Read DIOSPA QHELQACHISQ Quechua JEREMÍAS 7 Bible Online

JEREMÍAS 7 - DIOSPA QHELQACHISQ Quechua bible

JEREMÍAS 7

¹Señor Diosmi Jeremiasta nirqan:

²Ñoqata yupaychawananku wasi punkupi sayaykuy, hinaspa kay willakuyta willay: Señor Diosta yupaychaq haykuq llapan Judá runakuna, Señor Diospa siminta uyariychis.

³Israelpa Diosnin Tukuy-atiyniyoq Señormi nisunkichis: Kawsayniykichista ruwayniykichista allinman t'ikraychis, chaymi kay hallp'api tiyakullankichispuni.

⁴Amaña k'askakuychischu chay q'otukuqkunamanqa, paykunan yanqalla ninku: ¡Kayqa Señor Dios yupaychana wasi! ¡Kayqa Señor Dios yupaychana wasi! ¡Kayqa Señor Dios yupaychana wasi! nispa.

⁵Kunan imayna kawsayniykichistachus ruwayniykichistachus allichankichis, hukkuna hukkunawan chaninta ruwanakunkichis,

⁶manataq sarunchankichischu wak llaqtayoqkunata, mana tayta-mamayoqkunata, viudakunatapas, manataq mana huchayoq runata wañuchinkichischu, manataq wak dioskunata yupaychankichischu chayqa,

⁷ñoqan ñawpa taytaykichisman qosqay hallp'api kashallasaqpuni.

⁸¡Qhawariychis! Qankunaqa llullakuspa rimasqallamanpunin k'askakunkichis.

⁹Suwakunkichismi, runatan wañuchinkichis, wasanchay huchatan ruwankichis, ñoqaq sutiytan yanqa qasi hoqarinkichis, Baal diosniykichismanmi sacrificiota ruphachinkichis, mana reqsisqaykichis dioskunatan yupaychankichis.

¹⁰Chaymantataq qankunaqa wasiymanpas ñawpaqeymanpas hamuspa ninkichis: Kaypiqa allinmi kashanchis, nispa. Chaywanpas cheqnikusqay ruwanakunallatan ruwayta yuyashankichis.

¹¹¿Qankunaqa yuyankichischu ñoqa yupaychawanaykichis kay wasiqa suwakunaq pakakunan t'oqo kananpaq? Ñoqaqa llapantan rikurqani ima ruwasqaykichistapas. Ñoqa Señor Diosmi chayta nini.

¹²Huk cheqastan Silo llaqtapi akllakurqani chaypi yupaychawanaykichispaq, chay cheqasta rispaykichis Israel llaqtaypa mana chanin ruwasqanmanta imatachus ruwasqayta rikumuychis.

¹³Señor Diosmi nin: Hinaña kuti-kutirispa nirqaykichis ruwasqaykichismanta chaypas, qankunaqa manapunin uyariqpas tukurqankichischu, waqyamurqaykichismi manataq kutichiwarqankichischu.

¹⁴Chaymi imaynatachus Silopi yupaychana wasita ruwarqani, chay hinallatataq ruwasaq qankunaq hap'ipakusqaykichis yupaychana wasitapas. Kayqa wasiymi, ñoqan qorqani ñawpa taytaykichisman qankunamanwan.

¹⁵Qankunatapas ñawpaqeymanta qarqopusqaykichismi imaynan ñawpaqeymanta wawqeykichis Efraín mirayta qarqorqani hinata, nispa.

¹⁶Señor Diosmi niwarqan: Qan Jeremiasqa, aman mañakuwankichu kay llaqtapaq, aman pituchakuwankichu, amallataq paykunapaqqa valekuwankipaschu. Amapuniñan: Hinatayá, niwankiñachu. Ñoqaqa manan uyarisqaykiñachu.

¹⁷¿Manachu rikunki Judá llaqtapi Jerusalenpa callenkunapipas ruwasqankuta?

¹⁸Erqekunan llant'ata pallamunku, taytankutaq ninawan kananku, warminkutaq masata q'apispanku tortata ruwanku. Hanaq pacha “reina” nisqa diosaman haywanankupaq. Hinallataq paykunaqa wak dioskunamanpas vino ch'uyata haywanku ñoqata phiñachiwanankupaq.

¹⁹Señor Diosmi nin: Chay ruwasqankuri, ¿ñoqatachu muchuchiwan? ¡Manan! Paykuna kikillankutaqmi muchunku, chaymi p'enqaypi rikukunku.

²⁰Chayraykun ñoqa Apu Señor Diosqa k'arak phiñakuyniyta ñoqa yupaychana wasiman chayachisaq, kaqllataq runakunamanpas, uywakunamanpas, mallkikunamanpas, chakra llank'asqankumanpas. Phiñakuyniyqa rawrarinqa mana piqpa thasnuy atinantan, nispa.

²¹Israelpa Diosnin Tukuy-atiyniyoq Señormi llaqtanta nin: ¡Phawaychis! Ruphachina sacrificioykichisman wakin sacrificioykichista yapaykuspa chay aychata mikhukampuychis, manan imapas qokuwanchu.

²²Egiptomanta ñawpa taytaykichiskunata horqomuspayqa, manan ima nillarqanipaschu ruphachina sacrificiomantapas wak ofrendakunamantapas.

²³Aswanpas ñoqaqa kamachirqanin: Ñoqata kasuwaychis, ñoqan Diosniykichis kasaq, qankunataq llaqtay kankichis. Llapa kamachikuyniyman hina puriychis, chay hinapin allillan kasunkichis, nispa.

²⁴Paykunan ichaqa mana kasuwarqankuchu, manataq uyariwarqankupaschu, aswanmi paykunaqa millay mana chanin sonqonkuq kamachinta ruwarqanku, ñawpaqman rinankutaqa qhepamanmi aswanta kutirqanku.

²⁵Egiptomanta ñawpa taytaykichiskunaq lloqsimusqanmanta kunankaman qankunaman kamachiy profetakunata mana thanispa sapa p'unchay kachamurqaykichis,

²⁶qankunataq ichaqa mana uyariqpas tukuwarqankichischu, manallataq kasuwarqankichispaschu, ñawpa taytaykichiskunamantapas aswan rumi sonqomanmi tukupurqankichis, nispa.

²⁷Jeremiastataq nirqan: Paykunamanmi tukuy chaykunata ninki, manan uyarisunkikuchu. Qanmi waqyanki, manataqmi kutichimusunkikuchu.

²⁸Chaymi paykunaman ninki: Qankunaqa Diosniykichis Señor Diostapas mana uyariq suyun kankichis, wanachisqantapas manan chaskirqankichischu. Hunt'aq-kayqa chinkapusqan, chaytaqa manañan rimakullasqapaschu, nispa.

²⁹Jerusalén llaqta, llakikuymanta phutikuy, chukchaykita rutukuspa wikch'uy, ch'in nisqa orqokunapi waqay-waqayta takimuy, llaqtayki runapaq Señor Diospa phiñakusqanmanta wikch'upuspa qonqarparisqanmantawan, nispa.

³⁰Señor Diosmi nin: Judá runakunan ñawpaqeypi millay mana munasqayta ruwarqanku, cheqnikusqay idolokunata wasiyman churaykuspan qhellicharqanku.

³¹Ben-hinom wayq'opipas Tofet nisqa yupaychana cheqastan ruwarqanku qharitaraq warmitaraq wawankuta chaypi ruphachinankupaq. Manan hayk'aqpas chay ruwaytaqa kamachirqanichu, manapunin yuyallarqanipaschu chaytaqa.

³²Chayraykun huk p'unchay chayamunqa, hinan chay wayq'ota manaña: Tofet, ninqakuchu, manallataq: “Ben-hinom wayq'o”, ninqakupaschu, aswanmi ninqaku: “Runa Wañuchina wayq'o”, nispa. Chay Tofetpin ayankunata p'ampanqaku, mana huk cheqasllapas qasi kanankama.

³³Chay ayakunatataqmi ankakuna salqa animalkunapiwan mikhupunqaku, manataqmi pillapas hark'akuq kanqachu.

³⁴Hinan Judá llaqtakunamanta Jerusalén callekunamantawan kusikuyta, q'ochukuyta casarakuypi qhaswaykunatawan chinkachisaq. Suyuntintan purun-purunman tukuchipusaq.