurqan paypaq imachus kananta.

⁶Hinaspan Sedequías qhawakushaqtin ñawpaqenpi churinkunata Judamanta llapan umallikunatapas nak'arqarichirqan.

⁷Sedequiaspa ñawinkunatataq horqochirqan, hinaspan bronce cadenawan watasqata Babiloniaman apachirqan.

⁸Babilonia soldadokunataq runakunaq wasintapas reypa palaciontapas llaqtatapas ninawan kanaykurqanku, hinaspan Jerusalén perqata thunirqanku.

⁹Chay qhepatañataq reypa guardiankunaq umallin Nabuzaradanqa Babiloniaman kamachi-kaypaq apapurqan llaqtapi llapan qhepaq runakunata, Caldea runakunaman chimpakapuqkunatawan.

¹⁰Judá suyupitaqmi wakin mana imayoq wakchakunata saqespa, paykunaman qorqan uvas chakrakunata, chakra llank'ana hallp'akunatawan.

¹¹Babilonia rey Nabucodonosortaq guardiakunaq umallin Nabuzaradanta Jeremiasmanta kamachirqan:

¹²Jeremiastaqa horqomuspan allinta uywanki, amataq ima mana allintapas ruwankichu, aswanmi tukuy ima munasqanta ruwanki, nispa.

¹³Hinan Nabuzaradanqa, qollana Nabusazbanwan, hatun qollana Nergal-sarezerwan wakin Babilonia reypa umallinkunapiwan

¹⁴kamachirqanku guardiakunaq pationmanta Jeremiasta horqomunankupaq. Hinaspataq Safanpa churin Ahicampa churin Gedaliasman qorqanku kikin Jeremiaspa wasinman pusanankupaq. Ahinapin Jeremiasqa llaqtan runawan tiyaspa qhepakapurqan.

¹⁵Jeremiasqa guardiakunaq patiollanpiraq wisq'asqa kashaqtinmi Señor Diosqa payta rimapayasqa:

¹⁶“Phaway, Etiopía runa Ebed-melecta nimuy: Israelpa Diosnin Tukuy-atiyniyoq Señormi nin: Kay llaqtamanta rimasqaytaqa hunt'asaqpunin, allinnintaqa manan munanichu aswanpas thunisaqpunin. Rikushaqtiykin chaykunaqa hunt'akunqa.

¹⁷Chay p'unchaymi ichaqa ñoqa waqaychasqayki, ahinapin manchakusqayki runaman mana hap'ichisqachu kanki. Ñoqa Señor Diosmi chayta nini.

¹⁸Ñoqan qespichisqayki, chaymi paykuna mana wañuchisunkikuchu, kawsallankipunin ñoqaman hap'ipakuwasqaykirayku”, nispa. Ñoqa Señor Diosmi chayta nini.