Read DIOSPA QHELQACHISQ Quechua LAMENTACIONES 2 Bible Online

LAMENTACIONES 2 - DIOSPA QHELQACHISQ Quechua bible

LAMENTACIONES 2

¹Señor Diospa phiñakuyninqa sinchipunin kasqa, Sionpa ususintapas tutayaykachirqanraqmi. Israelpa ancha sumaq-kaynintan Señor Diosqa hanaq pachamanta pampaman wikch'umurqan. Phiñakuspaqa manapunin yuyarirqanchu chakinpa samanan Siontapas.

²Señor Diosqa mana khuyapayaykuspan Jacobpa wasinkunata llapallanta thunirqapurqan. Phiñakuspallaraqmi thunirqapurqan Judapa allin perqasqa llaqtankunata. Suyuta kamachiqninkunatawan p'enqachispa huch'uyyachirqan.

³Phiñakuynin rawrariqtinmi, Israelpa llapa atiyniyoq kayninta kuchurparirqan. Payqa manañan yanaparqanchu awqan qayllaykamushaqtin. Jacobtan ruphaykapurqan lliwta q'olaq[2] nina hina.

⁴Señor Diosqa awqankupas kanman hinan wach'inata allinta hap'iykurqan. Awqanku hinapunin atiyninwan wañuchirqan allinpaq hap'isqanku llapa runakunata. Phiñakuyninpas nina hinaraqmi Sión llaqta contra rawrarirqan.

⁵Awqa hinan Señor Diosqa Israelta thunirqapurqan, lliw qhapaq wasinkunatapas ñut'urqapurqan, pukarakunatapas thunirqapurqan. Sumaq Judamanmi hunt'aykachirqan llaki pataman aswan llakitaraq.

⁶Huertapi ch'ukllata hinan yupaychana wasitapas thunirqapurqan, huñunakuna cheqastapas thunirqapurqan. Señor Diosmi fiestakunatapas samana p'unchaykunatapas Sionpi p'uchukachipurqan. K'arakta phiñakuspanmi reytapas sacerdotetapas qarqopurqan.

⁷Señor Diosqa altarnintapas manan munapurqanchu, yupaychana wasintapas saqerparipurqanmi. Awqakunamanmi hap'iykachipurqan allichachaq wasinkunaq muyuriq perqantapas. Señor Dios yupaychana wasipin awqakuna ch'aqwarashan fiesta p'unchaypi hinaraq.

⁸Señor Diosmi yuyaykurqan sumaq Sionta muyuriq perqan thuniyta, allinta tupuspan hukpaqkama thunirqan. Perqa hawantan ukhuntawan q'asarqan, llapantan raqay-raqayman tukuchirqan.

⁹Punkunkunapas lliwmi chinkaykapurqan, punku chakakunapas lliwmi ñut'ukapurqan. Reyninpas kamachikuqninkupas kamachipaq apasqan kapun, Señor Diospa kamachikuy siminpas manan kanñachu, profetankunamanpas manañan Señor Diosqa rikhuriypi rimapayanchu.

¹⁰Sionpa ususinpa kurak runankunapas ch'inraqmi pampapi tiyapushan, umankuman usphata hach'ikuspa, llakikuymanta qhasqa p'achawan p'achakuspa. Jerusalenpa sipasninkunapas pampata qhawaspan puripushanku.

¹¹Manañan ñawiypa weqenpas kanñachu, nanaymantan sonqoypas phatarqonqaña, yuyayniypas pampataraqmi chinkariwan, llaqta-masiykunaq muchusqanta rikuspa, ñuñuq wawakunata erqekunatawan yarqaymanta callekunapi wañushaqta rikuspa.

¹²Wawakunan mamankuta ninku: ¿Manachu kapunña t'antanchispas vinonchispas? nispa. Llaqta callekunapin k'irisqa hina kumpakapunku, ñak'aymantaraqmi mamankuq oqllayninpi wañupunku.

¹³Jerusalenpa ususin, ¿ima nisqaykitaq? ¿Imawantaq rikch'anachisqayki? Sionpa ususin sipas, ¿imawantaq rikch'anachisqayki qanta sonqochaykunaypaq? Qocha hinaraqmi k'iriykiqa manchakuyraq, ¿pipunitaq qhaliyaykachisunkiman?

¹⁴Rikhuriykunata willaq profetaykikunaqa yanqa q'otullatan willarqasunki. Manan sut'incharqanchu huchaykikunata mana preso apasqa kanaykipaq. Yanqa q'otukuyllatan willarqasunki, chaykunawantaq pantachirqasunki.

¹⁵Jerusalenpa ususin, ñanninta puriqkunan qanta rikuspa asipayaspa t'aqllakunku, silbakuspan umankutaraq maywipayasunki: ¿Kay llaqtachu “aswan munaycha” nisqanku? ¿Kay llaqtachu “llapa runa kusichiq” nisqanku? nispa.

¹⁶Llapan awqaykikunan qan contra rimarinku, silbaspan k'utupakusparaq ninku: Ichaqa pasaqtapunin thunipurqanchis, kay hina kanantapunin munarqanchis. ¡Kunanqa rikunchispunin! nispa.

¹⁷Señor Diosmi yuyaykusqanta ruwarqan, ñawpaqmanta rimasqantapas hunt'arqan. Mana khuyapayaykuspan thunirqasunki, awqaykiwanmi yachapayachirqasunki, awqaykiwanmi atipachirqasunki.

¹⁸Sionpa ususin, Señor Diosman kunkayoqta waqyakuy. Tuta-p'unchay qapariy, unuy parata waqaspa. Ama thanispa waqay, ñawiykipas ama samaykuchunñachu.

¹⁹Tuta sayarispa qapariy, sapa kuti llaqta qhawaq hamuqtin qapariy, Señor Diospa qayllanpi tukuy ukhu sonqoykimanta mañakuy. Makiykita payman haywariy, wawaykikunaq kawsananpaq pituchaykukuy, paykunan sapanka callepi yarqaymanta urmapunku.

²⁰Señor Diosníy, ¡qhawariy! ¡Yuyariy! ¡Manan pitapas hayk'aqpas khaynataqa ruwarqankichu! ¿Hinallachu mamakuna wachakusqanku wawankuta mikhunqaku? ¿Hinallachu profetakunapas sacerdotekunapas qan yupaychana wasipi wañuchisqa kanqaku?

²¹Callekunapin chuta-chuta kashanku waynakunapas machukunapas. Ñoqaq wayna-sipasniykunan espadawan sipisqa wañupurqanku. Phiñakusqayki p'unchaymi wañuchirqanki, mana khuyapayaykuspan nak'arqanki.

²²Fiesta qhawaq hamunanpaq mink'asqata hinaraq millay awqaykunata contraypi hinantinmanta kachamurqanki. Señor Diosníy, phiñakuyniyki p'unchaypin mana pipas ayqekurqanchu, manataq kawsarqanchu. Ñoqaq yachachispa uywakusqaykunatapas awqaymi wañurqachipurqan.