Read DIOSPA QHELQACHISQ Quechua JEREMÍAS 41 Bible Online

JEREMÍAS 41 - DIOSPA QHELQACHISQ Quechua bible

JEREMÍAS 41

¹Chay wataq qanchis killanpitaq rey ayllu Elisamaq churin Netaniaspa churin Ismaelqa chunka runantin Mizpa llaqtaman rirqan Gedaliaswan tupaq. Ismaelqa reypa ayllunmanta umallis kasqa. Hinan Mizpa llaqtapi kuska mikhushaspanku,

²Ismaelqa chunka runantin qonqaylla sayarirqospa espadawan wañurqachirqanku Babilonia reypa Judapi kamachikuqpaq saqesqan Gedaliasta.

³Wañuchillarqankutaq Mizpa llaqtapi Gedaliaswan kashaq llapan judío runakunata Babilonia soldadokunatapas.

⁴Gedaliasta wañuchisqan qhepantin p'unchaytaq, manaraq pillapas yacharqoshaqtin,

⁵Shehem llaqtamanta, Silo llaqtamanta, Samaria llaqtamantawan chayarqamusqaku pusaq chunka runakuna, sunkhanku ruturqarisqa, p'achankupas llik'i-llik'i, paykuna kikinkuq mat'arqarikusqankuwan cuerponkupas yawarkama. Kaqllataq apamusqaku ruru ofrendakunata inciensotawan Señor Dios yupaychana wasipi ruphachinankupaq.

⁶Ismaeltaq Mizpa llaqtamanta chay runakunaman ayparqan ñannintinpi waqakuspa. Paykunaman taripaspataq nirqan: — Hamuychis, Ahicampa churin Gedaliaswan tupaykamusun, nispa.

⁷Llaqtaq chawpinman chayarqospa hinataq, Ismaelqa runakunantin chay runakunata wañuchiyta qallarirqanku, hinaspan huk unu p'uytuman ayankuta wikch'uykurqanku.

⁸Chay t'aqa runakunamantataq ichaqa huk chunka runakuna Ismaelta valekurqanku: — ¡Ama wañurqachiwaykuchu! Ñoqaykuqqa campopi pakasqan kashan trigopas, cebadapas, aceitepas, miel misk'ipas, nispa. Chaymi Ismaelqa mana wakinkunata hinachu paykunataqa wañuchirqan.

⁹Ismaelpa wañurachisqan runakunaq ayankunata wikch'uykusqan unu p'uytuqa hatunmi karqan. Chay p'uytuqa kasqa rey Asaq Israel rey Baasata hark'apakunanpaq ruwachisqansi, Ismaeltaq ichaqa ayakunawan hunt'arqachisqa.

¹⁰Chaymantataq Ismaelqa guardiakunaq umallin Nabuzaradanpa Gedaliaspa kamachinpi churasqan reypa ususinkunata Mizpa llaqtapi wakin qhepaq runakunatawan presota hap'irqan, hinaspataq llapanta qhochurichirqan Amón suyuman apananpaq.

¹¹Careaq churin Johanantaq paywan kashaq soldadokunaq umallinkunapiwan Ismaelpa millay mana allinkuna ruwasqanta yacharqospa,

¹²huñunakurqanku lliw runakunantin paywan maqanakunankupaq, tariparqankutaq Gabaonpi hatun qochana pataman.

¹³Hinan Ismaelpa preso apasqan runakunaqa Johananta soldadoq umallinkunatawan rikurqospa, mayta kusikurqanku,

¹⁴hinaspataq llapanku kutirikampurqanku Johananman.

¹⁵Ismaeltaq ichaqa pusaq runantin Johananmanta ayqekuspa Amón suyuman ripurqanku.

¹⁶Careaq churin Johanantaq soldadoq umallinkunapiwan Gabaón llaqtamantapacha kutichimpurqanku Ahicanpa churin Gedaliasta wañuchispaña, Netaniaspa churin Ismaelpa Mizpa llaqtamanta apasqan soldadokunata, warmikunata, erqekunata, oficialkunatawan.

¹⁷Ayqekuspan purirqanku Belén qaylla Gerutquiman, chaypitaq chhikanta samaykurqanku, chaymantataq Egiptoman riyta yuyaykurqanku,

¹⁸Caldea runakunata manchakuspanku. Paykunaqa Babilonia runakunatan manchakurqanku, Babilonia reyqa Ahicanpa churin Gedaliastan kamachikuqpaq churasqa, paytan Netaniaspa churin Ismaelqa wañuchirqan.