Read DIOSPA QHELQACHISQ Quechua JEREMÍAS 42 Bible Online

JEREMÍAS 42 - DIOSPA QHELQACHISQ Quechua bible

JEREMÍAS 42

¹Chaymantataq Careaq churin Johanán, Osaiaspa churin Azarías, soldadokunaq umallinkuna, llapan runapas hatunpas huch'uypas Jeremiasman qayllaykuspa

²nirqanku: — Ama hinachu kay, valekuqmi hamushaykiku, ñoqaykupaqyá Señor Diosniykimanta mañaykapuwayku kay pisilla qhepaq runakunapaq. Ñawpaqqa askhan karqayku, kunantaq rikushawankiku hinapas pisillaña qhepakuyku.

³Diosniyki Señor Diosmanta mañapuwayku paypuni maynin purinata yachachiwanankupaq imatachus ruwanaykutapas willawanankupaq, nispa.

⁴Niqtinkutaq Jeremiasqa nirqan: — Allinmi. Diosniykichis Señor Diosmanta mañapusqaykichismi valekuwasqaykichisman hina, lliw imachus niwasqantapas mana pakaykuspan willasqaykichis, nispa.

⁵Hinan paykunaqa Jeremiasta nirqanku: — Manataqchus ñoqayku kasusaqku Diosniyki Señor Diospa qanwan nichiwasqankuta chayqa, kikin Señor Diospuni ñoqayku contra cheqaq chaninta sayarispa rimariq kachun.

⁶Munasaqkuña manaña munasaqkuchu chaypas mañapuwanaykikupaq kachashaykiku chay Diosninchis Señor Diospa nisqantaqa kasukullasaqkupunin, ahinapi allillanpuni kawsanaykupaq, paypa simintaqa hunt'allasaqkupunin, nispa.

⁷Chunka p'unchaymantañataq Señor Diosqa Jeremiasta rimaykurqan,

⁸hinan payqa waqyarqan Careaq churin Johananta, puriqmasin soldadokunaq umallinkunata, hatuntapas huch'uytapas lliw runakunatapas.

⁹Hinaspan nirqan: — Kachawarqankichismi Diosmanta qankunapaq mañanpunaypaq, Israelpa Diosnin Señormi nin:

¹⁰Kay suyupichus qhepakunkichis chayqa, ñoqan allinta wiñarichisqaykichis, manañan thunisqaykichisñachu, saphichisqaymantaqa manan t'irasqaykichisñachu, chay hatun llaki kachamusqaymantaqa llakikunipunin.

¹¹Manchakusqaykichis Babilonia reytaqa ama manchakuychisñachu. Amapuniña manchakuychisñachu. Ñoqan qankunawan kashani, ñoqataqmi qespichisqaykichis, paypa makinmanta qechuspa.

¹²Ñoqaqa khuyapayasqaykichismi, paywanpas khuyapayachillasqaykichistaqmi, hinan llaqtaykichisman kutichimpusunkichis, nispa. Ñoqa Señor Diosmi chayta nini.

¹³Ichaqa Señor Diosniykichista mana kasukuspachus ninkichis: Kay suyupiqa manan qhepaykumanchu,

¹⁴aswanpas Egipto suyuman rispa tiyakampusaqku, chaypiqa manan rikusaqkuchu maqanakuytapas, manataq uyarisaqkuchu maqanakunapaq huñuq trompeta waqaqtapas, manallataq yarqaymantapas wañusaqkuchu, nispa chayqa,

¹⁵qankuna Judapi qhepaqkuna uyariychis, Israelpa Diosnin Tukuy-atiyniyoq Señorpa nisqanta: Qankunachus Egiptopi tiyaq ripuyta munashankichispuni chayqa,

¹⁶manchakusqaykichis maqanakuypas yarqaypas chay kikinpin taripasunkichis, chaypitaqmi wañunkichispas.

¹⁷Cheqaqtapuni Egiptopi tiyaq ripuyta munaqkunaqa maqanakuypin, yarqaypin, onqoypin tukukapunqaku. Manan hukllapas kawsanqachu, manapunin ayqenqachu ñoqaq kachamusqay hatun llakimantaqa, nispa.

¹⁸Israelpa Diosnin Tukuy-atiyniyoq Señormi nillantaq: Imaynan phiñakuyniykuna rawrarirqanraq Jerusalenpi tiyaqkunapaq hinallataqmi qankunapaqpas rawrarinqa Egiptomanpuni ripunkichis chayqa. Qankunan kankichis millay ñakasqa, k'amisqa, llaksakuypaq, manañataqmi kay suyutaqa rikunkichisñachu, nispa.

¹⁹Yaw, Judá suyupi qhepaqkuna, Señor Diosmi kamachisunkichis: Ama Egipto suyuman riychischu, nispa. Allinta yachaychis, kunanmi ñoqa willashaykichis

²⁰qankunaq sinchi pantasqaykichista. Qankunan Diosniykichis Señor Diosmanta mañakuqta kachawaspa niwarqankichis: Diosninchis Señor Diosmanta mañaykapuwayku. Willaykuwaykutaq lliw ima nisqantapas, chayman hina ruwanaykupaq, nispa.

²¹Kunantaqmi ñoqa willaykichis Diosninchis Señor Diospa “ninki” niwasqanta, qankunataq ichaqa mana kasukuyta munankichischu.

²²Chayrayku allinta yachakuychis, maqanakuypi, yarqaypi, onqoypiwanmi wañumunkichis maychus tiyaq ripuy munasqaykichis suyupi, nispa.