Read DIOSPA QHELQACHISQ Quechua JEREMÍAS 48 Bible Online

JEREMÍAS 48 - DIOSPA QHELQACHISQ Quechua bible

JEREMÍAS 48

¹Israelpa Diosnin Tukuy-atiyniyoq Señorpa Moabmanta nisqan. ¡Ay, imaraqmi Nebo llaqta! ¡Pasaq thuniykusqan kapushan! ¡Quiriataimpas hap'iqpa k'umuchisqanmi kapushan! ¡Pukaranpas k'umuchiqpa pampakama thuniykusqanmi kapushan!

²Moabpa sumaq reqsisqa-kayninmi tukukapun. Hesbonpiqa awqakunan rimanakushan imaynatachus Moabta chinkachinanpaq: ¡Hakuchis! Pasaqpaq ch'inyachimpusun, nispanku. Qanpas, Madmén llaqta ch'inyachisqallataqmi kanki, espadaqa manan hinatachu qhawaykusunki.

³¡Uyariychis! Horonaimmantan qaparkachamushanku: ¡Pasaq thunisqan! ¡Ch'usaqyachisqan! nispanku.

⁴Moabmi raqay-raqayña karqon, nanaymanta qaparisqankutaqmi Zoarkamaraq uyarikun.

⁵Luhit qhata seqaqkuna waqay ñawillantinñan wichaykunku. Horonaimman uraykuqkunan hatun llaki chayamuqtin nanaymanta qaparinku.

⁶¡Ayqekuychis! ¡Atiqqa qespikunqan! ¡Ch'inneqpi kanlli llant'a hina kaychis!

⁷Moab, qanqa kallpaykimanmi qhapaq kayniykimanmi hap'ipakurqanki, chaymi qanpas hap'isqallataq kanki, Quemos diosniykipas apasqan kanqa llapan sacerdotekunantin umalli runakunantin.

⁸Llapan llaqtakunamanpunin chayanqa thuniqqa, manan ch'ullallapas hinaqa kanqachu, wayq'opas pata pampapas purunyapunqan, ñoqa Señor Diospa nisqayman hina.

⁹Cheqaqtapunin Moabqa thunisqa kanqa, chayrayku sutinwan qelqasqa rumita churaykuychis. Lliw llaqtakunan purunyapunqa raqay-raqayta mana ch'ulla wasipas kanankama.

¹⁰¡Ñakasqa kachun Señor Diospa hap'ichisqan llank'anata mana tukuy sonqowan ruwaqqa! ¡Ñakasqallataq kachun wañuchinanpaq kamachisqa kashaspa mana kasukuq runaqa!

¹¹Moabqa thak-kayllapipunin tiyakurqan, manan hayk'aqpas kamachipaq apasqaqa karqanchu, vino hinan sumaqta poqoykurqan, manan hayk'aqpas wak mak'asmanqa tallikurqanchu, chayraykun mana q'aymayanchu, manataq q'apaynintapas chinkachinchu.

¹²Señor Diosmi ichaqa nin: Chayamunqan huk p'unchay, chay vinota hich'ananpaqmi runakunata kachamuni, paykunan tallinqaku mak'asmanta, ch'usaq kaqtintaqmi p'akipunqaku.

¹³Hinaspan Moabqa Quemos diosninmanta p'enqasqa kanqa, imaynan Israelpas sinchi hap'ipakusqan Betel[5] diosninpaq p'enqasqa karqan hina.

¹⁴Moab, ¿imaynataq niwaq: Allin maqanakuqmi kayku, allin qharikunan kayku, nispa?

¹⁵Ñoqaqa Reymi kani, sutiyqa Tukuy-atiyniyoq Señor Diosmi. Ñan chayamunña Moabta llaqtankunatawan thuniqqa, allichachaq waynakunaraqmi wañuchinaman apasqa kanqaku.

¹⁶Moabpa thunisqa kananmi qayllaykamushan, hatun llakin chayamunan patapiña kashan.

¹⁷Moabpa llaqtamasinkuna, allin reqsisqa kasqan yachaqkuna, waqaychis paymanta, niychistaq: ¡Imaynaraqmi p'akikun atiyniyoq varaqa! ¡Imaynaraqmi p'akikun sumaq k'anchariq varanqa! nispa.

¹⁸Dibón llaqta, hatunchasqa-kayniykimanta k'umuykuy, ch'aki pampapi tiyay, Moabta thuniqmi qanmanña sispaykamushan, thunirqamunñan pukaraykikunatapas.

¹⁹Aroer llaqta, ñan patapi sayaykuspallaña qhaway, warmikuna qharikuna ayqeshaqta tapukuy: ¿Iman qarqon? nispa.

²⁰Nisunkikutaq: Moabmi pasaq pisichasqa sinchi mancharisqataq kashan, waqaychis qapariychis paymanta, willamuychis Arnón mayuman Moabpa thunisqa kasqanta, nispa.

²¹Pata pampapi llaqtakunan taripasqa kanku: Holón, Jahaza, Mefaat,

²²Dibón, Nebo, Bet-diblataim,

²³Quiriataim, Bet-gamul, Bet-meón,

²⁴Quiriot, Bosrapas, Moabpa llapan llaqtankuna qayllanpiña karunpiña kaqpas.

²⁵Moabpa kallpanmi tukusqa kapun, atiynintaqmi thunisqa kapun. Ñoqa Señor Diosmi chayta nini.

²⁶Moabta macharqachiychis Señor Dios contra sayarisqanmanta, siminmantan aqtupakunqa kallpan chiriyanankama, hinan paytaqa asipayanqaku.

²⁷Moab, ¿qanqa manachu Israeltaqa asipayarqanki? Payri, ¿suwakunawanchu purirqan sapa kuti rimaspa pisichanaykipaq?

²⁸Moabpi runakuna, llaqtaykichiskunata wikch'upuychis, qaqakunapi tiyamuychis, urpikuna hina qaqa qhatakunapi q'esachakuychis.

²⁹Moabpa uma hoqariq kasqantaqa uyariykun, paypa sinchi hatunchakuq kasqantaqa uyariykun, qhariykachaq k'ankaykachaq kasqantaqa uyariykun, pay-payman tukuq kasqantaqa uyariykun.

³⁰Señor Diosmi nin: Reqsinin k'amikuq kasqanta, thawtiylla-thawtiq mana ima ruwaq kasqantapas.

³¹Chayraykun Moabmanta waqasaq, llapan llaqtankunamantawan qaparisaq, Kir-harespi runakunamantawan anchisaq.

³²Jazer pukyu, qanmantan waqasaq, Sibma uvas sach'a, k'allmaykikunaqa qochakamaraqmi mast'arikurqan, Jazerkamaraqmi chayarqan, kunantaqmi chaqoqqa kumpaykukun poqosqa rurukuna, uvaskuna pataman.

³³Manañan kanchu kusikuypas q'ochukuypas Moabpa chakrankunapi huertankunapi. Uvas sarunapin vinota ch'akichini, uvas saruqpas manan kanñachu, kusikuymanta qapariqpas manan kanñachu.

³⁴Hesbón runapas qaparinmi, qaparisqanpas Elealeman Jahazamanwanraqmi uyarikun, Zoarmantapas Horonaimkama Eglat-selisiyakamaraqmi uyarikun, Nimrim wayq'o unupiwanpas ch'akinmi, nispa.

³⁵Señor Diosmi nin: Moabpiqa qolluchisaqmi, orqo patapi yupaychana cheqaspi sacrificio haywaqta, sacrificiota diosninkuman ruphachiqta.

³⁶Chayraykun sonqoy waqan Moabmanta Kir-hares runakunamantawan llakiy-llakiy waqaq qena hina, qhapaq kaykunata huñukusqallantapas chinkachikapunmi.

³⁷Lliwpa chukchanmi ruturqosqa kasqa, lliwpa sunkhanpas k'isurqosqan kasqa, lliwmi makinkutapas mat'akusqaku, lliwmi qhasqa p'achawan cinturankuman watakusqaku.

³⁸Moabpa llapa wasin patapin lliw plazankunapiwanmi waqaylla uyariykukushan, ñoqan Moabtaqa ñut'urqarini yanqa k'arpata hina. Ñoqa Señor Diosmi chayta nini.

³⁹¡Imayna thunisqaraqmi Moabqa kashan! ¡Imaynataraqmi waqaykushanku! P'enqakuymantan kutirikapunku. Sinchi manchakuyraqmi kashan, pasaq asipayanan kashan lliw llaqtamasinkunapaq.

⁴⁰Señor Diosmi nin: ¡Qhawariy! ¡Anka hinaraqmi awqanqa phalaykun Moab pataman raphranta mast'arispa!

⁴¹Llaqtakunan awqaq makinpiña, pukarakunan awqaq hap'ikapusqanña. Chay p'unchaymi Moabpa maqanakuqninkunaqa wachakuq warmi hinaraq khatatatanqaku.

⁴²Moabqa manañan suyuñachu kapun, ñoqa Señor Dios contra kasqanmanta.

⁴³Moab runakuna, q'aqchakuymi pataykichispiña, toqllawan, urmaykuna t'oqopiwanmi suyasunkichis.

⁴⁴Llaksakuymanta ayqeqmi t'oqoman urmaykunqa, t'oqomantaña lloqsinqa chaypas, toqllawanmi hap'ichikunqa. Moab patamanmi llapan chaykunata chayachimusaq, ruwasqankuna taripanay watapi.

⁴⁵Ayqekuqkunan Hesbonpa llanthunpi mana kallpayoqraq sayarparinqaku, Hesbonta nina ruphasqanrayku, Sehonpi hinantinman ninaq wach'irisqanrayku. Chay ninaqa Moabpa ch'ipu chukchantan ruphan, llaqta ch'aqwachiqkunaq uma mukukuntawan.

⁴⁶¡Ay qanmanta Moab! ¡Quemos diospa llaqtanqa thunisqan kapun! Churiykikunaqa kamachipaq apasqan, ususiykikunapas karu llaqtaman apasqan.

⁴⁷Chaytukuywanpas qhepamanqa Moabta t'ikarichisaqmi. Ñoqa Señor Diosmi chayta nini. Chaykaman Moab contra Señor Diospa unanchasqanqa.