Read DIOSPA QHELQACHISQ Quechua LAMENTACIONES 4 Bible Online

LAMENTACIONES 4 - DIOSPA QHELQACHISQ Quechua bible

LAMENTACIONES 4

¹¡Imaraqmi qoripas yanayaykapurqan! ¡Imaraqmi ch'uya choqepas manaña k'anchapunchu! Hinantin k'uchukunapi ch'eqeykachisqan yupaychana wasiq ruminkunapas kashan.

²Sionpi munasqa waynakunan qori hina qhawasqa karqanku, kunantaq manka ruwaqpa ruwasqan t'uru manka hina qhawarparisqa kapunku.

³Chacal animalkunapas uñantaqa ñuñunmi, llaqtaytaqmi ichaqa ch'inneqpi suri hina sinchi millay wawankunapaq.

⁴Ñuñuq wawakunan unu ch'akiymanta kashanku, siminkumanmi qallunkupas k'askarqapun. Wawakunan t'antata mañakun, manataqmi pipas kanchu qoykuqnin.

⁵Sumaq hatun mikhuylla mikhuqkunan kunanqa callekunapi yarqaymanta puripushanku. Allin sumaq p'achakunayoq wiñaqkunan kunanqa q'opa patapi maskhapakapushanku.

⁶Llaqtayqa huchanmanta aswan ñak'arichisqaraqmi karqan Sodoma llaqtaq huchanmanta muchusqanmantaqa, chay llaqtaqa kaq ratopacha thunisqan karqan, mana piqpa phawaykusqallan.

⁷Akllasqa runankunaqa rit'i hina yuraqmi karqan, lechemantapas aswan yuraqmi karqan. Cuerponkupas coral umiñamantaqa aswan pukaraqmi karqan, rikch'ayninkupas anqas umiña hina munaymi karqan.

⁸Kunantaq ichaqa qhechinchamamantapas aswan yanaraq kapushan, callenkunapipas mana reqsiy atiyraqmi kashan. Aychankupas tullunkumanñan k'askapusqa, k'aspi hina ch'akillañan kapusqakupas.

⁹Aswan kusisamiyoqmi maqanakuypi wañuyqa karqan yarqaypi wañuymantaqa, paykunaqa pisi-pisimantan wañunku chakraq rurusqan mana kapuqtin.

¹⁰Llaqtay thunisqa kaqtinmi llakikuy p'unchaykunapi, sumaq sonqo warmikuna wawankuta wayk'ukapurqanku chayta mikhunankupaq.

¹¹Señor Diosmi phiñakuyninta kachaykamurqan, k'arak phiñakuynintan senq'apata hina kacharparirqan. Siontan ninawan kanaykurqan, teqsinkamaraqmi thunirqan.

¹²Kay pacha reykunaqa lliw suyukunapi tiyaqkunapas manapunin hayk'aqpas yuyarqankuchu, awqakunapas llat'anaqkunapas Jerusalén punkunta haykunankutaqa.

¹³Ichaqa haykurqankun, profetakunaq huchanmanta, sacerdotekunaq millay mana chanin ruwasqankumantawan, paykunan llaqta ukhupi chanin runakunata wañuchirqanku.

¹⁴Kunantaq paykunaqa callekunapi ñawsa hina thampi-thampita purishanku. Yawarkamallañan purishanku, manañan pipas paykuna llamiykuytaqa munankuñachu.

¹⁵Paykunataqa runapas waqyamunmi: ¡Lloqsiychis qhelli runakuna! ¡Lloqsiychis! ¡Ama llamiykuwaychispaschu! nispa. May llaqtapi purimusqankupipas nimurqanku: Manan kaypiqa tiyayta atiwaqchischu, nispa.

¹⁶Señor Diosqa qhawarispallaraqmi ch'eqerparichirqan, chaymantataqmi manaña qhawarinpasñachu, sacerdotekunatapas manañan respetarqankuchu, kurak taytakunatapas manañan khuyapayarqankuchu.

¹⁷Ñawipas ayphallañan qhawapakurqayku, yanqapaqmi yanapayta suyakurqayku. Torre patamantan qhawasharqayku mana qespichiy atiq suyuq chayamunanta.

¹⁸Purisqaykupas qhawasqallañan karqan, manan callekunaman lloqsiyta atirqaykuchu. Wañuyqa patallaykupiñan karqan, chay horaqa chayamurqanñan, chayamurqanpachan tukukapunaykuqa.

¹⁹Alton phalaq ankamantapas aswan phawaqmi ñoqaykuq qatiykachaqniykuqa, orqon-orqontan qatiykachawarqanku, ch'inneqpi pakakuspan suyawarqanku.

²⁰Señor Diospa hawisqan reytapas presotan hap'irqanku, payllan kawsachiqniyku karqan, paymantan nirqayku: Payqa wak suyukuna ukhupi hark'akuwasunmi, nispa.

²¹Yaw, Edom suyupi tiyaqkuna, asikuychis, yaw, Uz suyupi tiyaqkuna, kusikuychis, qankunamanpas chayamullasunkichistaqmi haya vaso ukyayqa, machaspa q'ala chichi kanaykichispaq.

²²Sión llaqtalláy, muchunaykiqa tukukapunmi, Señor Diosqa manañan kamachi-kayman apachisunkiñachu. Qanmi ichaqa, Edom suyu, huchaykimanta muchuchisqapuni kanki, Señor Diosqa huchaykikunatapas sut'imanpunin horqorparinqa, nispa.