Read DIOSPA QHELQACHISQ Quechua LAMENTACIONES 3 Bible Online

LAMENTACIONES 3 - DIOSPA QHELQACHISQ Quechua bible

LAMENTACIONES 3

¹Ñoqan kani Señor Diospa phiñakuspa hasut'isqan runa.

²Ñawpaqenmanta qarqowaspanmi k'anchaypi purinaymantaqa tutayaq ñanpi purichiwarqan.

³Kuti-kutirispan sapa rato hina ñoqaman hasut'in chayawarqan.

⁴Aychaytapas qaraytapas qawiyachipurqanmi, tulluykunatapas p'akirqarirqanmi.

⁵Muyuriqniymanta ñit'ichiwaspanmi sinchi haya muchuywan rawkharqowarqan.

⁶Tutayaq ukhullapiñan tiyaykachiwarqan ñawpa p'unchaypi wañuqkunata hina.

⁷Mana punkuyoq kanchamanmi wisq'aykuwarqan, llasa bronce watanakunawanmi wataykuwarqan.

⁸Yanapayta mañakuspaña qaparini chaypas, manan uyariwanchu valepakusqaytaqa.

⁹Qaqamanta perqawanmi purinayta wisq'awarqan, ñanniytapas q'ewimanmi tukuchirqan.

¹⁰Señor Diosmi hap'irqoq ukumari hina qhawapayawarqan, pakakuq león hina suyawarqan.

¹¹Ñanniymanta pantarqachiwaspan llik'irqariwarqan, qonqasqatan wikch'upuwarqan.

¹²P'eqtanta chutarispan qhawaykuwarqan, wach'inantan chayachiwayta munarqan.

¹³Señor Diospa kacharimusqan wach'ikunaqa ukhuykamaraqmi t'urpuykuwarqan.

¹⁴Llaqtaypa asipayananmanmi tukupuni, sapa rato hinan ñoqamanta takinku.

¹⁵Señor Diosmi hunt'aykachiwarqan haya kaywan, amichiwarqanmi ajenjowan.

¹⁶Khullu rumiwanmi kiruyta p'akirqan uspha patapin saruwarqan.

¹⁷¡Imachá thak-kaypas kakun! ¡Imaynataqchá kusisqa-kaypas kakun!

¹⁸Kallpaymi chiriyarqapun, Señor Diospi suyakuyniypas manan kapunñachu.

¹⁹Llakikuyniyta yanqa purisqaykunatawan yuyariy, chayqa haya kaywan ajenjowan hinaraqmi.

²⁰Chaykunata yuyariqtiymi, aswantaraq kallpaypas chiriyaykapuwan.

²¹Ichaqa kashanraqmi ñoqapaq kayllapiña suyakuyniy:

²²Señor Diospa munakuyninqa mana tukukuqmi, khuyakuyninqa manan pisiyanchu,

²³chaykunaqa sapa paqarmi mosoqyan. ¡Señor Diosqa hunt'aqllapunin!

²⁴Señor Diosmi ñoqapaqqa lliw imaymanay, chaymi paypi suyakushani, nispa.

²⁵Señor Diosqa sumaqllapunin payman hap'ipakuqpaqqa, lliw payta maskhaqkunapaqqa.

²⁶Señor Diospa qespichiyninta ch'inlla suyakuymi aswan allinqa.

²⁷Runapaqqa wayna kasqanmantapacha kasukuq kayninmi may allinqa.

²⁸Runaqa Señor Dios ñak'arichiqtinqa ch'inlla sapallan tiyachun.

²⁹Huch'uyyaykukuspa pampata much'aykuchun, icha imaynapi kanmanraq suyakuy.

³⁰Ch'aqlaqninwanqa hinalla ch'aqlachikuchun, k'amisqataqa hinalla chaskikuchun.

³¹Señor Diosqa manan wiñaypaqchu runakunataqa saqerparin.

³²Muchuchinña chaypas khuyapayanpunin, munakuynin ancha hatun kasqanrayku.

³³Payqa manan munanchu runakuna llakichiytaqa, manallataq munanchu runakuna nanachiytaqa.

³⁴Señor Diosqa yachanmi suyupi preso kaqkunata sarunchasqankutaqa.

³⁵Señor Diosqa rikunmi Ancha hatun Diospa qosqan chaninchayta q'ewiqtaqa.

³⁶Señor Diosqa yachanmi hukman sayakuspa runaq mana chanin ruwasqantaqa.

³⁷Señor Dios mana kamachikuqtinqa, ¿pitaq imatapas willakunman?

³⁸Lliw allinkunapas mana allinkunapas hamun Ancha hatun Diospa unanchasqanmi.

³⁹¿Imamantataq runaqa quejakunman huchanmanta muchuchisqa kashaspari?

⁴⁰Cheqaqtapuni purisqanchista t'aqwirikusun, Señor Diosmantaq wakmanta kutirikapusun.

⁴¹Hanaq pacha Diosman sonqonchista kicharispa, makinchista haywarispa nisun:

⁴²Ñoqaykun contraykipi k'ulluchakuspa huchallikurqayku, qantaq mana pampachawarqankikuchu.

⁴³Sinchita phiñakuspaykin qatiykachawarqankiku, mana khuyapayaykuspan wañuchiwarqankiku.

⁴⁴Phuyuwanmi p'istukurqanki mañakusqaykuta mana uyariwanaykikupaq.

⁴⁵Suyukuna ukhupin q'opaman tukuchiwarqankiku.

⁴⁶Llapa awqaykun contraykupi rimanku.

⁴⁷Ñoqaykun manchachisqa kaspa t'oqoman urmaykurqayku, kunantaq thunisqaña kashayku pasaq raqay-raqay, nispa.

⁴⁸Munasqa llaqtay thunikuqtinmi ñawiymanta waqayniypas mayu hinaraq phawan.

⁴⁹Mana thaniykuspan waqasaq, manataqmi samaykusaqchu,

⁵⁰hanaqmanta Señor Diospa qhawarimuwanankama.

⁵¹Sonqoypas nanawanñan llaqtaypa ususinkuna ñak'arisqanta rikuqtiy.

⁵²Awqaykunapas mana ima huchaymantan phalaq animalta hina hap'iwarqanku.

⁵³Kawsashaqtan t'oqoman winarqowarqanku, punkuntapas qaqawanmi wisq'arqowarqanku.

⁵⁴Pasaqtan unupas p'ampaykapuwarqan, hinan yuyaykurqani: Wañusqa hinañan kashani, nispa.

⁵⁵Señor Diosníy, ukhu t'oqomantapachan waqyakamurqayki:

⁵⁶Uyariway yanapayniyki mañakamusqayta, nispa. Uyariwarqankin waqyakamusqayta.

⁵⁷Waqyakamuqtiymi qayllaykamuwarqanki: Ama manchakuychu, niwarqanki.

⁵⁸Qanmi, Señor Diosníy, hark'aykuwarqanki, qanmi, Señor Diosníy, qespichiwarqanki.

⁵⁹Qanmi, Señor Diosníy, mana allin ruwawasqankuta rikurqanki, yanapaykuwaspa chaninchaykuway.

⁶⁰Qanmi, Señor Diosníy, awqa sonqo kasqankuta rikurqanki, lliw yuyaykusqankuqa ñoqa contrakama kasqanta.

⁶¹Qanmi, Señor Diosníy, k'amiwasqankuta uyarirqanki, lliw yuyaykusqankuqa ñoqa contrakama kasqanta.

⁶²Awqaykunaqa p'unchay ch'isiyaqmi contrallaytapuni chhuchupakunku.

⁶³¡Qhawariy! Sayaspapas tiyaspapas ñoqamanta burlakuspan takinku.

⁶⁴Señor Diosníy, paykunamanqa tupaqninkutapuni qoy, ruwasqankuman hinapuni qopuy.

⁶⁵Sonqonkuta rumiyaykachiy, paykunataqa ñakaypuni.

⁶⁶Señor Diosníy, phiñakuspayki qatiykachay, kay pachamantaqa chinkachiypuni.