Read DIOSPA QHELQACHISQ Quechua LAMENTACIONES 1 Bible Online

LAMENTACIONES 1 - DIOSPA QHELQACHISQ Quechua bible

LAMENTACIONES 1

¹¡Ay, imaraqmi Jerusalenqa sapan kapushan, haqay hina askha runakunayoq llaqta! ¡Ay, imaraqmi viuda warmi hina kapushan, lliw suyukunaq uman kashaqqa! Mit'anipin[1] llank'apushan, lliw llaqtakunaq ñust'an kashaqqa.

²Tutan-tutanmi unuy-parata waqaykushan, uyapas p'aspay-p'aspallaña. Llapan munaqninkunamanta manan hukllapas kanchu sonqochaykuqnin. Llapan reqsinakuq-masinkunapas manan rikuqpas tukupunkuchu, llapallanmi awqanman tukupunku.

³Judá runakunan kamachi-kayman apasqa kanku, chaypin sinchita llank'aspa muchushanku. Hinantin suyukunapi tiyaspan manaña samaykuytapas tarinkuñachu. Sinchi sasachaypa ñit'iykusqan kashaqtinmi, qatiykachaqninkuna tariparqanku.

⁴Sionman rina ñankunapas llakiy-llakiymi kapushan, hatun fiestamanqa manan pipas rinñachu. Llaqta punkukunapas ch'usaqmi kapushan, sacerdotekunan: ¡Ikiraqmi! ¡Imaraqmi! nishanku, doncella sipaskunan llakiraykukushanku, Jerusalentaqmi simipas hayallaña kaykushan.

⁵Awqankunan Jerusalenta munaychakapushanku, kunanqa kusisqan tiyapushanku. Señor Diosmi paytaqa llakichin sinchi askhata huchallikusqanrayku. Wawankunan apasqa rikukapun awqankun kamachipaq apapun.

⁶Sionpa ususinpa k'acha-kayninmi chinkarqapun. Umalli runankunapas q'achuta mana tariq taruka hinan purishan, chakinta aysaspallañan chakuqninpa ñawpaqenta ayqeshan.

⁷Llaki-phutiypi awqankunaq apaykachasqan rikukuspanmi Jerusalenqa chayraq yuyarin ñawpa sumaq-kayninta. Awqanpa makinman urmaykuqtinmi, mana pillapas yanapaykuqnin karqanchu. Awqankunapas payta rikuspan thunikusqanmanta asipayarqanku.

⁸Sinchitapunin Jerusalenqa huchallikurqan chaymi qhellillaña kapushan. Allin rikuqninkunan kunanqa pisichapunku, q'alalla kaynintan rikurqapunku. Chaymantan payqa waqashan, p'enqakuymantan manaña rikhuriytapas munanchu.

⁹P'achanpas lliwpa rikunanmi qhellichasqa karqan, ichaqa manan yuyarqanchu chhaynaman chayananta. ¡Imaynapipunin urmaykurqanqa! ¡Manan pipas sonqochaqnin karqanchu! Paytaq waqyakun: ¡Qhawariway, Señor Diosníy, muchuchisqa kasqayta, awqaymi atiparqapuwan! nispa.

¹⁰Awqanmi munaychakapurqan Jerusalenpa llapan qhapaq kayninkunata. Jerusalenmi rikurqan yupaychana wasiman wak suyu runakunaq haykusqanta, Señor Diospa llaqtanwan huñukunanta hark'asqan runakunaq haykusqanta.

¹¹Waqaykukuspan llaqtantin runakuna mikhunata maskhashanku, qhapaq kayninkutan mikhunawan chhalarqapunku chaywan kawsanankupaq. Jerusalentaq waqyakun: ¡Señor Diosníy, qhawariway! ¡Khuyapayaway pisichasqa kasqayta! nispa.

¹²Qankuna kay ñanninta puriqkuna, ¿manachu imapas qokusunkichis kay nanayniymanta? Qhawariychis hinantinta, ¿pillapas kanchu ñoqa hina ñak'ariq? ¡Señor Diosmi kay llakiwan kachaykuwarqan phiñakuynin rawrariqtin!

¹³Hanaqmantapacha Señor Diospa kachaykamusqan ninan tulluykamaraq haykun. Urmanaypaqmi llikata churarqan, qhepamanraq kutichiwarqan. Sapaytan wikch'urpariwarqan, nanayllapipunin p'unchay-p'unchay kashani.

¹⁴Señor Diosmi huchayta yuparqan, pay kikinmi huchayta wataykurqan, kunkaymantaq warkuykurqan, chay hinapin kallpay chiriyarqan. Señor Diosmi hap'iykachiwarqan mana atipay-atiy runakunaq makinman.

¹⁵Señor Diosmi llapan soldadoykunata pisicharparirqan, phawaykuspa wañuchiwanankupaqmi soldadokunata apamurqan allichachaq waynaykunata ch'usaqyachinanpaq. Señor Diosmi Judá llaqtata t'usturqapurqan vino horqonankupaq uvas saruq hinaraq.

¹⁶Chayraykun pasaqtapuni waqashani, ñawiypas weqe hunt'aykusqallañan kashan. Manan piniypas kanñachu sonqochaqniy, manan piniypas kanñachu kallpachaqniy. Wawaykunan wikch'usqa raqay-raqaypi rikukun, awqay ñoqata atipawasqanrayku.

¹⁷Sión llaqtan valepakuspa makinta haywarikun, manataq pillapas sonqochaqnin kanchu. Señor Diosmi unancharqan Jacobpa llaqtamasinkuna awqan kapunanta, llaqta-masinkunapaqmi Jerusalenqa mana serviq qhelli kapurqan.

¹⁸Señor Diosqa chaninpunin, ñoqataq kamachikuyninta p'akirqani. Llapa llaqtakuna uyariwaychis, nanayniyta qhawariwaychis. Wayna-sipasniykunapas lliwmi kamachipaq apasqa kapurqan.

¹⁹Munaqniykunaq yanapawanantan waqyakurqani, paykunataq ichaqa yanqalla q'otuykuwarqanku. Sacerdoteykunan kurak runaykunapiwan kikin llaqtapi wañupurqanku, kawsanankupaq mikhunata maskhashaspanku.

²⁰¡Señor Diosníy, llakikuyniyta qhawariy! Sonqoyraqmi phatatatashawan, nanaymi sonqoyta k'iriykuwan, sinchi mana kasukuq kasqaymanta. Hawapin espadaqa runata wañurachishan, kay ukhupipas wañuyllataq kashan.

²¹Runakunan khuyay anchisqayta uyariwan, manataqmi sonqochaqniyqa pillapas kanchu. Lliwmi awqaykunaqa khuyay muchusqayta yacharqan, kusikushankutaqmi qanpa ruwasqaykimanta. ¡Unanchasqayki p'unchayta chayachimullayña, paykunapaqpas ñoqapaq hina kachun!

²²Lliw mana allin ruwasqankumanta paykunata huchachay, ñoqata ruwawarqanki hinata huchankumanta taripay. Pasaqtapunin ñoqaqa waqashani, sonqoypipas k'irisqallañan kashani.