Read DIOSPA QHELQACHISQ Quechua JEREMÍAS 51 Bible Online

JEREMÍAS 51 - DIOSPA QHELQACHISQ Quechua bible

JEREMÍAS 51

¹Señor Diosmi nin: Kachamusaqmi thuniq wayrata Babilonia suyupaq runankunapaqwan.

²Wak llaqtayoq runakunatan Babiloniaman kachamusaq, paykunan chaypi tiyaqkunata trigota hina wayrachinqaku, hallp'antapas ch'usaqyachinqaku. Mana allin p'unchay chayamuqtinmi hinantin cheqasmanta phawaykunqaku.

³Aman hinata qhawankichischu p'eqtanku wakichikunankutapas, qara unkunkuwan churakunankutapas. ¡Babilonia waynakunataqa ama khuyapayaychischu, soldadonkunatapas llapanta wañuchiychis!

⁴Caldea runakunaq suyunpiqa wañunqakun, callenkunapipas t'urpusqan wañunqaku.

⁵Tukuy-atiyniyoq Señor Diosninkuqa Israeltapas Judatapas manan saqerparinqachu, hinaña Caldea runakuna suyunkuta Israelpa Ch'uya Diosnin contra huchawan hunt'aykachirqanku chaypas.

⁶¡Ayqekuychis Babiloniamanta! ¡Kawsanaykichispaq phawaychis! ¡Ama paypa huchan hawachu wañuychis! Kunanmi chayamun Señor Diospa aynita kutichinan, chaskikapunan kaqtapunin qopushan.

⁷Babiloniaqa qori vason karqan Señor Diospa makinpi lliw pachantinta machachinanpaq. Suyukunan chay vinota ukyarqanku, yuyayninkutataq chinkachikapurqanku.

⁸Qonqayllan Babiloniaqa ñut'ukunankama urmaykapun. ¡Paymanta waqaychis! K'irinpaq balsamota apamuychis, ichapaschá qhaliyanman.

⁹Hampiykuñan Babiloniata manataq qhaliyanchu. ¡Hina kachun! Haku ripusun sapanka llaqtanchismankama, huchachasqa-kayninmi hanaq pachamanraq chayan, muchuchisqa-kayninmi phuyukamaraq aypan.

¹⁰Señor Diosmi chaninchawanchis allin kashasqanchista, hakuchis Sionpi willamusunchis Diosninchis Señor Diospa ruwasqankunata.

¹¹Señor Diosmi Babiloniata thuniyta yuyaykun, chaymi Media suyu reykunata kallpachaspa tanqarimurqan. Chayqa Señor Diospa ayni-kutichiyninmi pay yupaychana wasita thunisqankumanta. ¡Wach'inaykichista ñawch'iyachiychis! ¡Escudoykichista hoqariychis!

¹²¡Babiloniaq perqankunaman phawaykunanpaq banderata hoqariychis! ¡Waqaychaq soldadokunata askhata churaychis! ¡Qhawaqkunata churaychis! ¡Pakakunata ruwakuychis! Señor Diosmi yuyaykusqanta hunt'an, Caldea runakuna contra nisqantan hunt'an.

¹³Babilonia, qanqa askha mayukunayoqmi kanki, askhataq qhapaq kayniykipas, p'uchukayniykin chayamun, kawsanaykiq tukukuyninmi chayamun.

¹⁴Tukuy-atiyniyoq Señor Diosmi sutinrayku jurarqan: Langostata hinaraqmi phawaykuqniykita kachamusaq, paykunan atipasqa kasqaykimanta takinqaku, nispa.

¹⁵Atiyninwanmi Señor Diosqa kay pachata ruwarqan, yachayninwanmi teqsimuyuntinta takyachirqan, yuyayninwanmi hanaq pachatapas mast'arirqan,

¹⁶kunununuq kunkanwanmi hanaq pacha unupas qaparin, hinantinmantan pacha phuyutapas sayarichin, paraqtinpas illapata t'oqyachin, waqaychasqa ukhumantan wayratapas horqomun.

¹⁷Lliw runataq mana yuyayniyoq uma muyusqakuna, metal unuyachiq runaqa ídolo ruwasqanmantan uyanta mana maymanpas churayta atinchu, ídolo ruwasqanqa mana kawsaq q'otulla kasqanmanta.

¹⁸Mana imapaq valeq pukllana kasqanmi kanku, p'uchukay p'unchaypin Señor Diosqa chaykunata thunipunqa.

¹⁹Jacobpa Diosninqa manan chaykuna hinachu, payqa tukuy imaymanakuna kamaqmi, paymi Israelta paqarichirqan kaqnin kananpaq, Tukuy-atiyniyoq Señor Diosmi sutinqa.

²⁰Babilonia, qanmi ñoqaq q'asunay kanki, qanmi maqanakuypi maqanay kanki. Qanwanmi suyukunata q'asuni, llaqtakunatapas thunini.

²¹Qanwanmi caballokunatapas sillakuqkunatapas q'asuni, carretakunatapas phawachiqninkunatapas q'asuni.

²²Qanwanmi qharitapas warmitapas q'asuni, machutapas waynatapas q'asuni, maqt'atapas sipastapas q'asuni.

²³Qanwanmi michiqtapas uywatapas q'asuni, llank'aqtapas torokunatapas q'asuni, kamachikuqtapas atiyniyoqtapas q'asuni, nispa.

²⁴Señor Diosmi nin: Ñawiykichispa qhawashasqanmi Babiloniaman, llapan Caldea runakunamanwan kutichipusaq Sionta llapa mana allin ruwasqankumanta, nispa.

²⁵Señor Diosmi nin: Yaw, thuniq orqo, qan contran kani, lliw pachantin chhalluqmi kanki. Makiywanpunin muchuchisqayki, ranramantan tanqaykamusqayki, ruphasqa orqomanmi tukuchisqayki.

²⁶Rumiykitaqa manapunin pipas munanqachu wasi teqsi ruwakunankupaqqa, wiñaypaqpunin purunyapunki. Ñoqa Señor Diosmi chayta nini.

²⁷Banderata suyuntinpi maywiychis, trompetata suyukunapi tocaychis. Pay contra maqanakunankupaq suyukunata huñuychis. Suyukunata contranpi waqyaychis Ararat suyuta, Mini suyuta, Askenaz suyutawan. Hatun kamachikuqta churaychis soldadokunata kamachinanpaq, caballoyoqkunata kachaychis phiñasqa langostata hinaraq.

²⁸Pay contra maqanakunankupaq suyukunata huñuychis, Media suyuq reyninkunata, kamachikuqninkunata, oficialninkunata, llapan kamachisqanku suyukunatapas.

²⁹Babilonia contra Señor Diospa yuyaykusqanqa kaqllapunin kashan, paymi ch'inneqman tukuchinqa mana piqpa tiyanan suyuman, chayraykun hallp'aqa kuyurinraq t'ikrakunraq.

³⁰Babilonia soldadokunaqa manan maqanakapunñachu, kaq pukarankupin kapushanku. Kallpankun chiriyarqapun, warmi hinaraqmi tukurqapunku. Llaqta punkunkun lliw chhallusqa kapun, wasinkutan nina ruphaykapushan.

³¹Qati-qatiraqmi chaskikuna phawashanku, qati-qatiraqmi reyman willaqkuna rishanku: Llapantapunin llaqtanchista hap'ikapunku,

³²mayu chimpakunatapas hark'arqapunku, t'otorakunatapas kanarqapunku, soldadokunapas lliwmi manchakapunku, nispanku.

³³Israelpa Diosnin Tukuy-atiyniyoq Señormi nin: Babiloniaqa eranapaq allin sarusqa pampa hinan, ichhuna p'unchaypas chayamushanñan, nispa.

³⁴Jerusalén llaqtan nin: Babilonia rey Nabucodonosormi oqorqapuwarqan, pasaqtaraqmi q'aqchawarqan, ch'usaq p'ukuta hinan saqerpariwarqan. Lamar-qochapi hatun wak'a animal hinan oqorqowarqan, sumaqta mikhuykuwaspan saksaykurqan, chaymantataq aqturpariwarqan.

³⁵Sión llaqta nichun: K'iriwaqniy Babilonia llaqta ñak'arichun, nispa. Jerusalén llaqta nichun: Yawarninchismanta Caldea runakuna pagachun, nispa.

³⁶Chayraykun Señor Diosqa paykunata nin: Ñoqaq chaninchasqaymi lloqsinkichis, awqaykimanmi aynita kutichisaq. Qochantaqa pasaqtan ch'akichipusaq, pukyunkunataqa lliwtan ch'akichipusaq.

³⁷Chaymi Babiloniaqa raqay-raqayman tukupunqa, chaypin chacal animalkuna tiyanqa. Manan pipas chaypi tiyanqañachu, qhawarispan: ¡Ikiraqmi! ninqaku.

³⁸Llapankun león hinaraq qaparinku, uña leonkuna hinaraq hiriririnku.

³⁹Mikhunayaqtinkun hatun mikhunata wakichisaq, paykunatan machachisaq kusisqa kanankupaq, chaymantataqmi mana rikch'ariqllaña wiñaypaq puñupunqaku.

⁴⁰Hinan paykunata uywa nak'anaman apapusaq, borregotapas, orqo cabratapas, ovejatapas apanku hinata. Ñoqa Señor Diosmi chayta nini.

⁴¹¡Imaynaraqmi Babiloniaqa hap'isqa kapun! ¡Imaynaraqmi pachantinpa mentasqan llaqtaqa hap'isqa kapun! ¡Imaynaraqmi Babiloniaqa llapaq llaksakunanman tukupun!

⁴²Qochan Babiloniata millp'urqapun, manchay phoqchiqeyninmi p'amparqapun,

⁴³llaqtankunaqa musphana ch'usaqmanmi tukupun, yanqa ch'aki aqo-aqomanmi tukupun, mana piqpa tiyasqanpas kanman hinamanmi tukupun, mana piqpa purisqanpas kanman hinamanmi tukupun.

⁴⁴Babiloniapin ñak'arichisaq Bel diosninta, aqtuchisaqmi lliw rakrasqanta, manañan payman suyukunapas hunt'aykunqañachu. Ñan thunikunña Babiloniaq perqanqa.

⁴⁵¡Llaqtalláy, chaymanta lloqsiy! Sapankaykichis wañuymanta ayqekapuychis, Señor Diospa rawrashaqraq phiñakuyninmanta phawaychis.

⁴⁶Suyuntinpi rimay q'oñiriqtinqa, ama q'aqchakuychischu, amataq mancharikuychischu. Sapa wata hinan rimayqa q'oñirin, maqanakuymanta rimaykuna, kamachikuqpura hap'inakusqanmanta rimaykuna.

⁴⁷Cheqaqtapunin chayamunqa p'unchaykuna, Babiloniaq idolonkunata ñak'arichinay tiempokuna. Lliw suyuntinmi k'umuchisqa kapunqa, ayakunawan hunt'aykusqa kanqa.

⁴⁸Hanaq pachapas kay pachapas lliw imakunapas llapallanmi kusikunqa Babilonia thunikuqtin, wichay ladomanta thuniq haykuykamuqtin. Ñoqa Señor Diosmi chayta nini.

⁴⁹Imaynan pachantinpi runakunata Babilonia wañuchirqan, ahinallataqmi Babiloniapas Israel runakunata wañuchisqanmanta urmallanqataq.

⁵⁰Señor Diosmi nin: ¡Qankuna wañuymanta ayqeqkuna, ayqekapuychis ama sayaykuspa! Karupiña kaspaykichistaq Señor Diosmanta yuyariychis, Jerusalenmantapas yuyarillaychispuni, nispa.

⁵¹Paykunan ichaqa ninku: P'enqasqan kashayku k'amiwasqankurayku, khuyay p'enqasqan kashayku Señor Dios yupaychana wasiq Ch'uya Cheqasninkamaraq wak llaqtayoq runaq haykusqanmanta, nispa.

⁵²Señor Diosmi ichaqa nin: Chayamunqan p'unchaykuna Babiloniaq idolonkunata muchuchinay, lliw suyuntinpi k'irisqakunaq waqaranan.

⁵³Cielokamaña Babilonia wichaspa pukaranta perqanqa chaypas, kachaykusaqpunin pay contra thuniqta. Ñoqa Señor Diosmi chayta nini.

⁵⁴Babiloniaq nanaymanta qaparisqanmi uyarikun, Caldea runakunaq suyunmantan manchay thunikusqan uyarikun.

⁵⁵Chayqa Señor Diosmi Babiloniata thunishan, sinchi ch'aqwaynintan p'uchukachipushan. Awqanmi qocha hinaraq phoqchiqeshan, phoqchiqeyninmi manchanatapuni uyarikushan.

⁵⁶Babilonia thuniqmi hamusqa, hap'irqapunkuñan soldadonkutapas, p'akirqarinkuñan p'eqtankutapas. Señor Diosqa huchamanta muchuchiq Diosmi, sapankamanpas tupaqnintapuni qoq Diosmi.

⁵⁷Tukuy-atiyniyoq Señor Diosmi nin: Ñoqan macharqachisaq Babilonia suyuq umallinkunata, yachaysapankunata, kamachikuqninkunata, oficialninkunata, soldadonkunatapas, hinan mana hayk'aq rikch'ariq wiñaypaq puñupunqaku, ñoqa Reymi chaytaqa nini, ñoqan kani Tukuy-atiyniyoq Señor Diosqa.

⁵⁸Babilonia llaqtaq muyuriq ancho perqanpas pasaq pampa thunisqan kanqa, hatuchachaq punkunkunapas ninawan kanaykusqan kanqa. Chay hinaqa, yanqapaqmi suyukunaqa llank'arqanku, paykunaq sayk'uyninkuqa ninapin tukukun, nispa.

⁵⁹Maasiaspa churin Neriaspa churin Seraiasqa Judá rey Sedequiaspa oficialninmi karqan, paypa ruwanantaq karqan reypa qorpachakunan wasi allichay. Sedequías Judapi tawakaq watapiña kamachikushaqtinmi, Seraiasqa Sedequiasta Babiloniaman riysirqan, hinan Jeremiasqa huk willakuyta Seraiasman apachirqan.

⁶⁰Jeremiasqa huk qelqa k'uyupin qelqasqa llapan ima llakikunachus Babiloniata qatinanta.

⁶¹Seraiastataq nirqan: — Babiloniaman chayaspaykiqa aman qonqankichu kay qelqata alto kunkapi leeyta.

⁶²Chaymantataq ninki: Señor Dios, qanmi nirqanki kay llaqtata thuninaykita, chay hinapi mana runapas uywapas kaypi tiyananpaq. Wiñaypaqmi kay cheqastaqa purunyachinki, nispa.

⁶³Kay qelqa leeyta tukuspaykitaq, rumiman watarqospa Eufrates mayuman wikch'uykunki.

⁶⁴Hinaspataq ninki: Kay hinatan Babiloniaqa chinkaykapunqa, manapuniñan hatarimuyta atinqañachu Señor Diospa hatun llaki churasqanmantaqa, nispa. Kaypin tukukun Jeremiaspa rimasqan.